Արցախցի Էրիկ Առստամյան․ Շուտով կմիանամ Հայաստանի հավաքականին եւ կնախապատրաստվեմ մրցաշարերի
16:26 2 հոկտեմբերի, 2023Կշարունակեմ ապրել Հայաստանում՝ իմ հայրենի հողի վրա: Կմարզվեմ եւ կփորձեմ նոր հաղթանակներ ունենալ իմ հայրենիքի համար:
Այս մասին NEWS.am Sport-ի թղթակցի հետ զրույցում ասաց բռնցքամարտի ավագ տարիքի պատանիների Եվրոպայի չեմպիոն, բռնցքամարտի Հայաստանի երիտասարդական հավաքականի անդամ, 54 կգ քաշային արցախցի Էրիկ Առստամյանը:
Երիտասարդ բռնցքամարտիկն այս օրերին ընտանիքի անդամների հետ Երեւանում է: Նրա ընտանիքը եւս Արցախից բռնի տեղահանվածներից է: Մինչ այդ Էրիկ Առստամյանը Ադրբեջանի կողմից Լաչինի ճանապարհի ապօրինի շրջափակման պատճառով մնացել էր Ստեփանակերտում եւ չէր կարողանում մասնակցել մրցաշարերի:
«Արդեն երկու օր է՝ Երեւանում ենք: Ընտանիքիս հետ եմ եկել Երեւան: Դեռեւս ապրում ենք բարեկամի տանը: Այս ընթացքում վարձով բնակարան ենք փնտրում, որպեսզի տեղափոխվենք: Հոգեբանական վիճակը, տրամադրությունը շատ վատ է: Վիրավորված ենք: Ընտանիքս նորմալ է: Կմնանք Հայաստանում, կապրենք մեր հողի վրա, մեր հայրենիքում:
Արդեն պետք է սկսեմ մարզումներս: Երեւանում անցկացված Եվրոպայի առաջնությունից հետո մրցաշարի չեմ մասնակցել ճանապարհի փակ լինելու պատճառով: Այդ ընթացքում մարզվել եմ այնտեղ: Անպայման շարունակելու եմ իմ մարզական կարիերան: Շուտով կմիանամ Հայաստանի հավաքականին եւ կնախապատրաստվեմ մրցաշարերի: Կմարզվեմ Վլադիմիր Ենգիբարյանի անվան մարզադպրոցում: Կփորձեմ նոր հաղթանակներ ունենալ իմ հայրենիքի համար»,- ասաց Էրիկ Առստամյանը:
Եվրոպայի չեմպիոնը Երեւանում մայիսին անցկացված երիտասարդների Եվրոպայի առաջնությունում կիսաեզրափակիչում պարտվել էր Վրաստանը ներկայացնող Գոռ Այվազյանին եւ դարձել բրոնզե մեդալակիր։
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.