ԱԱ-2022․ Խորվաթիան դուրս թողեց Բրազիլիային (ֆոտո, վիդեո)

21:47   9 դեկտեմբերի, 2022

Ֆուտբոլի աշխարհի առաջնության քառորդ եզրափակիչում մրցեցին 2018թ․ աշխարհի առաջնության փոխչեմպիոն Խորվաթիան եւ աշխարհի հնգակի չեմպիոն Բրազիլիան։ Հետխաղային 11-մետրանոցներով հաղթեց Խորվաթիան։

Հիմնական ժամանակում գրանցվեց ոչ ոքի՝ 0:0։

Առաջին խաղակեսում հաշիվը չբացվեց։ Գրեթե հավասար պայքարում Բրազիլիան ուներ որոշակի առավելություն, որն արտացոլվեց դարպասին կատարած 3 հարվածով։ 

3 սեյվ կատարեց Զագրեբի «Դինամոյի» 27-ամյա դարպասապահ Դոմինիկ Լիվակովիչը։ Առաջին խաղակեսում Խորվաթիան մրցակցի դարպասին հարված կատարել չկարողացավ։

Երկրորդ խաղակեսում բրազիլացիները զգալի խաղային առավելություն ունեին եւ եւս 5 հարված կատարեցին խորվաթների դարպասը։ 5 դրվագում էլ սեյվի հեղինակ դարձավ Դոմինիկ Լիվակովիչը։ Գնդակի վերահսկողությամբ հավասարություն էր (50/50 տոկոս), սակայն դարպասին հարված կատարել Խորվաթիայի թիմին չհաջողվեց։ 

Լրացուցիչ ժամանակի առաջին խաղակեսի ավելացված առաջին րոպեին անհատական անցում ձեռնարկեց Ֆրանսիայի չեմպիոն ՊՍԺ-ի 30-ամյա հարձակվող Նեյմարը, երկու անգամ պատ խաղարկեց թիմակիցների հետ, գոլային փոխանցում ստացավ Լոնդոնի «Վեստ Հեմի» 25-ամյա կիսապաշտպան Լուկաս Պակետայից եւ գրավեց մրցակցի դարպասը (տեսանյութ)։ Նեյմարը 77-րդ գոլը խփեց ազգային թիմում՝  հավասարվելով ռեկորդակիր Պելեին։

117-րդ րոպեին հաշվի հավասարությունը վերականգնեց Զագրեբի «Դինամոյի» 28-ամյա հարձակվող Բրունո Պետկովիչը, որին գոլային փոխանցում կատարեց նույն ակումբի 29-ամյա հարձակվող Միսլավ Օրշիչը  (տեսանյութ)։ Երկուսն էլ փոխարինման դուրս եկած ֆուտբոլիստներն էին։ Ամբողջ հանդիպման ընթացքում խորվաթներն այդ մեկը հարվածը կատարեցին բրազիլացիների դարպասին։

Հետխաղային 11-մետրանոցներն ավելի հաջող իրացրին խորվաթները, հաղթեցին 4:2 հաշվով (տեսանյութ)  եւ դուրս եկան կիսաեզրափակիչ։

Առաջին հարվածը կատարեցին խորվաթները։ Իտալական «Տորինոյի» 25-ամյա կիսապաշտպան Նիկոլա Վլաշիչը գրավեց Անգլիայի փոխչեմպիոն «Լիվերպուլի» 30-ամյա դարպասապահ Ալիսոն Բեքերի պաշտպանած դարպասը։

Բրազիլացիների առաջին հարվածը ձախողեց Իսպանիայի չեմպիոն Մադրիդի «Ռեալի» 21-ամյա հարձակվող Ռոդրիգոն։ Լիվակովիչը սեյվ կատարեց։

Խորվաթներից ֆրանսիական «Ռենի» 24-ամյա կիսապաշտպան Լովրո Մայերը չվրիպեց։

Բրազիլիայի առաջին գոլը խփեց անգլիական «Մանչեսթեր Յունայթեդի» 30-ամյա կիսապաշտպան Կազեմիրոն։

Խորվաթիայից երրորդ հարվածն արդյունավետ իրացրեց «Ռեալի» 37-ամյա կիսապաշտպան Լուկա Մոդրիչը։

Բրազիլիայից հաջորդ հարվածը հաջող իրացրեց բրազիլական «Ֆլամենգոյի» 25-ամյա հարձակվող Պեդրոն։

Խորվաթիայի չորրորդ գոլը խփեց Օրշիչը։ Բրազիլացիներից վրիպեց նաեւ ՊՍԺ-ի 28-ամյա պաշտպան Մարկինյոսը՝ հարվածելով ուղղահայաց դարպասաձողին։

1/8 եզրափակիչում Խորվաթիան հաղթել էր Ճապոնիային (1:1, 11մ՝ 3:1), Բրազիլիան՝ Հարավային Կորեային (4:1)։

Խորվաթիան կիսաեզրափակիչում կմրցի Նիդեռլանդներ - Արգենտինա զույգի հաղթողի հետ։ Այդ հանդիպումը կմեկնարկի Երեւանի ժամանակով 23:00-ին։

ԱԱ-2022, քառորդ եզրափակիչ

Խորվաթիա - Բրազիլիա՝ 1:1 (0:0, 1:1, 11մ՝ 4:2), (տեսանյութ)

Բրունո Պետկովիչ, 117 - Նեյմար, 105+1



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.