Նոր տարվա հեքիաթ. Մալխաս Ամոյան

NEWS.am Sport-ը ներկայացնում է «Նոր Տարվա հեքիաթ» հարցազրույցների շարք, որտեղ մրցաշրջան-2024-ում մեծ նվաճումներ ունեցած հայկական սպորտի աստղերը պատմում եմ անցնող տարվա ձեռքբերումների, մեծ հաղթանակների, ցավալի ձախողումների, Ամանորի եւ մանկական հիշողությունների մասին:

Շարքի հաջորդ հերոսը Փարիզ-2024-ի բրոնզե մեդալակիր, Եվրոպայի եռակի չեմպիոն, աշխարհի չեմպիոն, հունահռոմեական ոճի ըմբշամարտի Հայաստանի հավաքականի 77 կգ քաշային կարգի առաջատար Մալխաս Ամոյանն է:

Մրցաշրջան-2024-ը Մալխաս Ամոյանի համար եղավ ամենաբարձր նվաճման տարի: 25-ամյա հունահռոմեական ոճի ըմբիշը մարզական կարիերայում առաջին անգամ մասնակցեց Օլիմպիական խաղերի եւ նվաճեց իր առաջին օլիմպիական մեդալը՝ դառնալով բրոնզե մեդալակիր: Օլիմպիական տարում Ամոյանը երրորդ անգամ նվաճեց նաեւ Եվրոպայի չեմպիոնի տիտղոսը: Ազգությամբ եզդի ըմբիշը մեծ հաջողություններ ունեցավ նաեւ ակումբային կարիերայում: Այս հաղթանակների ֆոնին, սակայն, Մալխաս Ամոյանը չընդգրկեց տարվա լավագույն մարզիկների ցանկում, ինչը թեժ քննարկումների տեղիք տվեց հայկական սպորտում:

Փարիզի Օլիմպիական խաղերի բրոնզե մեդալակիր, աշխարհի չեմպիոն, Եվրոպայի եռակի չեմպիոն, աշխարհի Մ23 կրկնակի չեմպիոն Մալխաս Ամոյանը NEWS.am Sport-ի ընթերցողների համար ամփոփել է մեծ նվաճումներով լի 2024-ը եւ պատմել իր Նոր տարվա հեքիաթի մասին:

Մալխաս, ինչպիսի՞ն ստացվեց 2024-ը քեզ համար:

Տարին լավ սկսեցի, դարձա Եվրոպայի առաջնության հաղթող: Տարվա երկրորդ հատվածում Օլիմպիական խաղերի բրոնզե մեդալակիր դարձա: Կարծում եմ՝ նորմալ ստացվեց:  Փարիզում կուզենայի օլիմպիական ոսկե մեդալ նվաճել, բայց բավարարվեցի բրոնզով:

Ինչի՞ համար ես ափսոսում:

Ափսոսալ եւ փոշմանել չստացված ու չնվաճած մեդալների համար, ուշ է: Այս պահին, հավանաբար, օլիմպիական բրոնզի էի արժանի: Գուցե այսքան էի պատրաստվել, այդ պատճառով էլ այս արդյունքը եղավ: Շատ կուզեի մեդալիս գույնը ուրիշ լիներ, նպատակս իրականացնեի, սակայն չստացվեց: Ինձ համար օլիմպիական ոսկե մեդալը չստացված եմ համարում, բայց, միանշանակ, իմ առաջին օլիմպիական մեդալը նվաճեցի եւ այն անփոխարինելի է: Միայն կասեմ, որ բրոնզե մեդալն այն արդյունքը չէր, որի համար գնացել էի:

Ինչո՞վ տպավորվեց քո առաջին Օլիմպիական խաղերը:

Մինչեւ Փարիզ մեկնելս պատկերացնումներս այլ էին Օլիմպիական խաղերի մասին, բայց ամեն ինչ այդպես չէր: Կարծես՝ Եվրոպայի, աշխարհի առաջնությունների մեկնած լինեի: Ինձ ավելի շատ տպավորեց մրցումային օրերին մարզադահլիճում տիրող մթնոլորտը: Շատ հայեր էին եկել մեզ երկրպագելու, ինչը ոգեւորիչ էր: Օլիմպիական խաղերում պատասխանատվությունն է ավելի մեծանում: Հուսամ՝ հաջորդ Օլիմպիական խաղերում արդեն ավելի մեծ փորձով եւ ավելի լավ պատրաստված կլինեմ:

Ո՞րն է տարվա ամենամեծ հաղթանակդ:

