Դարպասապահ Հենրի Ավագյանը վերադարձել է «Փյունիկ»

20:32   4 հուլիսի, 2025

29-ամյա դարպասապահ Հենրի Ավագյանը վերադարձել է «Փյունիկ», հաղորդում է երեւանյան ակումբի կայքը։

Հենրին «Միկա» ակումբի սան է, խաղացել է «Միկա-2»-ում և «Միկայի» գլխավոր թիմում։ 2016 թվականին նա տեղափոխվել է «Բանանց» (ներկայիս` «Ուրարտու»), որտեղ անցկացրել է 2 մրցաշրջան։

2018 թվականի հուլիսին Հենրի Ավագյանը համալրել է «Ալաշկերտի» շարքերն ու վերջինիս կազմում դարձել է Հայաստանի սուպերգավաթակիր (2018 թ․) և գավաթակիր (2018/19 թթ․)։ 2020/21 թթ․ մրցաշրջանը դարպասապահն անցկացրել է Չարենցավանի «Վանում»։

2022 թվականի հունվարին Ավագյանը կարիերան շարունակել է Հայաստանի Պրեմիեր լիգայի նորեկ «Նորավանքում», որի կազմում 2021/22 թթ․ մրցաշրջանում դարձել է Հայաստանի գավաթակիր։ Այնուհետև նա կես մրցաշրջան ելույթ է ունեցել ԲԿՄԱ-ում։

2022 թվականի դեկտեմբերին Հենրի Ավագյանը տեղափոխվել է «Փյունիկ», իսկ հաջորդ մրցաշրջանում մեր թիմի կազմում դարձել է Հայաստանի չեմպիոն։ 2024/25 թթ․ մրցաշրջանի եվրոգավաթային հանդիպումների ընթացքում Ավագյանն առանց փոխարինման մասնակցել է «Փյունիկի» բոլոր 8 խաղերին՝ դրանցից 4-ում դարպասը պահելով անառիկ։ Ընդհանուր առմամբ, նա մեր թիմում անցկացրել է 29 խաղ։

Հենրի Ավագյանի նախորդ թիմն՝ «Արարատ-Արմենիան» էր, որտեղ խաղացել է 2025 թվականի հունվարից։ Հայաստանի փոխչեմպիոնի կազմում Հենրին այս տարվա ապրիլին դարձել է Հայաստանի սուպերգավաթակիր։

Ավագյանը հանդես է եկել նաև Հայաստանի Մ-17, Մ-18, Մ-19 և Մ-21 տարեկանների հավաքականներում։ 2018 թվականի նոյեմբերի 19-ին, Ազգերի լիգայի անդրանիկ խաղարկության՝ Լիխտենշտեյնի հավաքականի դեմ (2:2) արտագնա խաղում Ավագյանն իր նորամուտն է նշել Հայաստանի ազգային հավաքականում։



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.