Հակոբ Սերոբյան․ Վստահ եմ, որ Փարիզում մեր աշխատանքով, քրտինքով կհասնենք բարձր արդյունքի

Եվրոպայի արծաթե մեդալը շատ լավ արդյունք է, բայց մեզ այն արդեն, կարծես, չի ուրախացնում, քանի որ ինչքան լավ է լինում, այնքան ուզում ենք ավելի լավ լինի: Պետք է շատ աշխատենք, մեր քրտինքով Փարիզի Օլիմպիական խաղերում Արթուրը բարձր գնահատականներ կստանա եւ լավ արդյունք կգրանցի:

Այս մասին Ռիմինիում ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը:

Իտալիայի Ռիմինի քաղաքում ավարտին մոտեցող Եվրոպայի առաջնությունում Հայաստանի մեծահասակների հավաքականը պայքարն ավարտեց մեկ մեդալով: Հենացատկի վարժությունում արծաթե մեդալակիր դարձավ Արթուր Դավթյանը, որը չեմպիոնի կոչումը նվաճած բրիտանացի Ջեյք Ջերմեյնին զիջեց 0,33 միավորով:

Հավաքականի գլխավոր մարզիչ Հակոբ Սերոբյանն ամփոփել է Արթուր Դավթյանի արդյունքներն ու Եվրոպայի առաջնությունը:

«Եվրոպայի առաջնությունում տղաների մրցելույթներից գոհ եմ: Ինչքան լավ է լինում, այնքան ուզում ենք ավելի լավ լինի: Այս Եվրոպայի առաջնությունը տարբերվում էր մյուսներից մեզ համար նրանով, որ մոտեցանք մի քիչ ավելի թուլացած: Դոհայում մեր գերագույն խնդիրը կատարել էինք, այստեղ ավելի հանգիստ էինք եկել: Առաջին օրը, մասնավորապես,  բոլորիս մոտ այնպիսի մի զգացողություն էր, որ Եվրոպայի առաջնությանն այդքան էլ կարեւորություն չէինք տալիս: Հաջորդ օրվանից արդեն մի քիչ հավաքվեցինք:

Մեզ այսօր շատ ուրախացրեցին երիտասարդները: Մեծահասակներից Արթուր Ավետիսյանը շատ լավ հանդես եկավ, շատ լավ կատարեց իր վարժությունը օղակների վրա: Ես տեսնում եմ, որ նա բարդացրել է իր վարժությունը եւ արդեն կարողանում է անել: Հետո արդեն ավելի լավ կկատարի: Արթուր Դավթյանի արդյունքն էր ինձ համար ափսոս: Խնդիր կար: Ցանկացած դեպքում մեզ համար երկրորդ տեղն արդեն ուրախալի չի: Իրականում շատ լավ արդյունք է արծաթե մեդալը: Նորմալ է: Այսպիսի մի բան կասեմ՝ Աստված պահում է, որ Օլիմպիական խաղերում Արթուրը գերազանց անի ցատկերը: Այսօր նա երկրորդ ցատկը լավ չկատարեց, բայց դա նրա ամենաուժեղ ցատկն է, որը գերազանց տիրապետում է: Դա այն ցատկն է, որը բոլորը սպասում են: Անգամ մի տեղ կարդացի, այդ ցատկի հետ կապված կատակել էին՝ «Դավթյան ավիաուղիներ», այնքան լավ է ցատկում:

Ընդհանուր առմամբ լավ է: Ունենք մեդալային հավաքածու՝ ոսկի, արծաթ, բրոնզ: Ամենակարեւորն այն է, որ ունենք օլիմպիական ուղեգիր: Վերջապես այս բարդ շրջանից՝ Դոհայից, Ռիմինիից հետո գնում ենք տուն: Շատ լարված է անցել մեզ համար աշխարհի գավաթի խաղարկությունը, այստեղ նույնպես: Շնորհակալ ենք բոլորին մեզ օգնելու համար:

Շեշտեմ, որ Եվրոպայի առաջնությունում բոլորն ունեին վնասվածքներ: Արթուր Ավետիսյանը ուսի լուրջ վնասվածք ունի, Դավթյան Արթուր այլեւս չի ասում իր վնասվածքների մասին, պատճառաբանություն չի բռնում: Նա չեմպիոնի հոգեբանություն ունի: Ամեն ինչ նորմալ է: Առաջ չընկնենք, առջեւում Օլիմպիական խաղերն են: Ինչ արդյունք էլ լինի, ինձ համար ցանկացած մեդալ, մեդալ է: Իմ խնդիրն է այժմ, առանց վնասվածք հասնել մինչեւ Օլիմպիական խաղեր, Փարիզում կատարի այն, ինչ կարողանում է: Հուսով եմ, որ շատ լավ գնահատականներ կստանա: Օրինակ այսօր չեմպիոնին զիջեց 0,33 միավորով, բայց հաշվի չենք առնում, որ նրա մրցակիցը աշխարհի գործող չեմպիոնն էր: Վստահ եմ, որ մեր աշխատանքով, քրտինքով կհասնենք բարձր արդյունքի»,- ասաց Հակոբ Սերոբյանը:

Հայաստանի մեծահասակների հավաքականն ավարտեց պայքարը Եվրոպայի առաջնությունում 1 մեդալով: Արծաթե մեդալակիր դարձավ Արթուր Դավթյանը: Ապրիլի 27-ին երիտասարդական հավաքականից ոսկե մեդալակիր դարձավ Համլետ Մանուկյանը, բրոնզե մեդալակիր՝ Մամիկոն Խաչատրյանը: Երիտասարդական հավաքականից պայքարի մեջ է մնացել Ռոբերը Գյուլումյանը, որը ապրիլի 28-ին կմրցի բազմամարտի եզրափակիչում:

Լուսինե Շահբազյան

NEWS.am Sport-ը սպորտային մարմնամարզության Եվրոպայի առաջնությունն Իտալիայից լուսաբանում է Յունիբանկի աջակցությամբ: