Բողոքի ցույց․ Երեւանի հեծանվահրապարակն այս տարի չի ֆինանսավորվել (տեսանյութ)

Երեւանի հեծանվահրապարակն արդեն շուրջ մեկ տարի չի ֆինանսավորվում քաղաքապետարանի կողմից: Երեւանի ավագանու անդամ, «Իմ քայլը» խմբակցության անդամ Արման Անտոնյանը, որը նաեւ հեծանվորդների, սիրողական հեծանվասպորտի եւ սպորտային տուրիզմի ֆեդերացիայի նախագահն է, ամեն ձեւ խոչընդոտում է գործող մարզադպրոցի, հեծանվահրապարակի ֆինանսավորմանը:

Այս մասին լրագրողների հետ զրույցում ասաց Երեւանի հեծանվահրապարակի տնօրեն Աբգար Պետրոսյանը: Հեծանվահարապարակի աշխատակազմը, Հայաստանի հեծանվային սպորտի ֆեդերացիայի ներկայացուցիչներն ու մի խումբ հեծանվորդներն նոյեմբերի 22-ին բողոքի ցույց էին իրականացնում Երեւանի քաղաքապետարանի առջեւ:

Նրանց պահանջը՝ հեծանվահրապարակի ֆինանսավորման վերականգնում է: Քաղաքապետարանի շենքի առջեւ հավաքվածները եկել էի Երեւանի ավագանուն եւ քաղաքապետին իրենց բողոքը ներկայացնելու, խնդիրը քննարկելու, սակայն Երեւանի քաղաքապետն այդպես էլ դուրս չեկավ:

Աբգար Պետրոսյանի խոսքով, Երեւանի համար բազմաթիվ աշխատատեղեր ապահոված հեծանվահրապարակը այսօր կանգնած է փլուզման եզրին, որի «հեղինակը» Հայաստանի հեծանվային սպորտի ֆեդերացիայի նախկին փոխնախագահ Արման Անտոնյանն է:

«Մենք ներկայացնում ենք Հայաստանի խոշոր մարզական հասարական կազմակերպություններից մեկը: Խնդիրը, որի առջեւ այժմ կանգնած ենք, ունի արդեն մի քանի տարվա պատմություն: Մենք ֆինանսավորում չենք ստացել 2020 թվականի 7 ամիսների ընթացքում, նաեւ այս տարի արդեն 11-րդ ամիսն է: Հեծանվահրապարակի աշխատակիցներն աշխատավարձեր չեն ստանում, նրանք այս մարզաձեւի նվիրյալներն են եւ այս մարզաձեւի միակ մասնագետները, այդ պատճառով չեն լքում մեզ, բայց մենք չենք կարող այսպես շարունակել:

«Հայաստան» մարզական ՀԿ-ի ենթակայության տակ հեծանվահրապարակը նախկինում գործել է Գրիգոր Լուսավորիչ 4 հասցեում:

Քանի որ հեծանվային սպորտը թանկ մարզաձեւ է, ամեն մարզում գումար արժե, մենք դժվարանում էինք սեփական միջոցներով պահել հեծանվահրապարակը: Այդ պատճառով որոշեցինք գնալ ներդրումային ծրագրի եւ մեր սեփականությունը քաղաքապետ Երվանդ Զախարյանի՝ 26.08.2008 թվականի գրության հիման վրա նվիրել Երեւանի քաղաքապետարանին:

Պայմանագիր է եղել մեր, «Ռենկո» ընկերության եւ քաղաքապետարանի միջեւ, ըստ որի սեփականություն համարվող հեծանվահրապարակը նվիրաբերել ենք Երեւան համայնքին, որը տվել է «Ռենկո» կազմակերպությանը՝ պայմանով, որ կկառուցվի լիովին նոր հեծանվահրապարակ եւ ֆինանսական մի աղբյուր հանդիսացող կառույց կստեղծի, որպեսզի մենք կարողանանք նաեւ ֆինանսավորվել այդ աղբյուրից, պահել մեր մարզաձեւը: Այդ ամենի նպատակը մարզաձեւը չկորցնելն էր:

Ֆեդերացիան ունի պետական ֆինանսավորում, միշտ էլ ունեցել ենք, բայց դա չի բավականացնում թանկ մարզաձեւին: Այսպիսով՝ 2008 թվականին Իսակովի պողոտայի վրա կառուցվել է լիովին նոր հեծանվահրապարակ, նաեւ ըստ պայմանագրի Ազատության հրապարակում կառուցվել է վճարովի ստորգետնյա ավտոկայանատեղի, որը մեզ պետք է ապահովեր նաեւ ֆինանսավորում մարզադպրոցի համար:

Դրան զուգահեռ նախկին հեծանվահրապարակի տեղում կառուցվել է հյուրանոց: Հեծանվային սպորտն 8 մրցաձեւ ունի, որոնցից 4-ն օլիմպիական են, հեծանվահրապարակը եւս օլիմպիական ձեւ է եւ այսօր այն պահելու խնդրի առաջ է:

Արման Անտոնյանը, որը որոշել է քանդել գործող հեծանվահրապարակը, 2014 թվականից եղել է մեր ֆեդերացիայի փոխնախագահ: Մենք նրա հետ ունեցել ենք խմորումներ, անհամաձյանություններ, չենք ուզել, որ նա շարունակի մեզ հետ աշխատել, առաջարկել ենք հեռանա ոչ միայն ֆեդերացիայից, այլ նաեւ հեծանվային սպորտից առհասարակ: Նա չի եղել մարզիկ, չունի մարզական գիտելիքներ, ոլորտի մասին չունի որեւէ պատկերացում: Նա նեղված հեռացել է ֆեդերացիայից, հետո դարձել է Երեւանի ավագանի: Այդ օրվանից պայքար է սկսել մեր դեմ, հեծանվային սպորտի դեմ: Խաթարել է մեր աշխատանքը: Չի թողել նորմալ աշխատենք: Մեզ չեն ֆինանսավորում:

Ստացվում է՝ մենք մեր սեփականությունը նվիրաբերեցինք Երեւանին, կառուցապատող կազմակերպությունն ունեցավ իր տարածքը, Երեւան համայնքն ունեցավ ավտոկայանատեղի, բազմաթիվ աշխատատեղեր, որտեղից մեծ ֆինանսական հոսքեր են գալիս քաղաքի բյուջե, ու մեզ այսքանից հետո կտրում են ֆինանսավորումից: Մ

ենք նախկինում ֆինանսավորվել ենք 50 միլիոն դրամով, այժմ մեր ֆինանսավորումը 72 միլիոն դրամ է, որը չկա: Արման Անտոնյանը ցանկանում է մեր հեծանվահրապարակի տեղում նոր մարզադպրոց կառուցել, այդ պատճառով այժմ մեր ֆինանսավորումը սառեցված է:

Նա իր նախագիծը ներկայացրել է ավագանու նիստին, որի անդամներն առանց իմանալու այս նախապատմությունը, կողմ են քվեարկել: Մենք խնդրում եւ պահանջում ենք քաղաքային իշխանություններին, Երեւանի քաղաքապետին, որպեսզի լսեն մեր բողոքը, գան հեծանվահրապարակ, տեսնեն մեր աշխատանքը եւ այս խնդրին լուծում տան, վերականգնեն մեր ֆինանսավորումը անհատույց, ինչպես եղել է նախնական պայմանավորվածությամբ: Մենք թույլ չենք տա, որպեսզի մեր նվիրվատվությունը, ներդրումները գնա, հենց այնպես կորի»,- ասաց Աբգար Պետրոսյանը:

Մինչեւ բողոքի ակցիայի ներկայացուցիչները բարձրաձայնում էին իրենց խնդրի մասին, Երեւանի հեծանվահրապարակի տնօրենը նամակներ հանձնեց այդ պահին ընթացող ավագանու նիստին մասնակից բոլոր խմբակցություններին:

Նիստի ընդմիջմանը ակցիա իրականացնողներին մոտեցավ «Լույս» խմբակցության անդամ Անի Խաչատրյանը: Նա իր աջակցությունը հայտնեց հեծանվահրապարակի աշխատակազմին, ասաց, որ ավագանու նիստի ընթացքում քաղաքապետ Հրաչյա Սարգսյանին տեղեկացվել է բակում իրականացնող ակցիայի մասին, բայց քաղաքապետը չի արձագանքել: Ժամեր անց Աբգար Պետրոսյանը ֆեդերացիայի փոխնախագահ Համբարձում Գրիգորյանի եւ հեծանվային սպորտի Հայաստանի հավաքականի գլխավոր մարզիչ Արմեն Գյոզալյանի հետ հանդիպեց Երեւանի փոխքաղաքապետ Գեւորգ Սիմոնյանին:

Հանդիպումից հետո հեծանվահրապարակի տնօրենը նշեց, որ փոխքաղաքապետը խոստացել է խնդրին լուծում տալ: «Նա ասաց, որ մի քանի օրվա ընթացքում կգա հեծանվահրապարակ, կուսումնասիրի խնդիրը եւ կտա արդար լուծում: Եթե մի քանի օր անց նա կամ քաղաքապետը չգան հեծանվահրապարակ, կշարունակենք մեր բողոքի ակցիաներն այնքան ժամանակ, մինչեւ լուծումը տրվի»,- ամփոփեց Աբգար Պետրոսյանը:

Լուսինե Շահբազյան