Գոռ Կարապետյան. Հպարտ եմ, որ այս պայմաններում կարողացա ուրախացնել մեր ազգին

Մրցաշրջան-2022-ում հայկական սպորտը ունեցավ եւս մեկ մեծ նվաճում. 16-ամյա Գոռ Կարապետյանը դարձավ ձյուդոյի պատանիների աշխարհի չեմպիոն:

Օգոստոսի 27-ին Բոսնիա-Հերցեգովինայի մայրաքաղաք Սարաեւոյում անցկացված ձյուդոյի աշխարհի պատանեկան առաջնությունում Գոռ Կարապետյանը 81 կգ քաշայինների պայքարում նվաճեց ոսկե մեդալ՝ եզրափակիչում պարտության մատնելով  ուզբեկ Ալիշեր Սամանովին: Պատանի մարզիկն անկախ Հայաստանի առաջին աշխարհի չեմպիոնն է ձյուդոյում:

16-ամյա աշխարհի չեմպիոնը NEWS.am Sport-ի հետ խոսել է 2022 թվականի հաջողությունների եւ մեծ սպորտում մեծ նպատակների մասին:

Գոռ, առաջին անգամ քեզ հաջողվեց ձյուդոյի աշխարհի առաջնությունում դառնալ ոսկե մեդալակիր: Ինչպե՞ս կնկարագրես 2022 թվականը քեզ համար: 

Տարին ինձ համար ծրագրված էր, բարձր արդյունքս՝ սպասելի: Իմ ամենաբարձր արդյունքի ժամանակ ես եղել եմ լավագույն մարզավիճակում, որի պարագայում մեդալ անպայման պետք է լիներ: 2022 թվականին կարողացա նվաճել Եվրոպայի գավաթի արծաթե մեդալ, Եվրոպայի օլիմպիական փառատոնի բրոնզե մեդալ, Եվրոպայի առաջնության արծաթե մեդալ եւ սպասված աշխարհի չեմպիոն:

Սպասո՞ւմ էիր, որ կնվաճես աշխարհի առաջնության ոսկե մեդալը:

Մեդալային ճանապարհով հասա մինչեւ աշխարհի առաջնության ոսկե մեդալ: Տարվա ընթացքում մարզումների եւ մրցաշարերի արդյունքներով հասել էի այն մակարդակին, որ աշխարհի առաջնությունում այդ հաղթանակը պետք է լիներ իմը:

Յուրաքանչյուր մրցաշարի մեկնել եմ չեմպիոն դառնալու ցանկությամբ եւ նպատակով: Մինչեւ աշխարհի առաջնությունը միշտ ինձ ինչ-որ բան խանգարում էր, որ ես դառնայի չեմպիոն: Այս առաջնությունում իմ հաղթանակը եւ ոսկե մեդալն իսկապես սպասված էր: Ես գուցե չարտահայտվեի, ոչ մի տեղ չասեի, որ ես հաստատ գիտեմ՝ ոսկե մեդալ լինելու է, բայց հոգուս խորքում վստահ էի:

Դու անկախ Հայաստանում առաջին աշխարհի չեմպիոնն ես ձյուդոյում: Ի՞նչ զգացողություն է:

Որքան էլ փորձեմ բառերով նկարագրել, չի ստացվի: Ինձ միայն կհասկանան մարզիկները, որոնք հասել են այսպիսի բարձունքի:

Ուրախություն եւ հպարտություն ես զգում, որ կարողանում ես այս պայմաններում, այս դժվար վիճակում այդ արդյունքով ուրախացնել ժողովրդիդ, ընտանիքիդ եւ ընկերներիդ:

Պարտավորեցողն է: Պետք է կարողանամ տիտղոսս պահպանել, ավելացնել արդյունքս: Ես շատ կուզենամ, որ ինձանից հետո ձյուդոյում աշխարհի չեմպիոններ ունենանք տարբեր տարիքային խմբերում, օլիմպիական չեմպիոններ ունենանք: Կուզեմ, որ իմ արդյունքը շատերը կրկնեն, որի համար միայն ուրախ կլինեմ:

Գոռ, ինչպե՞ս ես ձյուդոն ընտրել քեզ կյանքի ուղի:

Ընկերոջս հետ եմ սկսել զբաղվել ձյուդոյով: Հետո նա չհամակերպվեց սպորտի հետ եւ դուրս եկավ մարզումներից, իսկ ես արդեն գտել էի ինձ այս սպորտում: Շարունակեցի զբաղվել ձյուդոյով: Փոքր տարիքից երազել եմ դառնալ չեմպիոն, բայց երբ առաջին նվաճումս ունեցա ձյուդոյում՝ դարձա Հայաստանի չեմպիոն, մանկությանս երազանքները սպորտի հետ կապված դարձան նպատակներ:

Ո՞րն է մեծ երազանքդ մեծ սպորտում:

Ինչպես յուրաքանչյուր մարզիկ, ես նույնպես նպատակ ունեմ օլիմպիական բարձունքի հասնել: Այդ նպատակիս հասնելու համար ամեն ինչ պատրաստ եմ անել, որի համար շատ զոհողություններ են պետք, շատ մարդկանց պետք է կարողանալ հակառակվել, որ նպատակդ իրագործվի:

Շատ նպատակներ կան 2023 թվականի հետ կապված, ապացուցելու շատ բան ունեմ:

Լուսինե Շահբազյան