«Նոթինգեմ Ֆորեսթը» ներկայացրեց Կեյլոր Նավասին եւ Անդրե Այուին (ֆոտո, վիդեո)

Անգլիական «Նոթինգեմ Ֆորեսթը» ներկայացրեց թիմի նորեկներ, կոստառիկացի դարպասապահ Կեյլոր Նավասին եւ գանացի հարձակվող Անդրե Այուին։

Կեյլոր Նավասը Ֆրանսիայի չեմպիոն ՊՍԺ-ից է տեղափոխվել Անգլիայի Պրեմիեր լիգայում հանդես եկող թիմ։ Վարձակալության պայմանագիրը նախատեսված է մինչեւ այս մրցաշրջանի ավարտը։

36-ամյա Նավասը 2014-2019 թվականներին հանդես է եկել Մադրիդի «Ռեալում»՝ դառնալով Չեմպիոնների լիգայի եռակի գավաթակիր, Իսպանիայի չեմպիոն։ ՊՍԺ-ում Նավասը դարձել է Ֆրանսիայի կրկնակի չեմպիոն, գավաթակիր եւ սուպերգավաթակիր։

Keylor is in the building. pic.twitter.com/hLQYNELhtf

— Nottingham Forest FC (@NFFC) February 2, 2023

Keylor André. pic.twitter.com/hglqelLbSR

— Nottingham Forest FC (@NFFC) February 2, 2023

33-ամյա Անդրե Այուն ազատ գործակալի կարգավիճակում է միացել «Նոթինգեմ Ֆորեսթին»՝ կնքելով կես տարվա պայմանագիր։ Նրա նախորդ ակումբը Քաթարի «Ալ Սադն» էր, որի կազմում խաղացել է 2021թ․ հուլիսից մինչեւ այս տարվա հունվար։

Կարիերայի ընթացքում նա հանդես է եկել նաեւ ֆրանսիական «Մարսելում», «Լորիանում», Ուելսի «Սուոնսի Սիթիում», անգլիական «Վեստ Հեմում», թուրքական «Ֆեներբահչեում»։

Անգլիայի առաջնության 20 խաղից հետո «Նոթինգեմ Ֆորեսթը» 21 միավորով 13-րդ տեղում է։