Հարություն Մերդինյան․ Որոշել էի, որ այս առաջնությունով ավարտելու եմ կարիերաս (տեսանյութ)
16:09 29 ապրիլի, 2024Որոշել էի՝ Եվրոպայի առաջնությունում լավ մասնակցության դեպքում, ավարտել մարզական կարիերան: Այժմ, երբ վատ հանդես եկա, դեռ մտածում եմ: Մի քանի ամիս վնասվածքներս կբուժեմ: Եթե լինեմ լավ մարզավիճակում, հավաքականի գլխավոր մարզիչին կխնդրեմ նորից պայքարել:
Այս մասին լրագրողների հետ զրույցում Ռիմինում ասաց աշխարհի կրկնակի բրոնզե մեդալակիր, Եվրոպայի կրկնակի չեմպիոն Հարություն Մերդինյանը:
39-ամյա Մերդինյանը Եվրոպայի առաջնությունում նժույգ թափեր վարժության որակավորման փուլի արգելքը չհաղթահարեց: Նրա մրցելույթից հետո գլխավոր մարզիչ Հակոբ Սերոբյանը NEWS.am Sport-ի թղթակցի հետ զրույցում նշեց, որ Հարություն Մերդինյանը կավարտի մարզական կարիերան: Հարություն Մերդինյանը դեռ չի շտապում մրցահարթակից հեռանալ:
«Եվրոպայի առաջնությունում վատ մասնակցեցի: Առաջին օրը վերջնամասում սխալվեցի եւ զրկվեցի եզրափակիչ մտնելու, մեդալի համար պայքարելու հնարավորությունից: Լավ պատրաստ էի, ափսոս էր ուղղակի: Դոհայում աշխարհի գավաթում, ընդհամենը մի քանի օր առաջ լավ կատարեցի վարժությունս, վատ գնահատական չէի ստացել: Այստեղ ուղղակի չստացվեց:
Իմ մարզական կարիերաս ավարտելու պատճառն այն է, որ ցավերս են շատ: Մարզավիճակս լավ է, բայց ցավեր ունեմ ուսի, դաստակի հատվածներում: Մարզավիճակս լավն էր, չհաշված ցավերը: Այստեղ ուղղակի մի փոքր սխալվեցի ու զրկվեցի հետագա պայքարից:
Ինչ վերաբերում է կարիերաս ավարտելուն, այս պահին արդեն մտածում եմ դադար վերցնելու մասին: Անկեղծ կլինեմ, որոշել էի, որ այս առաջնությունով ավարտելու եմ: Հնարավոր է՝ այնպես լինի, վնասվածքներս, ընդհանուր վիճակս լավ լինի, հավաքականի մարզիչին խնդրեմ, նորից պայքարեմ: Նժույգ թափերում դեռ նոր փոփոխություններ պետք է լինեն, սա էլ եմ հաշվի առնում:
Տրամադրված էի որպես վերջին մրցաշար, Եվրոպայի առաջնությունում լավ մասնակցեի, կարողանայի անել այն, ինչ ինձ մոտ լավ է ստացվում, այդ դեպքում որոշել էի, որ երեւի կավարտեմ: Դեռ ժամանակ կա: Մինչեւ հաջորդ տարվա մրցումները, աշխարհի գավաթներ, Եվրոպայի առաջնությանը սկսելու ժամանակ կա: Կվերականգնվեմ, կհասկանանք՝ ինչի եմ ընդունակ, նոր փոփոխված տարրերի հետ կապված կկարողանամ վարժությունս ճիշտ գրագետ կազմել, թե ոչ, հետո նոր, ըստ այդմ որոշում կկայացնեմ՝ մոտենալ հավաքականի մարզիչին, թե ոչ:
Ներքին կռիվ չկա: Խնդիրն այն է, որ ինձ մոտ շատ դժվար է ստացվում մարզավիճակի մեջ մտնելը: Երբ մարզավիճակի մեջ եմ լինում, կարողանում եմ մինչեւ վերջ, մաքուր պայքարել՝ լինի մրցումներին, թե մարզումներին»,- ասաց Հարություն Մերդինյանը:
Եվրոպայի կրկնակի չեմպիոնը Ռիմինիում նժույգ թափերի որակավորման փուլում վաստակել էր 13.900 միավոր:
Լուսինե Շահբազյան
NEWS.am Sport-ը սպորտային մարմնամարզության Եվրոպայի առաջնությունն Իտալիայից լուսաբանում է Յունիբանկի աջակցությամբ:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.