Արսեն Հարությունյանը՝ Եվրոպայի եռակի չեմպիոն
20:43 19 ապրիլի, 2023Արսեն Հարությունյանը երրորդ անգամ նվաճեց Եվրոպայի չեմպիոնի տիտղոսը: Խորվաթիայի մայրաքաղաք Զագրեբում ավարտին մոտեցող ազատ ոճի ըմբշամարտի Եվրոպայի առաջնության 61 կգ քաշայինների եզրափակիչում Եվրոպայի գործող չեմպիոնը մրցեց Ալբանիայի ներկայացուցիչ Զելիմխան Աբակարովի հետ եւ հաղթեց 5:2 հաշվով:
Եվրոպայի կրկնակի չեմպիոնը պայքարը սկսել էր քառորդ եզրափակիչից, որտեղ 7:0 հաշվով հաղթանակի էր հասել թուրք Էմրահ Օրմանօղլուի նկատմամբ: Կիսաեզրափակիչում ժամանակից շուտ 9:0 հաշվով հաղթել էր Ֆրանսիան ներկայացնող Արման Էլոյանին:
Արսեն Հարությունյան, ազատ ոճի ըմբշամարտ, 61 կգ քաշային կարգ
Ծնվել է 1999 թվականի նոյեմբերի 22-ին Մասիս քաղաքում: Անձնական մարզիչներն են Գեւորգ Վարդանյանը եւ Արշակ Հայրապետյանը: Արսեն Հարությունյանը 2015 թվականի պատանիների Եվրոպայի չեմպիոն է, 2016թ. պատանիների Եվրոպայի փոխչեմպիոն, 2017թ. երիտասարդների աշխարհի առաջնության բրոնզե մեդալակիր, 2018թ. երիտասարդների Եվրոպայի չեմպիոն, երիտասարդների աշխարհի բրոնզե մեդալակիր (2018) :
Մեծահասակների հավաքականում նորամուտը նշել է 2018 թվականի Հայաստանի չեմպիոնությամբ (57 կգ): 2019 թվականին Բուխարեստում տեղի ունեցած մեծահասակների Եվրոպայի առաջնության 61 կգ քաշային կարգում նվաճել է ոսկե մեդալ: 2020 թվականին Հռոմում տեղի ունեցած Եվրոպայի առաջնությունում դարձել է բրոնզե մեդալակիր: Նույն տարում աշխարհի անհատական գավաթի խաղարկությունում նվաճել է արծաթե մեդալ:
2021 թվականի մարտի 18-19-ը Հունգարիայի մայրաքաղաք Բուդապեշտում տեղի ունեցած ազատ ոճի ըմբշամարտի եվրոպական գոտու վարկանիշային մրցաշարում դառնալով ոսկե մեդալակիր նվաճել է Տոկիո-2020 Օլիմպիական խաղերի ուղեգիրը: Երիտասարդ ըմբիշի համար առաջին Օլիմպիական խաղերն անհաջող են եղել:
2021 թվականին Նորվեգիայում անցկացված աշխարհի առաջնությունում նվաճել է բրոնզե մեդալ: Նույն տարում Սերբիայում անցկացված Մ23 աշխարհի առաջնությունում նվաճել չեմպիոնի տիտղոսը: 2022 թվականին Հունգարիայի մայրաքաղաք Բուդապեշտում տեղի ունեցած Եվրոպայի առաջնության եզրափակիչում թուրք Սուլեյման Ալթիի նկատմամբ 15:3 հաշվով տպավորիչ հաղթանակով հռչակվեց Եվրոպայի կրկնակի չեմպիոն: Նույն տարում եւս մեկ բրոնզե մեդալ նվաճեց աշխարհի առաջնությունում, ապա Մ23 աշխարհի առաջնությունում հռչակվեց կրկնակի չեմպիոն:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.