Աշխարհի գավաթ. Գարիկ Կարապետյանը արծաթե մեդալակիր, Սամվել Գասպարյանը հրաժարվեց պայքարից (ֆոտո)

Թաիլանդի Պհուկետ քաղաքում անցկացվող ծանրամարտի աշխարհի գավաթի խաղարկությունում 102 կգ քաշայինների պայքարում Եվրոպայի չեմպիոն Գարիկ Կարապետյանը արծաթե մեդալ նվաճեց: Երկամարտում Հայաստանի ներկայացուցիչը գրանցեց 401 կգ (185+216): Այս քաշային կարգում Հայաստանի երկրորդ ներկայացուցիչ Սամվել Գասպարյանը հրաժարվեց պայքարից:

Կարապետյանը պոկում վարժությունում առաջին մոտեցմամբ բարձրացրեց 180 կգ, երկրորդ մոտեցմամբ ձախողեց 185 կգ-ը, երրորդ մոտեցմամբ պոկեց 185 կգ-ը: Հրում վարժությունում առաջին մոտեցմամբ բարձրացրեց 212 կգ, երկրորդ մոտեցմամբ՝ 216 կգ: Երրորդ մոտեցումից Եվրոպայի չեմպիոնը հրաժարվեց: Կարապետյանը պոկում վարժությունում նվաճեց փոքր բրոնզե մեդալ, հրում վարժությունում 5-րդն է:

Աշխարհի բրոնզե մեդալակիր, Եվրոպայի կրկնակի չեմպիոն Սամվել Գասպարյանը պոկում վարժության առաջին մոտեցմամբ բարձրացրեց 172 կգ: Երկրորդ մոտեցմամբ չկարողացավ պոկել 177 կգ-ը: Ձախողեց նաեւ երրորդ մոտեցումը, որի համար Փաշիկ Ալավերդյանը պատվիրել էր 181 կգ: Այս վարժությունում Գասպարյանը 14-րդն է B խմբի արդյունքներից հետո: Սամվել Գասպարյանը հրաժարվեց հրում վարժությունից:

Այս քաշային կարգում ոսկե մեդալը նվաճեց Չինաստանի ներկայացուցիչ Լիու Հաունաուն երկամարտի 413 կգ արդյունքով՝ 181+232: Չինացի ծանրորդը հրում վարժությունում 232 կգ-ով համաշխարհային ռեկորդ սահմանեց:

Աշխարհի գավաթի խաղարկությունը վարկանիշային է Փարիզի Օլիմպիական խաղերի համար: 102 կգ քաշային կարգում Հայաստանի երկու ներկայացուցիչները  հավակնում են օլիմպիական ուղեգրի: Փարիզ-2024-ին կմասնակցի միայն մեկը:

Հայաստանի հավաքականը աշխարհի գավաթին մասնակցում է 5 ծանրորդով: Անդրանիկ Կարապետյանը ապրիլի 6-ին 89 կգ քաշայինների B խմբում զրո ստացավ պոկում վարժությունում եւ հրաժարվեց հետագա պայքարից: Օլիմպիական վարկանիշների համար կպայքարեն նաեւ Վարազդատ Լալայանը (+109 կգ) եւ Սիմոն Մարտիրոսյանը (+109 կգ):

Բոլոր 5 ծանրորդները Փարիզի Օլիմպիական խաղերի ուղեգրերի հավակնորդներ են: Նրանցից ընտրվելու են երեք ուժեղագույնները տարբեր քաշային կարգերում: 

Աշխարհի գավաթի խաղարկությունը հայ ծանրորդների վերջին վարկանիշային մրցաշարն է Փարիզի Օլիմպիական խաղերից առաջ: