Ռոնալդու․ Հպարտ եմ, որ դարձա ամենաարդյունավետ խաղացողը հավաքականների պատմության մեջ

Պորտուգալիայի հավաքականի եւ Սաուդյան Արաբիայի «Ալ Նասրի» 38-ամյա հարձակվող Կրիշտիանու Ռոնալդուն սոցիալական ցանցերում արած գրառումով մեկնաբանել է հաղթանակը Եվրո-2024-ի ընտրական մրցաշարի մեկնարկային խաղում։

Պորտուգալացիները 4:0 հաշվով հաղթել են Լիխտենշտեյնի թիմին, Ռոնալդուն դարձել է դուբլի հեղինակ։

«Շատ հաճելի է, որ դարձյալ խաղում եմ եւ գոլեր եմ խփում ազգային հավաքականում, այն էլ՝ ինձ համար այսքան առանձնահատուկ ստադիոնում։ Հպարտ եմ, որ դարձա ամենաարդյունավետ խաղացողը հավաքականների պատմության մեջ»,- գրել է Ռոնալդուն։

Լիխտենշտեյնի թիմի դեմ խաղադաշտ դուրս գալու եւ 2 գոլ խփելու շնորհիվ Ռոնալդուն երկու ռեկորդ է սահմանել։

Նա 197-րդ հանդիպումն անցկացրեց Պորտուգալիայի հավաքականում եւ գերազանցեց Քուվեյթի հավաքականի 38-ամյա խաղացող Բադեր Ալ Մուտավի (196 խաղ) եւ Մալայզիայի հավաքականի նախկին խաղացող Սո Չին Էնի (195 խաղ) ռեկորդները ազգային թիմում անցկացրած հանդիպումների քանակով։

Ռոնալդուն դարձավ նաեւ առաջին ֆուտբոլիստը, որը հավաքականի պաշտոնական հանդիպումներում խփած գոլերի քանակը հասցրեց 100-ի։