«Մանչեսթեր Յունայթեդը» չի բողոքարկի Կազեմիրոյի որակազրկումը

«Մանչեսթեր Յունայթեդը» չի բողոքարկի թիմի կիսապաշտպան Կազեմիրոյի որակազրկումը, քանի որ գրեթե անհավանական է համարում դրա բավարարումը, հաղորդում է անգլիական ակումբի կայքը։ Բրազիլացի ֆուտբոլիստն առաջիկա չորս խաղում չի օգնի հոլանդացի Էրիկ տեն Հագի գլխավորած թիմին։

«Սաութհեմփթոնի» դեմ Անգլիայի Պրեմիեր լիգայի 27-րդ տուրի խաղում (0:0) Կազեմիրոն 37-րդ րոպեին հեռացվել էր կոպիտ սահանկման համար։ Նա կորակազրկվի չորս խաղով, քանի որ Անգլիայի ընթացիկ առաջնությունում երկրորդ անգամ է կարմիր քարտ ստացել։

Կազեմիրոն բաց կթողնի Անգլիայի գավաթի խաղարկության քառորդ եզրափակիչի հանդիպումը «Ֆուլհեմի» դեմ եւ Անգլիայի առաջնության հանդիպումները «Նյուքասլի», «Բրենթֆորդի» եւ «Էվերտոնի» դեմ։