Արսեն Հարությունյան. Եթե կնոջս տեղն ուրիշ աղջիկ լիներ, գուցե ես այլեւս սպորտով չզբաղվեի (ֆոտո, վիդեո)
12:21 5 հունվարի, 20232023 թվականին երազում եմ մեծահասակների աշխարհի չեմպիոն դառնալ: Անցած առաջնությունում իմ սխալի պատճառով պարտվեցի կիսաեզրափակիչում, բայց կգա ժամանակը, որ ես կհաղթեմ:
Այս մասին NEWS.am Sport-ի թղթակցի հետ զրույցում ասաց ազատ ոճի ըմբշամարտի Եվրոպայի կրկնակի չեմպիոն, աշխարհի կրկնակի բրոնզե մեդալակիր Արսեն Հարությունյանը:
Մրցաշրջան-2022-ը հաղթանակներով լի ստացվեց 23-ամյա ըմբիշի համար: Նա երկրորդ անգամ նվաճեց Եվրոպայի չեմպիոնի կոչումը, ապա աշխարհի առաջնությունում դարձավ կրկնակի բրոնզե մեդալակիր, իսկ մրցումային տարվա վերջում երկրորդ անգամ նվաճեց աշխարհի մինչեւ 23 տարեկանների չեմպիոնի տիտղոսը: Այդ ընթացքում երիտասարդ չեմպիոնը նաեւ ամուսանացավ: Հոկտեմբերի 27-ին տեղի ունեցավ Արսեն Հարությունյանի ամուսնության արարողությունը:
2022 թվականին Եվրոպայի կրկնակի չեմպիոնը իր մարզական կարիերայում արդեն երրորդ անգամ համալրեց տարվա լավագույն մարզիկների տասնյակը:
Արսեն Հարությունյանը NEWS.am Sport-ի համար ամփոփել է մրցաշրջան-2022-ը եւ պատմել 2023 թվականի մեծ երազանքի մասին:
Արսեն, ինչպիսի՞ն ստացվեց 2022 թվականը քեզ համար:
2022 թվականը շատ լավ տարի էր ինձ համար: Տարին սկսեցի հաղթանակով, կարողացա Եվրոպայի կրկնակի չեմպիոն հռչակվել, ինչի համար շատ ուրախ էի: Յուրաքանչյուր տարվա սկզբից ես պլանավորում եմ տարին, թե ինչ մրցաշարերի եմ մասնակցելու, ինչ եւ ինչպես եմ անելու: Այնպես, ինչպես ծրագրել էի 2022-ը, գրեթե ամբողջությամբ ստացվեց՝ բացառությամբ աշխարհի առաջնության:
Նպատակս ու ցանկությունս աշխարհի ոսկե մեդալն էր, բայց այս անգամ էլ բրոնզ ստացվեց: Ուրախ եմ, որ կարողացա մեծահասակների աշխարհի առաջնությունում եւս մեկ մեդալ նվաճել: Չեմ կարող ասել, թե շատ լավ էր, բայց կարողացա պահպանել իմ նվաճումը: Մինչեւ 23 տարեկանների աշխարհի առաջնությունում էլ ոսկե մեդալակիր դարձա եւ հռչակվեցի կրկնակի աշխարհի չեմպիոն:
Մեծ նվաճումներից բացի, 2022-ում նաեւ ամուսնացար...
Այո: Շատ էի սպասում այդ իրադարձությանը: Ձեռք եմ բերել կյանքի ընկեր: Ես նրան շնորհակալ եմ: Նա ինձ շատ լավ է հասկանում: Եթե նրա տեղն ուրիշ աղջիկ լիներ, գուցե ես այլեւս սպորտով չզբաղվեի: Նա այլ կերպ է ընդունում իմ ընտրությունը: Որքան ես եմ ուզում միշտ հաղթել, դրանից շատ ինքն է ուզում, որ ես հաղթեմ: Ինձ օգնում է: Ամուսնությունից հետո ամեն ինչ փոխվել է, այլ կերպ եմ ամեն ինչին նայում, մարզումներիս տրամադրվում:
Ստացվում է համատեղել ամուսնական կյանքն ու մարզական կարիերան: Եթե ցանկությունը կա, ամեն ինչ էլ հնարավոր է համատեղել:
Ի՞նչի համար ես ափսոսում 2022-ում:
Ափսոսում եմ միայն աշխարհի առաջնության կիսաեզրափակիչ գոտեմարտիս համար, որտեղ չկարողացա լավ տրամադրվել եւ հաղթել: Իմ սխալի պատճառով էլի պարտվեցի եւ չեմ կարողանում իմ մեջ այդ պարտությունը հաղթահարել: Կգա ժամանակը, որ դա էլ կհաղթահարեմ եւ կհաղթեմ:
Ի՞նչ երազանք ես պահել 2023-ի համար:
Ամեն տարի Ամանորի գիշերը պահում եմ երազանք: Հավատում եմ, որ իրականանալու են եւ երազանքներիս մեծ մասը իրականանում է: 2023-ի մեծ երազանքս մեծահասակների աշխարհի չեմպիոն դառնալն է:
Լուսինե Շահբազյան
Ֆոտո՝ Էմմա Ասատրյանի
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.