Ավտոարշավորդ Արթուր Գորոյանը հաղթել է Աբու Դաբիում եւ մտադիր է ստեղծել հայկական թիմ

Իմ գլխավոր նպատակը Հայաստանն աշխարհին ներկայացնելն է: Ծրագրում եմ ստեղծել հայկական թիմ՝ հայ մասնագետներից բաղկացած եւ մեր թիմով հասնել այսպիսի հաղթանակների, ինչպիսին եղավ Աբու Դաբիում: Hankook 6H ABU DHABI 2023 ավտոարշավում Արթուր Գորոյանը զբաղեցրել է առաջին տեղը:

Այս մասին լրագրողների հետ զրույցում ասաց B կատեգորիայի միջազգային արտոնագիր ունեցող, Հայաստանը ներկայացնող մոսկվայաբնակ ավտոարշավորդ Արթուր Գորոյանը:

Հայաստանը ներկայացնող ավտոարշավորդը մասնակցել է գերմանական Sharky Racing թիմի կազմում TCR դասում:  Արթուր Գորոյանը Audi RS3 LMS DSG ավտոմեքենայով 6-ժամանոց ավտոարշավում անցել է 150 շրջան:

«Այս հաղթանակը շատ կարեւոր էր ինձ համար: Այստեղ մենք ներկայացնում էինք Հայաստանը, մեր դրոշը, հայկական թիմով էինք, նաեւ ներկայացնում էի Հայաստանի ավտոմոբիլային ֆեդերացիան, սակայն հանդես էինք գալիս գերմանական թիմի կազմում: Ես հատեցի 150 շրջան 6:00:49.840 ընդհանուր ժամանակով: Լավագույն արդյունքը գրանցվել է 89-րդ շրջանում՝ 2:08.144:

Աբու Դաբիի մրցաշարին մասնակցել եմ Audi մակնիշի ավտոմեքենայով՝ Audi RS3 LMS DSG: 2015 թվականից աշխատում եմ Audi-ի գործարանում՝ որպես թեստեր անցկացնող ավտոարշավորդ: Իմ աշխատանքային տարիներից սկսած Audi-ն աջակցում է ինձ, մեր թիմի հովանավորն է:

Մրցաշարում մենք հայկական թիմով էին, հայկական դրոշով, բայց մրցաշարի պաշտոնական կայքում մեր թիմի առջեւ Գերմանիայի դրոշն է: Ես ներկայացնում եմ գերմանական Sharky Racing կազմակերպությունը, որի հետ սկսել եմ աշխատել դեռ իմ առաջին քայլերի ժամանակ: Սա գերմանական կազմակերպություն է, որտեղ գերմանացի մեխանիկներն են, ինժեներներ, ղեկավարություն, գործարան, գերմանական մեքենա: Մենք չենք կարող դեռեւս այլ դրոշի ներքո հանդես գալ: Եթե ուզում ենք լիարժեք Հայաստանը ներկայացնել, պետք է ունենանք հայ մասնագետներ, ինժեներներ, մեխանիկներ, Հայաստանի գնած ավտոմեքենա: Այդ դեպքում արդեն թիմի անվան առջեւ կդրվի Հայաստանի դրոշը:

Աբու Դաբիում ես ցանկանում էի հաղթել, որ կրկին Հայաստանի անունը հնչեր, Հայաստանի մասին ավելի շատ խոսվեր:

10 տարուց ավել զբաղվում եմ ավտոարշավով, հիմնականում Գերմանիայում եմ մասնակցում մրցաշարերի:

Ինչպես յուրաքանչյուր մարզիկի, իմ նպատակը եւս սպորտի մասսայականացումն է , պրոպագանդան, որպեսզի երիտասարդները վատ սովորություններ ձեռք բերելու փոխարեն զբաղվեն սպորտով: Իմ գլխավոր նպատակը Հայաստանն աշխարհին ներկայացնելն է: Գերմանիայում ես միակ հայ ավտոարշավորդն եմ: Կուզենայի, որ ավտոարշավով զբաղվող մյուս հայ երիտասարդներն ինձանից օրինակ վերցնեն, հայկական արտոնագիր ունենան եւ ներկայացնեն Հայաստանը: Վստահեցնում եմ, որ մարզաձեւով զբաղվելու դեպքում 1-2 տարում հնարավոր է դուրս գալ միջազգային մրցահարթակ, մասնակցել մրցաշարերի:

Ես նպատակ ունեմ հայկական թիմ հավաքել: Նաեւ դիմում եմ Հայաստանից դուրս այս մարզաձեւով զբաղվող երիտասարդների: Մենք ունենք շատ հայ ավտոարշավորդներ, որոնք նույնպես մեծ ցանկություն ունեն հայկական թիմ ձեւավորել. օրինակ՝ Նիկոլա Մինասյանը: Նա «Ֆորմուլա -1»-ի համար թեստ-ավոտարշավորդ է եղել, «Լե-Մանի» չեմպիոն եւ մրցականակիր: Մի քանի տարի առաջ այցելեց Հայաստան: Նա շատ ոգեւորված է հայ ավտոարշավորդների թիմ ձեւավորելու, Հայաստանը ներկայացնելու գաղափարով:

Իմ ավտոմեքենայի վրա կա Հայաստանի դրոշ, որը Նիկոլայի մտղահաղացումն է: Կան էլի ավտոարշավորդներ, բայց դեռ նրանց հետ որեւէ պայմանավորվածություն ձեռք չի բերվել: Նիկոլա Մինասյանի հետ արդեն ունենք ծրագրեր: Ամռանը Իտալիայում անցկացվելիք մրցաշարում կունենանք երեք հայ ավտոարշավորդ:

Մեծ ցանկություն ունեմ նպաստել Հայաստանում ավտոսպորտի զարգացմանը: Որպես ավտոարշավորդ կարող եմ իմ գիտելիքները ներդնել մարզաձեւի զարգացման համար: Պետք է ստեղծվի հայկական թիմ։

Հայաստան տեղափոխվելու եւ ապրելու մասին դեռ չեմ մտածում: Մրցաշարերիս բնույթն այնպիսին է, որ պարբերաբար այլ երկրներ եմ մեկնում: Եթե հիմա ինձ հարցնեն, թե որտեղ եմ ապրում, կդժվարանամ պատասխանել: Ընտանիքս ապրում է Ռուսաստանում: Ես ներկայացնում եմ Հայաստանը, հանդես եմ գալիս իմ դրոշի ներքո, ինձ համար դա է իմ տունը»,- ասաց Արթուր Գորոյանը:

Ավտոարշավորդը ծնունդով Ջավախքից է, մինչեւ 9 տարեկան ապրել է Ջավախքում, ապա ընտանիքով տեղափոխվել Ռուսաստանի Արմավիր քաղաք, իսկ այնտեղից՝ Մոսկվա, հիմնական բնակության:

Լուսինե Շահբազյան