Փարիզ-2024․ Մալխաս Ամոյանը պարտվեց կիսաեզրափակիչում
20:27 6 օգոստոսի, 2024Աշխարհի չեմպիոն, Եվրոպայի եռակի չեմպիոն Մալխաս Ամոյանը չհաղթահարեց կիսաեզրափակիչի արգելքը եւ կպայքարի բրոնզե մեդալի համար Փարիզի Խաղերում:
33-րդ ամառային Օլիմպիական խաղերում հունահռոմեական ոճի ըմբշամարտի օլիմպիական մրցաշարի 77 կգ քաշայինների կիսաեզրափակիչում Մալխաս Ամոյանը գոտեմարտեց աշխարհի առաջնության բրոնզե մեդալակիր, Ասիայի չեմպիոն, ճապոնացի Նաո Կուսակայի հետ եւ պարտվեց 1:3 հաշվով:
Առաջին մրցափուլում Մալխաս Ամոյանը գրագետ մարտավարությամբ առավելություն ունեցավ: Նախ գորգի մրցավարը պասիվություն տվեց Ամոյանին եւ վերեւից աշխատելու հնարավորություն տվեց Կուսակային, բայց ճապոնացի մրցակիցը չկարողացավ միավոր վաստակել: Ամոյանը մեկ միավոր վաստակեց՝ մրցակցին աշխատանքային գոտուց հանելով: Մրցափուլն ավարտվեց 1:1 հաշվով՝ Ամոյանի առավելությամբ:
Երկրորդ մրցափուլի մեկնարկում Կուսական 2-միավորանոց հնարքով առաջ անցավ հաշվի մեջ: Մալխաս Ամոյանը չկարողացավ մինչեւ գոտեմարտի ավարտը առաջ անցնել հաշվի մեջ:
Գոտեմարտն ավարտվեց 3:1 հաշվով Կուսակայի հաղթանակով:
Մալխաս Ամոյանն ու Նաո Կուսական հանդիպել էին 2022 թ. աշխարհի Մ23 առաջնության կիսաեզրափակիչում, որտեղ Ամոյանը հաղթել է 9:5 հաշվով:
Եվրոպայի եռակի չեմպիոնն իր առաջին Օլիմպիական խաղերում պայքարը սկսել է 1/8 եզրափակիչից, որտեղ 8:0 հաշվով վստահ հաղթանակ է տարել 2021 թ. երիտասարդների Եվրոպայի չեմպիոն, 2022 թ. Մ20 Եվրոպայի փոխչեմպիոն, 2023 թ. Մ23 Եվրոպայի չեմպիոն Ֆինլանդիայի ներկայացուցիչ Ջոնի Կունարի Սարկկինենի նկատմամբ:
Քառորդ եզրափակիչում Ամոյանը 3:0 հաշվով պարտության էր մատնել Ասիական խաղերի փոխչեմպիոն, Ասիայի չեմպիոն Իրանի ներկայացուցիչ Ամին Կավիանինեժադին:
Մալխաս Ամոյանը մասնակցում է իր առաջին Օլիմպիական խաղերին:
Մալխաս Ամոյանի մասնակցությամբ բրոնզե մեդալի համար գոտեմարտ տեղի կունենա օգոստոսի 7-ին, Երեւանի ժամանակով 20:15-ից:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.