Եվրոպայի նորընծա չեմպիոն Համլետ Մանուկյան. Այս հաղթանակի համար շնորհակալ եմ Աստծուն եւ իմ մարզիչներին
09:42 2 հունիսի, 2025Շատ ուրախ եմ, որ կարողացա ոսկե մեդալ նվաճել իմ առաջին մեծահասակների Եվրոպայի առաջնությունում, որի համար շնորհակալ եմ Աստծուն եւ իմ մարզիչներին:
Այս մասին NEWS.am Sport-ի հետ զրույցում ասաց Եվրոպայի նորընծա չեմպիոն, երիտասարդների աշխարհի կրկնակի եւ Եվրոպայի չեմպիոն, 17-ամյա Համլետ Մանուկյանը, որը նախորդ գիշեր Հայաստանի թիմի հետ վերադարձավ հայրենիք:
Գերմանիայի Լայպցիգ քաղաքում անցկացված սպորտային մարմնամարզության Եվրոպայի առաջնությունում նժույգ թափեր վարժության եզրափակիչում 17-ամյա Համլետ Մանուկյանը 14.766 միավորով նվաճեց իր առաջին ոսկե մեդալը մեդածահասակների Եվրոպայի առաջնությունում:
«Եվրոպայի առաջնությունը լավ ստացվեց: Տպավորություններս շատ լավն են: Առաջին անգամ էի մասնակցում մեծահասակների Եվրոպայի առաջնությանը: Շատ ուրախ եմ, որ կարողացա ոսկե մեդալ նվաճել: Շնորհակալ եմ Աստծուն այս հաղթանակի համար: Նաեւ այս հաղթանակի համար շնորհակալ եմ իմ մարզիչներին: Իմ ընկերների նվաճած մեդալների համար եւս շատ ուրախ եմ:
Սպասումներով էի մեկնել, ինչպես յուրաքանչյուր մրցաշարի եմ մեկնում: Միշտ մեկնում ենք հաղթանակի համար, բայց մրցաշարն է ցույց տալիս, թե ինչպես կստացվի: Նժույգ թափեր վարժությունում իմ մրցակիցները բոլորն էլ ուժեղ էին: Եվրոպայի առաջնություն էր, եւ բոլոր ուժեղները մասնակցում էին»,- ասաց Համլետ Մանուկյանը:
Այս վարժությունում Եվրոպայի փոխչեմպիոն հռչակվեց Մամիկոն Խաչատրյանը, որը Համլետ Մանուկյանին զիջեց շատ քիչ միավորներով: Խաչատրյանը արծաթե մեդալակիր դարձավ 14.733 միավորով:
Սպորտային մարմնամարզության նժույգ թափեր վարժությունում Եվրոպայի առաջնություններում անկախ Հայաստանի առաջին ոսկե մեդալը նվաճել է Հարություն Մերդինյանը 2016 թ. Բեռնում: Այս վարժությունում Հայաստանի երկրորդ տիտղոսը նվաճել է Արթուր Դավթյանը 2021 թ. Բազելում: 2022 թ. Մյունխենում Հարություն Մերդինյանը հռչակվել է Եվրոպայի կրկնակի չեմպիոն:
Լուսինե Շահբազյան
Լուսանկարը՝ Արսեն Սարգսյանի
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.