Կարեն Աղամալյան․ Եվրոպայի առաջնությունից մեդալային ակնկալիքներ ունենք

Օլիմպիական խաղերից հետո նոր ուժով եւ տրամադրվածությամբ ենք մեկնարկել: Եվրոպայի առաջնությունից մեդալային ակնկալիքներ ունենք: Ուժեղ կազմով ենք մասնակցում:

Այս մասին NEWS.am Sport-ի թղթակցի հետ զրույցում Բուլղարիայից ասաց բռնցքամարտի տղամարդկանց Հայաստանի հավաքականի գլխավոր մարզիչ Կարեն Աղամալյանը:

Հոկտեմբերի 12-ին Բուլղարիայի մայրաքաղաք Սոֆիայում կմեկնարկի բռնցքամարտի Եվրոպայի մինչեւ 23 տարեկանների առաջնությունը, որին Հայաստանը մասնակցում է 17 բռնցքամարտիկով:

Տղամարդկանց պայքարում կմասնակցեն՝ Հովհաննես Հարությունյանը (48 կգ), Ռուդոլֆ Գարբոյանը (51 կգ), Դավիթ Եգորյանը (54 կգ), Ռուսլան Ասլիկյանը (57 կգ), Արթուր Սահակյանը (60 կգ), Մանվել Պետրոսյանը (63, 5 կգ), Հարություն Հակոբկոխյանը (67 կգ), Նարեկ Զախարյանը (71 կգ), Գարիկ Անտանոսյանը (75 կգ), Համլետ Ադամյանը (80 կգ), Հենրիկ Ճղրիկյանը (92 կգ):

Կանանց պայքարում կլինեն Լուսինե Գեւորգյանը (48 կգ), Արեւիկ Դոխոլյանը (52  կգ),  Աննա Զուռնաչյանը (54 կգ), Ջուլյա Լալայանը (57 կգ), Էլիդա Քոչարյանը (60 կգ), Սոնա Հարությունյանը (63 կգ):

«Մեծ կազմով ենք մասնակցում Եվրոպայի առաջնությանը: Սպասելիքները մեդալային են: Թիմն առաջնությանը լավ է պատրաստվել, տղամարդկանց եւ կանանց թիմերը լավ մարզավիճակում են: 

Երկու մարզումային փուլով ենք անցել Աբովյանի մարզաբազայում եւ Երեւանի Օլիմպավանում: Կազմն ընտրել եմ ըստ բռնցքամարտիկների արդյունքների: Իրենց քաշային կարգերում ուժեղներն են ընդգրկվել կազմ: Նույնը կասեմ նաեւ աղջիկների մասին: Նրանց վերջին արդյունքներով է որոշվել, թե ով է մասնակցելու Եվրոպայի առաջնությանը:

Թիմում չկա թույլ բռնցքամարտիկ, որը եկել է ուժեղի փոխարեն: Այնպես որ, մեդալների ակնկալինքեր ունենք տղաներից եւ աղջիկներից: Ընդհանուր 33 երկիր է մասնակցում, մեծ մրցակցություն է սպասվում: Այստեղ բոլորն էլ եկել են մեդալ նվաճելու նպատակով: Երիտասարդներ են, մեդալի կռիվ են տալու: Չգուշակենք, թե մենք ինչ մեդալների հավակնություններ ունենք, կփորձենք անել առավելագույնը: Հուսով ենք, որ շատ լավ կլինի:

Այս շրջանը կարեւորներից է մեզ համար: Օլիմպիական խաղերից հետո նոր ուժով եւ տրամադրվածությամբ ենք մեկնարկել: Բնական է, որ ընթացքում հավաքականի կազմը փոխվելու է: Հետօլիմպիական շրջանը բարդ չենք անցել: Հուսանք՝ ամեն ինչ լավ կլինի»,- ասաց Կարեն Աղամալյանը:

Այսօր տեղի է ունենալու քաշային կարգերի վիճականահանությունը: Մ23 Եվրոպայի առաջնությունը կավարտվի հոկտեմբերի 21-ին:

Լուսինե Շահբազյան