Սեյրան Նիկողոսյան․ Եվրոպական խաղերից մեդալային ակնկալիքներ ունենք
16:33 14 հունիսի, 2023Եվրոպական խաղերից մեդալային ակնկալիքներ ունենք: Կպայքարենք նաեւ Փարիզ-2024-ի Օլիմպիական խաղերի ուղեգրերի համար:
Այս մասին NEWS.am Sport-ի թղթակցի հետ զրույցում ասաց հրաձգության Հայաստանի հավաքականի գլխավոր մարզիչ Սեյրան Նիկողոսյանը:
Հայ հրաձիգներն այս շրջանում պատրաստվում են Եվրոպական խաղերին, որը տեղի կունենա Լեհաստանում հունիսի 21-ից օգոստոսի 3-ը: Հրաձիգների համար Եվրոպական խաղերը օլիմպիական վարկանիշային են Փարիզ-2024-ի համար:
«Եվրոպական խաղերում կունենանք երեք մասնակից: Օդամղիչ ատրճանակ մրցաձեւում կպայքարեն Էլմիրա Կարապետյանը եւ Բենիկ Խլղաթյան, ստենդային հրաձգությունում՝ Երջանիկ Ավետիսյանը: Մարզիկներին մրցավայր կուղեկցենք ես եւ Գոռ Բարսեղյանը:
Եվրոպական խաղերը մեզ համար եւս օլիմպիական վարկանիշային է Փարիզ-2024-ի համար: Սպասելիքներով ենք մեկնում: Այստեղ թույլ պայքար չի լինելու: Եվրոպական խաղերին մասնակցում ենք վարկանիշներով, իսկ վարկանիշներ ձեռք բերած մարզիկը թույլ չի լինում: Եվրոպական խաղերի ուղեգրերը նվաճել ենք Եվրոպայի առաջնության եւ Եվրոպայի գավաթի փուլերի արդյունքներով: Բոլորն էլ ունեն մեդալային հնարավորություններ:
Օլիմպիական ուղեգրերի համար կպայքարեն Բենիկ Խլղաթյանը եւ Երջանիկ Ավետիսյանը, Էլմիրա Կարապետյանն արդեն նվաճել է իր ուղեգիրը:
Խաղերին պատրաստվել ենք Երեւանում: Արտագնա հավաքներ չարեցինք, քանի որ զենքեր երկրից դուրս տանելու-բերելու թույլտվության խնդիրներ կային: Որոշեցինք տեղում անել մարզումները: Ֆինանսական խնդիրներ չունենք, ամեն ինչով ապահոված ենք: Այս պահին մեր երեք մասնակիցներն էլ լավ մարզավիճակում են: Մեդալների ակնկալիքներ ունենք:
Հրաձգության մրցումները տեղի են ունենալու Լեհաստանի մեկ այլ քաղաքում՝ Վրոցլավում, իսկ մնացած մարզաձեւերն անցկացվելու են Կրակով քաղաքում:
Հունիսի 22-ին եւ 23-ին կանցկացվի ստենդային հրաձգության մրցումը, որին կմասնակցի Երջանիկ Ավետիսյանը, հունիսի 24-ին եւ 25-ին մրցասպարեզ դուրս կգան Էլմիրա Կարապետյանն ու Բենիկ Խլղաթյանը՝ օդամղիչ ատրճանակ մրցաձեւում»,- ասաց Սեյրան Նիկողոսյանը:
Հրաձգության Հայաստանի թիմը Լեհաստան կմեկնի հունիսի 19-ին:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.