ԱԱ. Հռիփսիմե Խուրշուդյանը չորրորդն է

Կոլումբիայի մայրաքաղաք Բոգոտայում ընթացող առաջնության 9-րդ մրցումային օրը կանանց Հայաստանի հավաքականից մրցահարթակ դուրս եկավ Եվրոպայի չեմպիոն Հռիփսիմե Խուրշուդյանը:

87 կգ քաշայինների պայքարում երկամարտի 238 կգ արդյունքով զբաղեցրեց 4-րդ տեղը՝ 3 կգ-ով զիջելով երրորդ տեղը զբաղեցրած Ուզբեկստանի ներկայացուցիչին:

Պոկում վարժությունը Խուրշուդյանը պայքարը սկսեց 103 կգ-ով: Երկրորդ մոտեցման համար պատվիրված 107 կգ-ի մոտեցումը ձախողեց, բայց երրորդ մոտեցմամբ հաջողությամբ պոկեց 108 կգ:

Հրում վարժությունում երկու երեխաների մայրը երկու առաջին փորձով գլխավերեւում պահեց 127, ապա 130 կգ-ը: Երրորդ մոտեցումը ձախողեց, որի համար պատվիրել էր 134 կգ եւ զրկվեց երկամարտի բրոնզե մեդալ նվաճելու հնարավորությունից:

87 կգ քաշային կարգում աշխարհի չեմպիոնի տիտղոսը նվաճեց Նորվեգիայի Սոլֆրիդ Կոանդան (260 կգ, 113+147), փոխչեմպիոն՝ Ավստրալիայից Էյլին Չիկամատանան (109+140), բրնոզե մեդալակիր՝ Ուզբեկստանը ներկայացնող Տուրսունոյ Ջաբորովա (112+129):

Աշխարհի առաջնության 9-րդ մրցումային օրը կանանց հավաքականից մրցահարթակ էր դուրս եկել նաեւ Եվրոպայի բրոնզե մեդալակիր աշխարհի եւ Եվրոպայի երիտասարդական չեմպիոն Լիանա Գյուրջյանը, որը մասնակցել է 81 կգ քաշայինների B խմբում:

Երկամարտի 237 կգ արդյունքով Գյուրջյանը 11-րդն է (103+134):

Կանանց Հայաստանի թիմն ավարտեց ելույթներն աշխարհի առաջնությունում: Արտաշես Ներսիսյանի գլխավորած հավաքականի 5 ներկայացուցիչներից լավագույն արդյունքը գրանցեց Հռիփսիմե Խուրշուդյանը:

Հայաստանի հավաքականի անվանի ծանրորդուհին 6 տարվա դադարից հետո այս տարվա Հայաստանի առաջնության մասնակցությունով եւ չենպիոնությամբ հայտարարեց իր վերադարձի մասին: Նա մրցահարթակից բացակայում էր 2016 թվականի Եվրոպայի չեմպիոնությունից հետո:

Անվանի ծանրորդուհու առաջին միջազգային փորձը դադարից հետո եղավ Եվրոպայի առաջնությունը, որտեղ գրավեց 5-րդ տեղը: Ալբանիայում անցկացված առաջնությունում կանանց 87 կգ քաշայինների պայքարում Խուրշուդյանը երկամարտում գրանցեց 227 կգ արդյունք (105+122):

Երկու երեխաների մայրն աշխարհի առաջնությունում 11 կգ-ով բարելավեց Եվրոպայի առաջնության արդյունքը: 12 ծանրորդով աշխարհի առաջնությանը մասնակցող Հայաստանի թիմը դեռ մեկ մեդալ է նվաճել:

Նախորդ օրը տղամարդկանց 102 կգ քաշայինների պայքարում երկամարտի 389 կգ արդյունքով նվաճեց բրոնզե մեդալ (175+214): Հայաստանի հավաքականից պայքարի մեջ մնաց երկու մասնակից:

Դեկտեմբերի 17-ին տղամարդկանց +109 կգ քաշայինների պայքարում մրցահարթակ դուրս կգան աշխարհի եւ Եվրոպայի փոխչեմպիոն Վարազդատ Լալայանը, 109 կգ քաշային կարգում կրկնակի օլիմպիական փոխչեմպիոն, աշխարհի եւ Եվրոպայի կրկնակի չեմպիոն Սիմոն Մարտիրոսյանը:

Աշխարհի առաջնության +109 կգ քաշային կարգում Բահրեյնի հավաքականի կազմում կմաանակցի օլիմպիական փոխչեմպիոն, աշխարհի եւ Եվրոպայի փոխչեմպիոն, Հայաստանի հավաքականի նախկին անդամ Գոռ Մինասյանը: