Փարիզ-2024. Անդրանիկ Կարապետյանի նախնական հայտը երկամարտում 380 կգ է

16:10   9 օգոստոսի, 2024

Փարիզում անցկացվող 33-րդ ամառային Օլիմպիական խաղերում այսօր պայքարն է սկսում ծանրամարտի Հայաստանի թիմը։ Օգոստոսի 9-ին Փաշիկ Ալավերդյանի գլխավորած հավաքականից մրցահարթակ դուրս կգա աշխարհի բրոնզե մեդալակիր, Եվրոպայի չեմպիոն, ռեկորդակիր Անդրանիկ Կարապետյանը (89 կգ):

89 կգ քաշայինների պայքարում տիտղոսի եւ օլիմպիական մեդալների համար կպայքարի 12 ծանրորդ: Անդրանիկ Կարապետյանի երկամարտի նախնական հայտը 380 կգ է: Նույնքան հայտով է ներկայացել եւս երեք ծանրորդ: Այս քաշային կարգի ֆավորիտը աշխարհի չեմպիոն, Եվրոպայի կրկնակի չեմպիոն, Բուլղարիան ներկայացնող Կարլոս Նասարն է: Նրա նախնական հայտը երկամարտում 390 կգ է:

385 կգ հայտ է ներկայացրել աշխարհի բրոնզե մեդալակիր, Եվրոպայի կրկնակի բրոնզե մեդալակիր, մոլդովացի Մարին Ռոբուն:

385 կգ հայտով է ներկայացել նաեւ Տոկիոյի Օլիմպիական խաղերի բրոնզե մեդալակիր, աշխարհի բրոնզե մեդալակիր, Եվրոպայի եռակի չեմպիոն Անտոնինո Պիցոլատոն:

Անդրանիկ Կարապետյանը 2024 թ. Եվրոպայի առաջնությունում 5-րդ-ն էր 365 կգ արդյունքով (170+195):

2023 թ. Երեւանում անցկացված Եվրոպայի առաջնությունում Կարապետյանը երկամարտի 374 կգ արդյունքով նվաճեց արծաթե մեդալ (178+196): Պոկում վարժությունում Կարապետյանը 178 կգ-ով սահմանեց մեծահասակների Եվրոպայի ռեկորդ եւ արժանացավ փոքր ոսկե մեդալի:

Նույն տարվա սեպտեմբերին Սաուդյան Արաբիայի մայրաքաղաք Էր Ռիյադում անցկացված  աշխարհի առաջնությունում Կարապետյանը երկամարտի 377 կգ արդյունքով 4-րդ էր 89 կգ քաշայինների պայքարում (175+202): Հրում վարժությունում հայ ծանրորդն արժանացել էր փոքր ոսկե մեդալի:

Անդրանիկ Կարապետյանի մասնակցությամբ ծանրամարտի օլիմպիական մրցաշարի 89 կգ քաշայինների պայքարը կմեկնարկի Երեւանի ժամանակով 17:00-ին:

Ծանրամարտի օլիմպիական մրցաշարն անցկացվում է  «Հարավային Փարիզ 6» մարզապալատում (South Paris Arena 6)



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.