Ռաֆայել Նազարյան. Ապագան պետք է կերտել այսօր

Երեւանի «Բանանցը» ֆուտբոլի Հայաստանի Բարձրագույն խմբի առաջնությանը նախապատրաստվել սկսել է ինչպես եւ բոլոր թիմերը` տարվա սկզբից: Թիմը երեք հավաք անցկացրեց, որոնցից մեկը ֆուտբոլի ակադեմիայում, երկուսն էլ Կիպրոսում:

«Բանանցը» շեշտը դրել է իր կադրերի վրա` թիմի կազմում պահելով միայն մեկ արտասահմանցի ֆուտբոլիստի` Դու Բալային:

Առաջնության մեկնարկից առաջ NEWS.am Sport-ի թղթակիցը զրուցել է «Բանանցի» գլխավոր մարզիչ Ռաֆայել Նազարյանի հետ:

Պարոն Նազարյան, «Բանանցը» նախապատրաստական փուլն արդեն ավարտել է: Գո՞հ եք արդյունքներից:

Նախապատրաստական փուլից չեմ կարող դժգոհ լինել, իհարկե գոհ եմ: Ճիշտ է, ստուգողական բոլոր խաղերում հիմնականում պարտվել ենք, բայց ամեն դեպքում ֆուտբոլիստների կատարած աշխատանքից եւ իրենց գործի մոտեցումից գոհ եմ: Թե ինչ կստացվի առաջնության ընթացքում, ցույց կտա ժամանակը, հիմա ես ուղղակի չեմ կարող ասել, թե ինչպես կդասավորվի առաջնությունը մեզ համար:

«Բանանցն» այս տարի համալրված է սեփական կադրերով, բացառությամբ Դու Բալայի: Դուք ինչպե՞ս եք գնահատում ակումբի այս մոտեցմանը:

Շատ ուրախ եմ, որ ակումբը նման մոտեցում է ցուցաբերել: Ապագան պետք է կերտել այսօր, եւ դրա համար հենց այսօրվանից պետք է մտածենք նոր ֆուտբոլիստներ պատրաստելու մասին: Սա միայն ուրախացնող հանգամանք է, իսկ սեփական կադրերով հանդես գալով՝ «Բանանցը» արդեն զգալի առաջընթաց կունենա հենց իր դպրոցի զարգացման  առումով:

Դուք գլխավորում եք նաեւ Հայաստանի երիտասարդական հավաքականը: Հիմա «Բանանցից» շատ երիտասարդներ համարվում են երիտասարդականի թեկնածուներ: Նրանց մարզավիճակը բավարարո՞ւմ է:

Այս պահի դրությամբ բավարարում է, բայց միեւնույն  է, ես հավաքականի խաղացողների ընտրությունը կատարելու եմ  ոչ թե որպես «Բանանցի» գլխավոր մարզիչ, այլ որպես երիտասարդական հավաքականի գլխավոր մարզիչ` ուսումնասիրելով ու հետեւելով մյուս թիմերում հանդես եկող ֆուտբոլիստներին, նոր վերջնական որոշում եմ կայացնելու թիմի կազմի վերաբերյալ: Իսկ դրա համար մինչեւ Անդորրայի հետ հանդիպումը մենք ունենք 2,5 ամիս, այնպես որ պետք է հետեւեմ բոլոր ֆուտբոլիստներին, որպեսզի կատարեմ ճիշտ ընտրություն:

«Բանանցը» միշտ էլ խնդիր է դրել պայքարել ոչ միայն մրցանակային տեղերի, այլ նաեւ չեմպիոնական կոչման համար: Գավաթի խաղարկությունից «Բանանցը» դուրս մնաց անցյալ տարի: Այս տարի, այս կազմով «Բանանցը» կարո՞ղ է հավասար պայքար մղել մյուս թիմերի հետ:

Ճիշտն ասած, մեր մոտեցումը առաջնության խաղերին լինելու է հետեւյալը. յուրաքանչյուր խաղին պատրաստվել մաքսիմում հնարավորություններով ու դուրս գալ խաղադաշտ` երեք միավոր ձեռք բերելու նպատակով: Կստացվի, թե ոչ, ցույց կտա խաղը: Մենք ռազմավարական առումով ոչ մի առաջադրանք չունենք, մենք մեր գլխավոր խնդիրն ենք համարում յուրաքանչյուր խաղում երեք միավոր վաստակելը: Բացի այդ  մեր հիմնական նպատակն է նաեւ թիմի ընդհանուր խաղի զարգացումը, ֆուտբոլիստների  կատարողական վարպետության ու փորձի առաջընթացի ապահովում: Ինչ վերաբերում է առաջնության ընդհանուր ընթացքին, ապա կարծում եմ, որ հավասար ուժերով թիմեր են ու հետեւաբար հետաքրքիր մրցաշար է մեզ սպասվում:

Դուք ո՞ր թիմին եք ֆավորիտ համարում:

Երեւի թե «Ուլիսին»: Այն պատճառով, որ գործող չեմպիոնի կազմում ընդգրկված են փորձառու ֆուտբոլիստներ, եւ այդ առումով «Ուլիսը» որոշակի առավելություն ունի մյուսների նկատմամբ: Բայց դա չի նշանակում, որ մյուսները զիջելու են: Բոլոր ութ թիմերն էլ, կարծում եմ, կաշխատեն առավելագույնը հաջող հանդես գալու համար, դրանից բխում է, որ անզիջում ու հետաքրքիր պայքար է մեզ սպասվում, եւ դա կմեծացնի հայ ֆուտբոլասերի հետաքրքրությունը մեր առաջնության նկատմամբ:

Զրուցեց Խաչիկ Չախոյանը