Հակոբ Սերոբյան․ Կուզեի, որ ոսկե մեդալ նվաճեինք, բայց բոլորս էլ տեսանք, թե ինչ կատարվեց Փարիզում
01:28 7 օգոստոսի, 2024Կուզեի, որ ոսկե մեդալ նվաճեինք, բայց բոլորս էլ տեսանք, թե ինչ կատարվեց Փարիզում։ Ամեն ինչ ստացվեց շատ լավ:
Այս մասին NEWS.am Sport-ի թղթակցի հետ զրույցում ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը, որը օլիմպիական փոխչեմպիոն Արթուր Դավթյանի եւ իր գլխավորած թիմի հետ օգոստոսի 6-ին վերադարձավ հայրենիք:
«Շատ ուրախ եմ այն արդյունքի համար, որը ցույց տվեցին իմ տղաները: Կուզեի, որ ոսկե մեդալ նվաճեինք, բայց բոլորս էլ տեսանք, թե ինչ կատարվեց Փարիզում: Մրցակցությունը շատ մեծ էր: Գոհ եմ Արթուր Դավթյանի արդյունքից: Եզրափակիչում նա ամենավերջինը մասնակցեց: Իրականում, բարդ է, երբ ամենավերջինն ես: Նյարդային համակարգն էլ տիրապետելը շատ բարդ է: Նյարդերի պայքար է:
Ֆիլիպինցի մարմնամարզիկին, որը դարձավ օլիմպիական չեմպիոն, Արթուրը հաղթել էր աշխարհ գավաթի խաղարկության վերջին փուլում: Այստեղ էլ կարող էր, եթե երկու ցատկերի վերջնամասում լիարժեք մաքուր կանգներ, քայլ չաներ: Արթուրն իր ցատկերը լավ կատարեց, բայց վերջին քայլերն ավելորդ էին:
Վահագն Դավթյանն իր ամենալավ կատարումներն արեց Փարիզում: Երկուսն էլ վնասվածքներ ունեին, բայց մրցելույթի օրը մոռացել էին ամեն ինչ եւ բարձրացել մրցահարթակ: Ամեն ինչ ստացվեց շատ լավ»,- ասաց Հակոբ Սերոբյանը:
Փարիզի Օլիմպիական խաղերում Հակոբ Սերոբյանը մրցավարական հանձնաժողովում էր:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.