Ամենամեծ հաղթանակս Եվրոպայի առաջնության երրորդ ոսկե մեդալն էր: Շատ ուրախ եմ, որ կարողացա երրորդ անգամ նվաճել չեմպիոնի կոչումը: Տարեց տարի ավելի է բարդանում չեմպիոնություն պահելը, ավելի մեծ է դառնում մրցակցությունը: Բոլորը սկսում են պայքարել քո դեմ, մրցակիցներդ ավելի լավ են սկսում ճանաչել քեզ, քո թույլ կողմերը եւ ավելի է բարդանում գոտեմարտելը: Առաջին անգամ Եվրոպայի չեմպիոն դառնալն ավելի հեշտ էր, քան երկրորդ եւ երրորդ անգամ տիտղոսը պահելը: Այս առումով ուրախ եմ, որ 2024-ին էլ կարողացա հաղթող ճանաչվել: Ինձ համար սա մեծ հաղթանակ է:

Իսկ ձախողո՞ւմը:

Չեմ համարում, որ ձախողում ունեցել եմ: Օլիմպիական բրոնզե մեդալը ձախողում չեմ համարում: Այդպես կհամարեի, եթե առանց մեդալ վերադառնայի Օլիմպիական խաղերից: Այդքան պատրաստվեի եւ մեդալ չնվաճեի:

Օլիմպիական բրոնզե մեդալն ի՞նչ փոխեց քո կյանքում:

Իրականում, ոչինչ: Այդ էջն արդեն փակված է ինձ համար: Դրական ազդեցություն  ունեցավ.  փորձ, մոտիվացիա տվեց ու ավելի ուժեղացրեց: Ես այլեւս հետ նայելու  իրավունք չունեմ, պետք է առաջ շարժվել ու պատրաստվել եկող մրցաշարերի, գնալ նոր հաղթանակների ու ավելի բարձր մեդալների հետեւից:

2024-ին կատարված երազանք ունե՞ս:  

Սովորաբար երազանքներ չեմ պահում հսջորդ տարվա համար: Նպատակներ եմ դնում իմ առջեւ եւ փորձում եմ հասնել դրանց: 2024-ում իմ առջեւ նպատակ էի դրել հաղթանակներ ունենալ խոշոր մրցաշարերում եւ մեդալներ նվաճել: Համարում եմ, որ այդ նպատակներս իրականացան Եվրոպայի ոսկե մեդալով եւ Օլիմպիական խաղերի բրոնզե մեդալով:

Ի՞նչ մտքերով ես ճանապարհում տարին:

Օլիմպիական մեծ հիշողություններով, լավ մտքերով ու շնորհակալություններով եմ ճանապարհում: Իմ հաջողությունների ճանապարհին այս տարի էլ օգնել են ծնողներս, հորեղբայրներս, ընկերներս, հայ եւ եզդի ազգը: Ուզում եմ բոլորին շնորհակալություն ասել, որ կողքիս են եղել: Առանձնահատուկ շնորհակալություն նաեւ իմ մարզիչներին, որոնց շնորհիվ ես այս տարի կարողացա երրորդ անգամ Եվրոպայի չեմպիոն դառնալ, առաջին օլիմպիական մեդալը նվաճել եւ շատ այլ հաջողություններ գրանցել սպորտում:

Ի՞նչ նպատակներով ես դիմավորում 2025 թվականը:

Իմ երազանքներն ու նպատակները հիմնականում կապված են սպորտի հետ: Իմ առջեւ խնդիր եմ դրել դառնալ Եվրոպայի քառակի եւ աշխարհի կրկնակի չեմպիոն:

Ինչպե՞ս ես սիրում անցկացնել Ամանորը:

Ինձ համար Նոր տարին ընտանեկան ջերմ տոն է: Սիրում եմ անցկացնել ընտանիքիս անդամների հետ: Մեզ համար առավել հաճելի է, քանի որ տարվա ընթացքում շատ ենք բացակայում, իսկ Ամանորին վերգտնում ենք ընտանեկան ջերմությունը, հարազատների եւ ընկերների հետ ջերմ մթնոլորտում հանդիպումները: Այս ամենը շատ թանկ է ինձ համար:

Եթե հանդիպեիր ձմեռ պապին...

Նրան կասեի, որ միայն մեկ ցանկություն ունեմ. խաղաղություն լինի մեր երկրում:

Ո՞րն է քո Նոր տարվա հեքիաթը:

Իմ Նոր տարվա հեքիաթը ընտանեկան եւ ընկերական ջերմ միջավայրն է, այն մթնոլորտը, որում ապրում ենք տոնական օրերին:

Շնորհավորում եմ հայ եւ եզդի ազգի Ամանորը, թող 2025-ը լինի խաղաղության, սիրո, ջերմության, նոր ու բարձր նվաճումների տարի:

Լուսինե Շահբազյան