Ռինատ Դասաեւ․ Հայաստանում ինձ միշտ հիացրել է ջերմ ընդունելությունն ու հյուրասիրությունը

Հայաստանում միշտ ինձ շատ լավ եմ զգում: Այստեղ ինձ միշտ հիացրել է ջերմ ընդունելությունն ու հյուրասիրությունը: Ժողովուրդը շատ հյուրընկալ է: Այն հյուրասիրությունը, որ դուք ունեք, լավ կլիներ մեր տարածաշրջանի շատ այլ երկրներ էլ ունենային:

Այս մասին NEWS.am Sport-ի թղթակցի հետ զրույցում ասաց ԽՍՀՄ հավաքականի կազմում 1980 թ. Օլիմպիական խաղերի բրոնզե մեդալակիր, 1988 թ. Եվրոպայի առաջնության բրոնզե մեդալակիր, դարպասապահ Ռինատ Դասաեւը:

Օրերս նա Երեւանում էր եւ Ռուսաստանի վետերանների հավաքականի հետ մասնակցեց Լեւոն Ղասաբօղլյանի հիշատակին նվիրված հանդիպմանը Հայաստանի ֆուտբոլային վետերանների թիմի դեմ: Եվրոպայի առաջնության բրոնզե մեդալակիրը միայն առաջին խաղակեսին մասնակցեց, երկրորդ խաղակեսը հետեւեց պահեստայինների նստարանից: Նրա խոսքով, տարիքն արդեն թույլ չի տալիս ամբողջական խաղաժամանակ անցկացնել, բայց խաղադաշտ դուրս էր եկել մեծ կարոտով: Հայաստան - Ռուսաստան վետերանների մրցախաղն ավարտվեց ռուսների հաղթանակով 4:2 հաշվով:

Պարոն Դասաեւ, ի՞նչ տպավորություններ ունեք երեւանյան խաղից:

Հետաքրքիր հանդիպում, խաղ, միջոցառում ստացվեց Երեւանում: Բոլորը մեծ հաճույք ստացան այս խաղից: Կարծում եմ՝ խաղը ստացվեց, մարզադաշտ եկած երկրպագուներին էլ դուր եկավ վետերանների մրցապայքարը: Գուցե, մեր հավաքականում շատերի տարիքն արդեն չի ներում լիարժեք խաղ անցկացնել, ինքս էլ այլեւս այն ֆիզիկական տվյալները չունեմ, որ լիարժեք խաղաժամանակ անցկացնեմ: Մեր թիմը գուցե զիջում է հայ վետերանների տարիքով, բայց վստահ կարող եմ ասել, որ տեխնիկան պահպանված է: Զիջում էինք նաեւ արագությամբ, բայց փոխանցումները, ընդհանուր խաղը, կարծում եմ, շատ լավ ստացվեց: Ես խաղացի միայն առաջին խաղակեսում:

Կարոտե՞լ էիք խաղադաշտը:

Կարոտել էի ու միշտ կարոտում եմ: Փորձում եմ մշտապես զբաղվել: Ինձ համար ֆուտբոլը կյանք է: Շարունակելու եմ դուրս գալ խաղադաշտ, խաղալ ֆուտբոլ, մարզվել, քանի դեռ ապրում եմ:

Հայկական ֆուտբոլին հետեւո՞ւմ եք:

Հայկական ֆուտբոլին քիչ եմ հետեւում, քանի որ մեզ մոտ շատ չի ցուցադրվում: Այստեղ է աշխատում մեր ընկեր, Երեւանի «Ուրարտուի» գլխավոր մարզիչ Դմիտրի Գունկոն, որի միջոցով հնարավորինս տեղեկանում եմ հայկական ֆուտբոլի մասին: Մենք մշտապես հեռախոսային կապի մեջ ենք, ինձ պատմում է Հայաստանի առաջնության մասին: Հետաքրքրվում եմ:

Նախորդ անգամ ե՞րբ էիք եղել Հայաստանում:

9 տարի առաջ այստեղ մեծ շուքով նշվեց Խորեն Հովհաննիսյանի 60-ամյակը: Բոլորով ժամանել էինք Հայաստան, այդ ժամանակ նույնպես ընկերական խաղ անցկացրինք: Շատ լավ ժամանակ անցկացրինք, ջերմ մթնոլորտ էր, բոլոր հին ընկերներն այստեղ էին: Հետաքրքիր հանդիպումներ, զրույցներ, հիշողություններ ունեցանք: Ու դեռ շատ կլինեն այդպիսի հանդիպումները հին ընկերների հետ, շատ կհիշենք մեր համատեղ ֆուտբոլային կյանքը, որն ապրել ենք, ունեցել ենք: Ինձ համար այդ ամենը շատ թանկ է:

Ի՞նչն է Ձեզ ամենաշատը տպավորում կամ տպավորել Հայաստանում:

Հայաստանում միշտ ինձ շատ լավ եմ զգում: Այստեղ ինձ միշտ հիացրել է ջերմ ընդունելությունն ու հյուրասիրությունը: Ժողովուրդը շատ հյուրընկալ է: Այն հյուրասիրությունը, որ դուք ունեք, լավ կլիներ մեր տարածաշրջանի շատ այլ երկրներ էլ ունենային:

Լուսինե Շահբազյան