Եվրոպայի չեմպիոններին եւ մեդալակիրներին մեծ շուքով դիմավորեցին «Զվարթնոցում» (ֆոտո, վիդեո)

Երեւանի «Զվարթնոց» օդանավակայանում այս գիշեր դիմավորեցին ծանրամարտի Եվրոպայի չեմպիոններին, մեդալակիրներին, Հայաստանի կանանց եւ տղամարդկանց թիմերին: Ծանրորդները Երեւան ժամանեցին Քիշնեւ-Վիենա-Երեւան  չվերթով կեսգիշերն անց 03:45-ին: 

Չեմպիոններին եւ մեդալակիներին դիմավորելու էին եկել ՀԱՕԿ-ի ներկայացուցիչներ, Եվրոպայի չեմպիոն, արդեն նախկին ծանրորդ Հռիփսիմե Խուրշուդյանը,   Հայաստանի ծանրամարտի ֆեդերացիայի նոր նախագահ, Հայաստանի վարչապետի աշխատակազմի ղեկավար Արայիկ Հարությունյանը, ծանրորդների ծնողները, ընկերներ, երկրպագուներ:

«Զվարթնոցի» օդանավակայանում հավաքված երկրպագուների մեծ մասը դրոշներով, ծաղկեփնջերով, փուչիկներով եւ պաստառներով սպասում էին կանանց հավաքականի անդամներին, մեդալակիրներին:

Ծանրորդներին սպասասրահում դիմավորեցին առանց զուռնա-դհոլի, դափնիների, փոխարենը՝ ծափերով եւ ծաղիկներով, որոնք մարզիկներին հանձնեց ֆեդերացիայի նախագահ Արայիկ Հարությունյանը:

Հիշեցնենք, որ ապրիլի 14-21-ը Մոլդովայի մայրաքաղաք Քիշնեւում անցկացված ծանրամարտի Եվրոպայի առաջնությունում Հայաստանը երկամարտում նվաճեց 10 մեդալ՝ երկու ոսկի, 6 արծաթ եւ երկու բրոնզ:

Հայաստանի հավաքականի կազմում ոսկե մեդալակիրներ դարձան Վարազդատ Լալայանը (450, 210+240) եւ Գարիկ Կարապետյանը (411 կգ, 185 + 226),  արծաթե մեդալներ են նվաճել՝ Ալեքսանդրա Գրիգորյանը (202, 85+117), Գոռ Սահակյանը (338, 153+185), Ռաֆիկ Հարությունյանը (343 կգ, 158+185), Աննա Ամրոյանը (231 կգ, 100+131), Սիմոն Մարտիրոսյանը (406 կգ, 180+225) եւ Լիանա Գյուրջյանը (246 կգ, 106+140):

Բրոնզե մեդալակիրներ են դարձել Գառնիկ Չոլակյանը (275 կգ, 124+151) եւ Դավիթ Հովհաննիսյանը (376 կգ, 173+203):

Տղամարդկանց եւ կանանց Հայաստանի հավաքականներն առանձին թիմային հաշվարկներում գրավել են առաջին տեղը: Ընդհանուր մեդալային հաշվարկում Հայաստանը 3-րդն է։

Լուսինե Շահբազյան