Տրեզեգե․ «Յուվենտուսի» մուտքը Հայաստան մեծ հույս է տալիս, որ այստեղ կզարգանա շատ կայուն ֆուտբոլ

Ապագայում «Յուվենտուս-Արմենիա» ակադեմիայի ազդեցությունը կտեսնենք ֆուտբոլի Հայաստանի տարբեր տարիքային հավաքականների վրա. պետք է ի հայտ գան նոր Մխիթարյաններ, որի պոտենցիալը մեր ազգն ունի: Լիահույս ենք, որ համատեղ ջանքերով կկարողանանք վերադարձնել հայկական ֆուտբոլի երբեմնի փառքը:

Այսպես «Յուվենտուս-Արմենիա» ֆուտբոլային ակադեմիաների հիմնումը Հայաստանում մեկնաբանեց ակադեմիաների հիմնադիր Ալֆրեդ Սադոյանը:

Աշխարհի եւ Եվրոպայի չեմպիոն, «Յուվենտուս» ֆուտբոլային ակումբի լեգենդար ֆուտբոլիստ, ՖԻՖԱ-ի դեսպան Դավիդ Տրեզեգեի մասնակցությամբ մայիսի 29-ին Երեւանում տեղի ունեցավ «Յուվենտուս-Արմենիա» ֆուտբոլային ակադեմիաների շնորհանդեսը:

Փակ միջոցառմանը ներկա էին «Յուվենտուսի» միջազգային ակադեմիաների համակարգող Դավիդե Ֆորնական, վարչապետ Նիկոլ Փաշինյանը, ԿԳՄՍ նախարար Ժաննա Անդրեասյանը, ՀՖՖ նախագահ Արմեն Մելիքբեկյանը, սպորտի ներկայացուցիչներ: 

Շնորհանդեսին ներկայացվեց Հայաստանում բացվող «Յուվենտուս» ֆուտբոլային ակադեմիաների նախագծերը, ենթակառուցվածքները, նախատեսվող մեծ մարզադաշտը: Ցուցադրվեցին Երեւանում նախատեսվող երկու մեծ մարզաբազաների մակետները, որոնք կառուցվելու են «Ավան» ակադեմիայի հարեւանությամբ եւ «Հրազդան» ստադիոնի հարեւանությամբ:

Լեգենդար ֆուտբոլիստ Դավիդ Տրեզեգեն շնորհանդեսին ժամանել էր տիկնոջ հետ: Նրան ներկայացնելուց առաջ դահլիճի հյուրերին ցուցադրեցին Տրեզեգեի մասին պատմող ֆիլմ, ապա կարճ հոլովակ նրա երեւանյան երկօրյա այցի մասին:

Դավիդ Տրեզեգեն հիացած է հայաստանյան ընդունելությունից եւ հույս ունի, որ ակադեմիան կնպաստի կայուն ֆուտբոլի զարգացմանը:

«Երկու օր Երեւանում գտնվելուց հետո վստահ կարող եմ ասել, որ այս երկիրն իրենից ներկայացնում է դինամիկ մի երեւույթ, որը հարուստ է մշակույթով, պատմությամբ եւ ներուժով նաեւ ֆուտբոլի առումով: Երեկ հնարավորություն ունեցա հայ երեխաների հետ ֆուտբոլ խաղալ եւ նրանց աչքերում նկատեցի կրակ, որը նրանց անպայման կդարձնի ֆուտբոլիստ: Այս երեխաները բոլորիս աջակցության կարիքն ունեն: Հայաստանում «Յուվենտուս» ակադեմիայի հիմնադրումը շատ կարեւոր իրադարձություն է: «Յուվենտուսի» մուտքը Հայաստան մեծ հույս է տալիս, որ այստեղ կզարգանա շատ կայուն ֆուտբոլ, որը հիմնված կլինի նոր մեթոդների եւ որակապես նոր մակարդակի վրա: Այս նախագիծը հիմնված է «Յուվենտուս» ակադեմիայի ամենալայն սկզբունքների վրա: Մեր հիմնական նպատակն է սպորտային մշակույթի զարգացումը:

Իմ եւ ակումբի անունից շնորհակալ եմ բոլոր նրանց, որոնք իրականություն դարձրին այս գաղափարը»,- ասաց Դավիդ Տրեզեգեն:

«Յուվենտուս-Արմենիա» մարզաբազայի եւ ակադեմիաների շինարարության ավարտը նախատեսված է 2026 թ. ամռանը: Ակադեմիաների հիմնադիր Ալֆրեդ Սադոյանը հույս ունի, որ ակադեմիաները հայկական ֆուտբոլին նոր Հենրիխ Մխիթարյաններ կտան:

«Հայաստանում «Յուվենտուսի» ակադեմիայի հիմնումը սպորտի ոլորտում նախադեպը չունեցող նախագիծ է: Երկու տարիների ընթացքում մեր թիմով արել ենք անհնարինը  այս ծրագիրը կյանքի կոչելու համար:

