Հակոբ Սերոբյանը՝ Ռիմինիից․ Շատ ուրախ եմ, հպարտ եմ, գոհ եմ երիտասարդների աշխատանքից (տեսանյութ)
16:46 27 ապրիլի, 2024Շատ ուրախ եմ, հպարտ եմ, գոհ եմ երիտասարդների աշխատանքից: Նրանք ցույց տվեցին, թե ինչպես պետք է աշխատել: Իմ կարծիքով այս տղաները մեծահասակներում լուրջ տոն են տալու:
Այս մասին Ռիմինիում Համլետ Մանուկյանի եւ Մամիկոն Խաչատրյանի նվաճած մեդալներից հետո ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը, փոխանցում է NEWS.am Sport-ի թղթակիցը:
Իտալիայի Ռիմինի քաղաքում անցկացվող սպորտային մարմնամարզության Եվրոպայի առաջնությունում 16-ամյա Համլետ Մանուկյանը նժույգ թափեր վարժությունում հռչակվեց չեմպիոն, Մամիկոն Խաչատրյանը նվաճեց բրոնզե մեդալ:
«Շատ գոհ եմ տղաների աշխատանքից: Բարձր արդյունք ակնկալում էի, բայց վնասվածքի հետ կապված մտահոգություն ունեի: Ինքս թույլ չտվեցի Մամիկոնին բոլոր գործիքներն անի, բայց ափսոսում եմ, որ վասնածքը մեզ խանգարեց: Կարող էինք բազմամարտում էլ մեդալ նվաճել, թիմին կարող էր օգտակար լինել: Ամեն դեպքում կարիք չկար ռիսկի գնալ: Որոշեցինք, որ միայն նժույգ անի:
Շատ լավ, մաքուր կատարեց վարժությունը: Հրաշալի արդյունք գրանցեց եւ արժանի գնահատական ստացավ: Համլետ Մանուկյանը շատ մաքուր կատարեց իր վարժությունն ի տարբերություն Գագիկ Խաչիկյանի նախորդ օրվա մրցելույթի: Նա մեծահասակ է, զարմացած եմ ուղղակի Խաչիկյանի կատարման ժամանակ: Այդ ամենի հետեւանքը հետո կտեսնենք։
Ինչ վերաբերում է երիտասարդներին, նրանք բոլորը գերազանց աշխատեցին Եվրոպայի առաջնությունում, նրանց ցույց տվեցինք, թե ինչպես պետք է անել: Շատ ուրախ եմ, հպարտ եմ, գոհ եմ, որովհետեւ այս երեխաները իմ տղաների սաներն են, այսինքն իմ թոռներն են: Նրանց մարզիչներն իմ սաներն են:
Վստահ էի, որ Համլետը կհաղթի, բայց նրա ուսի խնդիրը շատ լուրջ է: Մի որոշ ժամանակ նրան հանգիստ կտանք, հասունացման տարիքն է, որ որեւէ լուրջ հետեւանք չունենա: Հաջորդ Եվրոպայի առաջնությունում Համլետ Մանուկյանը, Մամիկոն Խաչատրյանը կլինեն արդեն մեծահասակներում: Իմ կարծիքով այս տղաները մեծահասակներում լուրջ տոն են տալու»,- ասաց Հակոբ Սերոբյանը։
Լուսինե Շահբազյան
NEWS.am Sport-ը սպորտային մարմնամարզության Եվրոպայի առաջնությունն Իտալիայից լուսաբանում է Յունիբանկի աջակցությամբ:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.