Էլմիրա Կարապետյան․ 2023-ն ինձ համար անսպասելի եւ ֆանտաստիկ էր մեդալների քանակով

Մրցաշրջան 2023-ում հայկական սպորտում փայլեց հրաձիգ, Հայաստանի հավաքականի առաջատար, Տոկիոյի Օլիմպիական խաղերի մասնակից,  Փարիզի Օլիմպիական խաղերի ուղեգիր նվաճած Էլմիրա Կարապետյանը:

Երիտասարդ մայրիկը 2023 թվականին նվաճել է 11 մեդալ, դարձել աշխարհի գավաթի խաղարկության ոսկե մեդալակիր, Եվրոպայի առաջնության բրոնզե մեդալակիր, Եվրոպական խաղերի արծաթե մեդալակիր, մի շարք միջազգային մրցաշարերի հաղթող եւ մեդալակիր: Ի դեպ՝ Եվրոպայի առաջնության բրոնզե մեդալը անկախ Հայաստանի վերջին 20 տարիներում առաջին մեդալն էր հրաձգության Եվրոպայի առաջնություններում: Այս մեդալներով եւ մեծ նվաճումներով  Էլմիրա Կարապետյանը այդպես էլ չընդգրկվեց «Տարվա 10 լավագույն մարզիկների» կազմում, նաեւ չկար թեկնածուների ցանկում, ինչը բուռն քննադատությունների արժանացավ մարզական լրագրողների եւ հանրության կողմից:

Փարիզ-2024-ում Հայաստանի առաջին օլիմպիական ուղեգիրը նվաճած Էլմիրա Կարապետյանը NEWS.am Sport-ի համար ամփոփել է 2023 թվականը:

Մրցաշրջան-2023-ը...

2023 թվականն ինձ համար անսպասելի էր եւ ֆանտաստիկ մեդալների քանակով: Անսպասելի էր, որ մեկ տարվա ընթացքում կարող եմ 11 մեդալ նվաճել: Ես գիտեի, որ մեդալներ կնվաճեմ, բայց որ ամեն մրցաշարից մեդալով կվերադառնամ, չէի սպասում: Ես միշտ վստահ եմ եղել, որ հասնելու եմ իմ ուզած մեդալներին: Այնպես չի, որ 2023 թվականն ինձ համար բեկումնային էր, քանի որ միշտ իմացել եմ՝ ունեմ այդ բազան եւ գալու է մի օր, երբ ես յուրաքանչյուր մրցաշարից վերադառնալու եմ մեդալով: Իրականում, սա դեռ սկիզբն է, ես չեմ սիրում քչով բավարարվել: Առաջին օրը երբ մտել եմ հրաձգարան եւ կրակել ատրճանակով, հասկացել եմ, որ ունեմ տաղանդ, աշխատասիրություն եւ բախտ, որոնք բերելու են մեդալների:

Տարվա ամենամեծ հաղթանակը...

Ես կընդգծեի երկու հաղթանակ՝ աշխարհի գավաթի ոսկե մեդալն ու Եվրոպայի առաջնության բրոնզե մեդալը: Աշխարհի գավաթի ոսկե մեդալը սպասված էր: Արդեն ժամանակն էր, որ ոսկե մեդալակիր դառնայի: Նույնը կասեմ նաեւ Եվրոպայի առաջնության բրոնզե մեդալի մասին: Ժամանակը հասունացել էր, որ Եվրոպայի առաջնությունում ունենայինք մեդալ: Չեմ ցանկանում առանձնացնել, այս հաղթանակներից մեկն ընդգծել, որպես ամենամեծ հաղթանակ: Երկուսն էլ ինձ համար մեծ էին եւ շատ կարեւոր:

Ձախողում...

Ձախողում համարում եմ աշխարհի առաջնության չմասնակցելը, որն անցկացվեց Բաքվում: Ես պատրաստ էի այնտեղից մեդալով վերադառնալ:

Եվրոպայի բրոնզե մեդալը...

Շատ ուրախ եմ, որ վերջապես կարողացա մեդալակիր դառնալ Եվրոպայի առաջնությունում: Վերջին 20 տարում հրաձգության Եվրոպայի առաջնություններում մեր առաջին մեդալն էր: Իմ կարիերայում էլ էր առաջինը:

Ամենահիշարժան օրը...

2023 թվականի ամենահարժան օրը տղայիս՝ Լեոնի առաջին քայլեր անելու օրն էր: Հստակ չեմ կարող հիշել ամսաթիվը, բայց այդ ժամանակ մենք Լեհաստանում հավաքի էինք, տղաս ինձ հետ էր: Լիոնը մեկ տարեկան երկու ամսական էր եւ հավաքի օրերին առաջին անգամ առանց բռնվելու քայլեց: Ես հասցրեցի տեսանկարահանել:

Ափսոսանքը...

Ափսոսանքս նույն ձախողման պատասխանն է: Ափսոսում եմ, որ Բաքու չգնացինք: Ես շատ էի ուզում՝ գնայինք: Աշխարհի առաջնություն էր, կարեւոր մրցաշար: 2022 թվականի աշխարհի առաջնությունում 5-րդ տեղ էի գրավել, նաեւ նվաճել էի օլիմպիական ուղեգիր: Այս աշխարհի առաջնությունում պատրաստ էի ավելի բարձր տեղ զբաղեցնել եւ մեդալ նվաճել: Ես վստահ գնալու էի մեդալի հետեւից:

Փարիզի Օլիմպիական Խաղերը...

Ես իմ ուղեգիրը նվաճել եմ 2022 թվականի աշխարհի առաջնությունում եւ այդ օրվանից իմ առջեւ մեծ նպատակ ու խնդիր եմ դրել, մեդալ նվաճել: Կանեմ առավելագույնը օլիմպիական մեդալակիր դառնալու համար: Ինչպես արդեն նշեցի, ցանկացած մեդալի տակ թաքնված է երեք կարեւոր հատկանիշ՝ տաղանդ, աշխատասիրություն եւ մարզական բախտ: Իմ կարծիքով՝ ես այդ երեքն էլ ունեմ: Չգիտեմ՝ մյուս մարզաձեւերում ինչպես է, բայց հրաձգությունում սպորտային բախտ կա: Վերջին կրակով կարող ես հաղթել կամ պարտվել: Վերջում կրակում է բախտի գործոնը:

Նամակ Ձմեռ պապին...

Ձմեռ պապին նամակ գրում եմ: Հավատում եմ հրաշքին եւ սովորաբար գրում եմ: Այս տարի գրել եմ «Շնորհակալություն»: Ամանորի գիշերվա հրաշքին հավատում եմ: Եթե սրտանց երազանք ես պահում, Ձմեռ պապն իրականացնում է: Կռիվ եմ անում այն մարդկանց հետ, որոնք չեն հավատում: Հրաշքներ կան ու կատարվում են:

Լուսինե Շահբազյան