Արթուր Դավթյան. Ամեն ինչ կանեմ, որ ոսկե մեդալով վերադառնամ Թուրքիայից
09:36 6 մարտի, 2023Տարին լավ եմ սկսել, հույս ունեմ, որ այսպես կշարունակվի: Առջեւում կարեւոր մրցաշար ունենք՝ Եվրոպայի առաջնություն Թուրքիայում: Կաշխատեմ ամեն ինչ անել, որ Թուրքիայից ոսկե մեդալով վերադառնամ:
Այս մասին լրագրողների հետ զրույցում «Զվարթնոց» օդանավակայանում ասաց Տոկիոյի Օլիմպիական խաղերի բրոնզե մեդալակիր, աշխարհի եւ Եվրոպայի չեմպիոն Արթուր Դավթյանը, որը երկու ոսկե մեդալ է նվաճել 2023 թվականի աշխարհի գավաթի առաջին երկու փուլերում: Նախորդ գիշեր աշխարհի չեմպիոնը Հայաստանի թիմի հետ Դոհայից վերադարձել է հայրենիք:
«Լավ մասնակցեցի երկու փուլերում: Տարին լավ եմ սկսել: Դոհայից հետո մյուս մասնակիցները մեկնում էին Բաքու, որտեց անցկացվելու է երրորդ փուլը, մենք, ինչպես հայտնի է, չենք գնալու: 4-րդ փուլը տեղի է ունենալու Կահիրեում, Եվրոպայի առաջնությունից առաջ: Այստեղ էլ ամեն ինչ կանեմ, որ ոսկե մեդալով վերադառնամ:
Այս տարի մի փոքր դժվար էր մրցաշրջանը սկսել. Քանի որ գործող աշխարհ չեմպիոնն ես, փորձում ես այդ անունը չգցել: Մի փոքր դժվար էր հավաքվելը աշխարհի չեմպիոնությունից հետո: Աշխարհի գավաթի փուլերում վատ մարզավիճակում չէի, ուրախ եմ, որ կարողացա երկու հաղթանակ տանել: Հուսով եմ՝ տարին այսպես կշարունակվի: Կարեւոր մրցաշար ունենք առջեւում՝ Եվրոպայի առաջնությունը, որը տեղի է ունենալու Թուրքիայում:
Շուտով կանցկացնենք Հայաստանի առաջնությունը, ապա կմեկնենք Վրաստան՝ հավաքի, այնտեղից էլ Անթալիա: Պետք է շատ լուրջ պատրաստվենք, որ լավ մասնակցենք, մեդալներով վերադառնանք: Կաշխատեմ ամեն ինչ անել, որ Թուրքիայից ոսկե մեդալով վերադառնամ»,- ասաց Արթուր Դավթյանը:
Հայաստանի հավաքականի առաջատարը անգերազանցելի է եղել աշխարհի գավաթի Կոտբուսի եւ Դոհայի փուլերում հենացատկի վարժությունում:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.