Հայաստանի տաղանդը. Չեմպիոնների լիգայի ամսագիրը՝ Հենրիխ Մխիթարյանի մասին
01:16 10 դեկտեմբերի, 2012ՈւԵՖԱ-ի Չեմպիոնների լիգայի ամսագիրը ֆուտբոլի Հայաստանի ազգային հավաքականի եւ Դոնեցկի «Շախտյորի» կիսապաշտպան Հենրիխ Մխիթարյանին նվիրված հոդված է հրապարակել:
«Հայաստանի տաղանդը» վերնագրով հոդվածում խոսվում է 23-ամյա Մխիթարյանի անցած ճանապարհի, ընտանիքի եւ ֆուտբոլային որակների մասին:
«2011/2012 մրցաշրջանում «Շախտյորի» լավագույն ֆուտբոլիստ ճանաչված Մխիթարյանը այս տարի ավելի լավ է հանդես գալիս: Մխիթարյանը միայն հունվարին կդառնա 24 տարեկան, բայց նրան արդեն, միանշանակ, կարելի է համարել Հայաստանի լավագույն ֆուտբոլիստը ԽՍՀՄ-ի փլուզումից հետո: Երիտասարդ տաղանդն արդեն Նիկիտա Սիմոնյանի, Էդուարդ Մարկարովի եւ Խորեն Հովհաննիսյանի հետ տեղ է գտել փառքի սրահում: Նախորդ մրցաշրջանի մեծ մասը վնասվածքի պատճառով բաց թողած Ֆերնանդինյոյի վերադարձից հետո Մխիթարյանը ազատ գործելու հնարավորություն ստացավ եւ զբաղեցրեց Բրազիլիա վերադարձած Ժադսոնի տեղը ենթահարձակվողի դիրքում:
Հենրիխի լավագույն որակներից է բազմատիպ գոլեր խփելու կարողությունը: Հիանալի իրացում, ընթացքից հարվածներ տուգանային հրապարակի մատույցներից, արագ հակագրոհներ, որոնցից նա հաղթող է դուրս գալիս, շրջանցում է պաշտպանին, շրջվում է 360 աստիճան՝ գրավելով դարպասը մահացու տարածությունից. այս ամենին տիրապետում է Մխիթարյանը: Հենրիխը չի բավարարվում ձեռք բերածով՝ ունենալով գոլերի լավ վիճակագրություն: Նա արդյունավետ է օգտագործում «Շախտյորի» կոմբինացիոն խաղը: Թիմի կենտրոնական հարձակվող Լուիս Ադրիանոն ոչ միայն պետք է գոլեր խփի, ալյեւ տարածություն ստեղծի հիանալի եռյակի՝ Մխիթարյանի, Վիլիանի եւ Ալեքս Տեյշեյրայի համար:
Հոդվածում խոսվում է նաեւ ֆուտբոլիստի ծնողների մասին: Հենրիխի մայրն աշխատում է Հայաստանի ֆուտբոլի ֆեդերացիայում, իսկ քույրը՝ ՈւԵՖԱ-ում: Հենրիխի հայրը՝ լեգենդար ֆուտբոլիստ Համլետ Մխիթարյանը, մահացել է գլխուղեղի ուռուցքի հետեւանքով: Այդ ժամանակ Հենրիխը 7 տարեկան է եղել: «Ոչ մի հայ ֆուտբոլիստ Հենրիխի պես հեղինակություն չունի: Հենրիխը հիանալի հարաբերությունների մեջ է Միրչա Լուչեսկուի հետ»,- նշվում է ՈւԵՖԱ-ի հոդվածում, հայտնում է «Շախտյորի» պաշտոնական կայքը:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.