Ո՞վ է ոգեշնչել չեմպիոնին. Տիգրան Մարտիրոսյան

Թեեւ հայրս մեծ հաջողությունների էր հասել ծանրամարտում, սակայն նա այդքան էլ կողմ չէր, որ ես զբաղվեի այդ մարզաձեւով, պատմում է Հայաստանի բազմակի չեմպիոն, Եվրոպայի կրկնակի եւ աշխարհի չեմպիոն, Օլիմպիական խաղերի բրոնզե մեդալակիր Տիգրան Մարտիրոսյանը, ով հայտնի ծանրորդ Գեւորգ Մարտիրոսյանի որդին է: Տիգրան Մարտիրոսյանը NEWS.am Sport-ի «Ո՞վ է ոգեշնչել չեմպիոնին» շարքի հերոսն է։

Մանկուց երազում էի մարզվել ծանրամարտով

«Ծանրամարտով սկսել եմ մարզվել հորս շնորհիվ: Նա բավական մեծ հաջողություններ է ունեցել այս մարզաձեւում` բազմիցս դարձել է Հայաստանի չեմպիոն: Տանը միշտ կիսվում էր իր տպավորություններով եւ հաջողություններով, իսկ փոքր տարիքում երեխան ինչի մասին շատ է լսում, դա էլ իրեն հետաքրքրում է: Ես արդեն փոքրուց ցանկություն ունեի դառնալ ծանրորդ: Ցանկությունս շատ մեծ էր, բայց որքան էլ զարմանալի չէ հայրս միշտ ասում էր, որ  մի քիչ էլ սպասեմ: Իրականում, նա չէր ցանկանում որ ես զբաղվեի ծանրամարտով: Իր փորձից գիտեր, թե ինչքան ծանր մարզաձեւ է սա: Այնպես ստացվեց, որ ես սկսեցի զբաղվել ծանրամարտով, երբ հայրս մահացավ: 11 տարեկան էի այն ժամանակ»:

Տիգրան Մարտիրոսյանը 2004-ին դարձել է Եվրոպայի երիտասարդական առաջնության հաղթող, 2008,2010-ին` Եվրոպայի չեմպիոն, 2008թ. Պեկինի Օլիմպիական խաղերում Տիգրանը նվաճեց բրոնզե մեդալ, իսկ երկու տարի անց Անթալիայում անցկացված աշխարհի առաջնության ժամանակ գրավեց առաջին տեղը:

«Փոքր տարիքում հեշտ է տեղ տալ երեեւակայությանը: Ինձ թվում էր, թե կմարզվեմ եւ ամեն ինչի էլ կհասնեմ, սակայն երբ առաջին անգամ տեսա մարզադահլիճը եւ մարզվողներին, թե որքան ծանր քաշեր էին նրանք բարձրացնում, հասկացա, որ ինձ շատ դժվար է լինելու: Հաջողության հասնելու համար մեծ նվիրում եւ աշխատասիրություն է պետք: Անհամեստ թող չհնչի, բայց ես իսկապես շատ մեծ նվիրում ունեի: Ոչ մի դժվարություն ինձ չկոտրեց, որպեսզի ես հասնեմ իմ երազանքին:

Առաջին մրցաշարը, որին մասնակցեցի հուշամրցաշար էր: Ես այնտեզ զբաղեցրի առաջին տեղը: Երկրորդ մրցաշարում նույնպես հաղթեցի: Իսկ երրորդը Հայաստանի պատանիների առաջնությունն էր. ճանաչվեցի հաթող, բայց չկարողացա մասնակցել Եվրոպայի առաջնությանը, քանի որ տարիքով փոքր էի»:

Մայրս երբեք չի դիտում իմ ելույթները
 
«Երկու եղբայր ունեմ: Ավագ եղբայրս ժամանակին զբաղվել է ծանրամարտով, կրտսերը հիմա նույնպես զբաղվում է: Դեռ մեծ հաջողություններ չունի, բայց հուսամ՝ ամեն ինչ առջեւում է:

Իմ մրցումներին եղբայրս միշտ կողքիս է, բայց մայրս երբեք չի նայում իմ ելույթները: Բոլոր մայրերի պես նա շատ է անհանգստանում եւ չի կարողանում դիտել դրանք: Իմ ելույթների ժամանակ բոլոր բարեկամներս, ընկերներս հավաքվում են մեր տանը եւ հենց այնտեղ բոլորով ինձ համար ցավում են»:

Պատրաստեց Վերա Մարտիրոսյանը