80 տարեկանում մահացել է ՀՀ ֆիզկուլտուրայի և սպորտի վաստակավոր գործիչ, Հայաստանի Ազգային օլիմպիական կոմիտեի նախկին փոխնախագահ, «Հայաստան» մարզական միության նախկին նախագահ Ռազմիկ Անուշավանի Ստեփանյանը, հաղորդում է ՀԱՕԿ-ի կայքը:
«Շնորհալի ըմբիշ էր, Հայաստանի, ԽՍՀՄ և միջազգային բազմաթիվ մրցաշարերի հաղթող ու մրցանակակիր: Գործուն սպորտին հրաժեշտ տալուց հետո համալրել է հունահռոմեական ըմբշամարտի մարզիչների շարքը:
Կազմակերպչական հմտությունների շնորհիվ տարբեր պաշտոններ է վարել հարազատ «Սպարտակ» ԿՄԸ հանրապետական խորհրդում, դարձել կազմակերպության նախագահ, ապա միավորված հանրապետական հինգ ԿՄԸ-ների՝ «Հայաստան» մարզական միության փոխնախագահ և նախագահ:
Շուրջ երկու տասնամյակ զուգահեռաբար եղել է ՀԱՕԿ փոխնախագահ:
Անվանի մարզական գործիչը նպաստել է երկրում ֆիզկուլտուրայի և սպորտի մասսայականացման ու զարգացման գործին, որի համար արժանացել է տասնյակ պարգևների և կոչումների:
Հայաստանի ազգային օլիմպիական կոմիտեն ցավակցում է մարզաշխարհի երախտավորի ընտանիքին, հարազատներին և գործընկերներին:
Նրա հիշատակը վառ կմնա ճանաչողների հիշողությունում:
Հոգեհանգիստը տեղի կունենա սեպտեմբերի 20-ին, Շահումյանի գերեզմանատան հարակից «Զոլեր» սգո սրահում (Գրիգոր Հասրաթյան 25 / 3), ժամը 18:00-ին», նշվում է հաղորդագրությունում:
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։