«Յուվենտուսի» հայաստանյան ակադեմիան բաղկացած է լինելու 2000 սաների համար նախատեսված 3 մարզաբազաներից, որոնցից 2-ը տեղակայված կլինեն մայրաքաղաքում, երրորդը՝ Կոտայքի մարզի Նոր Հաճն համայնքում: Ակադեմիաներն ունենալու են միջազգային բարձր չափանիշներին համապատասխանող ենթակառուցվածքներ, այդ թվում տարբեր չափերի բնական, արհեստական խոտածածկերով մարզադաշտեր՝ գիշերային լուսավորությամբ: Ակադեմիան գործելու է վճարովի եւ անվճար հիմունքներով: Կախված առաջադիմությունից եւ գրանցած արդյունքներից, ակադեմիա հաճախող վճարովի եւ անվճար սաների ցանկը փոփոխվելու է: Մեր ակադեմիայի եվրոպացի տեխնիկական տնօրենի եւ եվրոպացի մասնագետների կողմից սելեկցիա անցած երեխաների համար ակադեմիա հաճախումը լինելու է անվճար՝ մեր ընկերության հաշվին:

Ակադեմիային կից կգործի հյուրանոց-կացարան, որը նախատեսված է լինելու մարզերում ապրող երեխաների համար, որոնք կընտրվեն մարզիչների կողմից:

«Յուվենտուսի» ղեկավարության հետ ունենք պայմանավորվածություն, որ ամեն տարի մեր ակադեմիայի լավագույն սաները մարզումներ են ունենալու Թուրինում՝  «Յուվենտուսի» ակադեմիայում, նաեւ կանցկացնեն ընկերական խաղեր: Առավել ակտիվ եւ լավ արդյունքներ ցուցադրող սաները կընտրվեն «Յուվենտուսի» կողմից եւ կմնան Իտալիայում:

 Ակադեմիաները ներառում են նաեւ ՈւԵՖԱ-ի երկրորդ կատեգորիայի ստանդարտներին համապատասխանող բազմաֆունկցիոնալ մարզադաշտ, մասնագիտացված սպորտային բժշկական եւ վերականգնողական կենտրոն, որտեղ ֆուտբոլիստներից բացի հաճախելու են նաեւ ըմբիշները, ծանրորդները, հեծանվորդները եւ այլն:

Երեւանում կկառուցվի ֆուտբոլային-սպորտային ենթակառուցվածքներով առաջին հյուրանոցը:

Ակադեմիաների, ֆուտբոլային դաշտերի, մարզաբազաների շինարարությունները կավարտվեն հաջորդ տարի: Ակադեմիան իր սաների առաջ դռները կբացի 2026 թ. օգոստոսից, սաների նախագրանցումը կսկսվի 2026 թ. գարնանը:

Վստահեցնում եմ, որ այս ծրագրի իրականացումը նոր դռներ կբացի հայ երեխաների երազանքներն իրականացնելու, այդ թվում, դեպի եվրոպական գրանդ ակումբներ տեղափոխվելու համար: Ապագայում ակադեմիայի սաները կսկսեն համալրել նաեւ հայկական ակումբների շարքերը: Անկասկած մենք կսկսենք տեսնել ակադեմիայի ազդեցությունը մեր ֆուտբոլի տարբեր տարիքային հավաքականների վրա եւս: Պետք է ի հայտ գան նոր Մխիթարյաններ, որի պոտենցիալը ունի մեր ազգը: Լիահույս ենք, որ համատեղ ջանքերով կկարողանանք վերադարձնել հայկական ֆուտբոլի երբեմնի փառքը»,- ասաց Ալֆրեդ Սադոյանը:

«Յուվենտուսի» հայաստանյան ակադեմիաների հիմնադիրի խոսքերից հետո ՀՖՖ նախագահ Արմեն Մելիքբեկյանը գտավ, որ երկար բացատրելու կարիք չկա, թե ինչու է իտալական ակումբի ակադեմիաների հիմնումը կարեւոր հայկական ֆուտբոլի համար:

«Ֆուտբոլի պատմության ուժեղագույն ակումբներից մեկի մուտքը Հայաստան մեզ լուրջ առաջընթաց է խոստանում: Մեզ համար անչափ ուրախալի է, որ վերջին տարիներին ակումբային ֆուտբոլում իրականցվող հիմնային փոփոխությունները, որոնցից կարեւորն այս դաշտի ազատականացումն է եւ համակարգումը, նման նախագծեր է բերում Հայաստան: Ամենակարեւորն այն է, որ այսօրինակ նախագծերը պայմանավորված են նաեւ ենթակառուցվածքներով: Մեր նման երկրներում սա ֆուտբոլի զարգացման նախապայմաններից մեկն է: Անչափ կարեւորում եմ այն փաստը, որ ակադեմիաներից մեկը նախատեսվում է հիմնել մարզում: Վստահ եմ, որ այս նախաձեռնությունը մեծ հաջողություն կբերի հայաստանյան ֆուտբոլին»,- նշեց Արմեն Մելիքբեկյանը:

Լուսինե Շահբազյան