Փարիզ-2024. Արթուր Ալեքսանյանի եւ Մալխաս Ամոյանի մրցակիցները կիսաեզրափակիչում
15:58 6 օգոստոսի, 2024Երեկոյան Երեւանի ժամանակով 20:15-ից Փարիզի «Champ-de-Mars» մարզապալատում կմեկնարկի Փարիզ-2024-ի Օլիմպիական խաղերի հունահռոմեական ոճի ըմբշամարտի կիսաեզրափակիչները:
Եզրափակիչի ուղեգրերի համար Հայաստանից կպայքարեն Արթուր Ալեքսանյանը (97 կգ) եւ Մալխաս Ամոյանը (77 կգ):
Օլիմպիական խաղերի ոսկե, արծաթե եւ բրոնզե մեդալակիր, աշխարհի քառակի, Եվրոպայի 7-ակի չեմպիոն Արթուր Ալեքսանյանը կիսաեզրափակիչում կգոտեմարտի աշխարհի չեմպիոն, Պանամերիկյան խաղերի չեմպիոն, Պանամերիկյան առաջնության հաղթող, կուբացի Գաբրիել Ալեխանդրո Ռոսիլյո Կինդելանի հետ:
Արթուր Ալեքսանյանն ու Գաբրիել Կինդելանը նախորդ անգամ մրցագորգում հանդիպել են 2023 թվականին Բելգրադում անցկացված աշխարհի առաջնության եզրափակիչում, որտեղ օլիմպիական չեմպիոնը պարտվել է 3:3 հաշվով՝ կուբացու առավելությամբ: Աշխարհի առաջնության եզրափակիչ գոտեմարտի վերջին վայրկյաններին 3:1 հաղթելիս, կուբացի ըմբիշը երկու միավորանոց հնարքով հավասարեցրել էր հաշիվը:
Փարիզի մրցագորգում Արթուր Ալեքսանյանը երկու հաղթանակ է տարել: 1/8 եզրափակիչում 9:0 հաշվով ժամանակից շուտ հաղթլ է Կորեայի ներկայացուցիչ Սինջուն Կիմին, քառորդ եզրափակիչում, գերլարված պայքարում 9:5 հաշվով առավելության է հասել Ուզբեկստանի ներկայացուցիչ Ռուստամ Ասակալովի նկատմամբ:
Աշխարհի չեմպիոն, Եվրոպայի եռակի չեմպիոն Մալխաս Ամոյանը 77 կգ քաշայինների կիսաեզրափակիչում կմրցի աշխարհի առաջնության բրոնզե մեդալակիր, Ասիայի չեմպիոն ճապոնացի Նաո Կուսակայի հետ:
Մալխաս Ամոյանն ու Նաո Կուսական հանդիպել են 2022 թ. աշխարհի Մ23 առաջնության կիսաեզրափակիչում, որտեղ Ամոյանը հաղթել է 9:5 հաշվով:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.