Փարիզ-2024. Արթուր Ալեքսանյանն այսօր կպայքարի օլիմպիական երկրորդ տիտղոսի համար, Հայաստանն ունի եւս 3 մասնակից
09:04 7 օգոստոսի, 2024Փարիզում անցկացվող 33-րդ ամառային Օլիմպիական խաղերում օգոստոսի 7-ին Հայաստանի օլիմպիական հավաքականը կունենա 4 մասնակից:
Հունահռոմեական ոճի ըմբշամարտի օլիմպիական մրցաշարում պայքարը կսկսի աշխարհի բրոնզե մեդալակիր, Եվրոպայի կրկնակի բրոնզե մեդալակիր 67 կգ քաշային Սլավիկ Գալստյանը:
Մեկնարկային 1/8 եզրափակիչում Գալստյանի մրցակիցը կլինի Պանամերիկյան խաղերի կրկնակի չեմպիոն, Պանամերիկյան առաջնության եռակի հաղթող, Էկվադորի ներկայացուցիչ Անդրես Ռոբերտո Մոնտանյո Արոյոն:
Սլավիկ Գալստյանի մասնակցությամբ 1/8 եզրափակիչ գոտեմարտը տեղի կունենա Երեւանի ժամանակով 13:00-ից A մրցագորգում:
Նույն ժամին աթլետիկայի օլիմպիական մրցաշարում վազքուղի դուրս կգա Փարիզ-2024-ում Հայաստանի միակ աթլետ Երվանդ Մկրտչյանը:
Նա կմասնակցի 800 մետ վազք մրցաձեւի որակավորման փուլին: Մեկնարկը նախատեսված է 13:55-ին:
Երեկոյան մրցահերթում Արթուր Ալեքսանյանը եւ Մալխաս Ամոյանը կպայքարեն օլիմպիական մեդալների համար:
Հունահռոմեական ոճի ըմբշամարտի օլիմպիական մրցաշարում բրոնզե մեդալի գոտեմարտ կանցկացնի աշխարհի չեմպիոն, Եվրոպայի եռակի չեմպիոն Մալխաս Ամոյանը (77 կգ):
Նրա մրցակիցը հայտնի կդառնա այս քաշային կարգի սփոփիչ գոտեմարտերից հետո:
Մալխաս Ամոյանի մասնակցությամբ բրոնզե մեդալի գոտեմարտը նախատեսված է Երեւանի ժամանակով 20:15-ից եւ կլինի 7-րդ գոտեմարտը մրցագորգ B-ում:
Մալխաս Ամոյանից հետո եզրափակիչ գոտեմարտ կանցկացնի Արթուր Ալեքսանյանը, որը կպայքարի օլիմպիական երկրորդ չեմպիոնության համար:
Օլիմպիական խաղերի ոսկե, արծաթե, բրոնզե մեդալակիր, աշխարհի քառակի, Եվրոպայի 7-ակի չեմպիոնը Փարիզի Օլիմպիական խաղերի ոսկե մեդալը կվիճարկի Տոկիոյի Օլիմպիական խաղերի բրոնզե մեդալակիր, աշխարհի չեմպիոն, կրկնակի բրոնզե մեդալակիր, Ասիական խաղերի չեմպիոն, Ասիայի առաջնության չեմպիոն, Իրանի ներկայացուցիչ Մոհամադհադի Սարավիի հետ:
Արթուր Ալեքսանյանի մասնակցությամբ եզրափակիչը նախատեսված է Երեւանի ժամանակով 22:05-ից եւ կլինի 12-րդ գոտեմարտը B մրցագորգում:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.