Արմեն Բաբալարյան․ Աշխարհի առաջնության արդյունքները գնահատում եմ բավարար

Աշխարհի առաջնության արդյունքները գնահատում եմ բավարար: Պետք է աշխատենք սխալների վրա, նաեւ բարձրացնենք տղաների ինքնավստահությունը հաղթանակների նկատմամբ:

Այս մասին NEWS.am Sport-ի թղթակի հետ զրույցում Բելգրադից ասաց հունահռոմեական ըմբշամարտի Հայաստանի հավաքականի գլխավոր մարզիչ Արմեն Բաբալարյանը, որն ամփոփել է աշխարհի առաջնությունը:

Հիշեցնենք, որ Հայաստանի թիմը 8 մասնակցով նվաճել է երկու մեդալ՝ 1 ոսկե, 1 բրոնզե: Չորրորդ անգամ աշխարհի չեմպիոնի տիտղոսը նվաճեց օլիմպիական չեմպիոն Արթուր Ալեքսանյանը, բրոնզե մեդալակիր դարձավ Եվրոպայի գործող չեմպիոն Մալխաս Ամոյանը: Բրոնզե մեդալի համար գոտեմարտ անցկացրեց նաեւ 63 կգ քաշային Հրաչյա Պողոսյանը, որ ցավալի պարտություն կրեց եւ մնաց առանց մեդալի:

Հայաստանի մյուս 5 ներկայացուցիչներ Ռուդիկ Մկրտչյանը, Գեւորգ Ղարիբյանը, Սլավիկ Գալստյանը, Կարապետ Չալյանը եւ Դավիթ Օվասապյանը պարտություններ կրեցին եւ լքեցին պայքարը:

Պարոն Բաբալարյան, ամփոփեք աշխարհի առաջնությունը: 1 ոսկե եւ 1 բրոնզե մեդալները գոհացնո՞ւմ են Ձեզ:

Արդյունքները բավարար եմ գնահատում: Երբեք գոհ չեմ լինում, քանի դեռ աշխատանք կա անելու: Արթուր Ալեքսանյանը փայլուն մրցաշար անցկացրեց, փառահեղ հաղթանակ տարավ: Նրա ոսկե մեդալը սպասված էր: Մալխաս Ամոյանի բրոնզե մեդալը նույնպես գոհացնում է, բայց նա իր քաշային կարգում ֆավորիտներից է եւ կարող էր ոսկե մեդալի համար պայքարել: Թիմում աշխատանք կա անելու, ինչպես միշտ: Պետք է սխալների վրա աշխատենք, որպեսզի հաջորդ անգամ դրանք չկրկնենք:

Փորձենք անհատապես անդրադառնալ բոլորի մրցելույթներին: Նշեցիք, որ Մալխաս Ամոյանը կարող էր եզրափակիչի ուղեգիր նվաճել: Ի՞նչը պակասեց:

Մալխաս Ամոյանը առաջին գոտեմարտում եզրափակիչ գոտեմարտ անցկացրեց, այսպես կարելի է ասել, քանի որ նա մրցեց եզրափակիչի մասնակցի հետ: Հավասար պայքարում ավարտվեց գոտեմարտը՝ 3:3, վերջին միավորի առավելությամբ հաղթեց հունգարացի ըմբիշը: Սա նշանակում է՝ մրցակիցը նրան չէր գերազանցում: Ամոյանն ապացուցեց, որ սա պատահական պարտություն էր: Եթե Լեւային հանդիպեր երկրորդ-երրորդ գոտեմարտում, ավելի վստահ հաղթանակ կտաներ, ավելի լավ կգոտեմարտեր, որովհետեւ հաջորդ օրը սփոփիչ գոտեմարտերում նա գնալով բացվեց: Միշտ առաջին գոտեմարտը բարդ է ստացվում, մասնավորապես, երբ պայքարում ես ուժեղ մրցակցի հետ: Վիճակահանությունն այնպես ընկավ, որ առաջին գոտեմարտն իսկապես ասես՝ եզրափակիչ լիներ: Այնպես չէր, որ այդտեղ ինչ-որ մեկն Ամոյանից բարձր էր: Այսօր նա 77 կգ քաշային կարգում ֆավորիտներից մեկն է:

Մրցումները մի պարտությունով չեն ավարտվում: Մենք իրավունք չունենք մի պարտությունից ընկճվել: Առաջին օրվա պարտությունից հետո ոչ թե մարզիչները նրան օգնեցին տրամադրվել երկրորդ օրվա պայքարին, այլ ինքն իր մեջ հաղթահարեց: Ամոյանն այնպիսի մարզիկ է, որ ամեն ինչի պատրաստ է՝ պարտությունից չի խուսափում, չի ընկճվում, հաղթանակներից էլ օդերում չի սավառնում: Նա բարձր կարգի մարզիկ է, մարդ, տղա՝ ամեն բնորոշ հատկություններով օժտված:

Բրոնզե մեդալին շատ մոտ էր նաեւ Հրաչյա Պողոսյանը: Նրան ի՞նչը պակասեց:

Հրաչյա Պողոսյանի պարտությունն ամենացավոտն էր ինձ համար: Նա կարող էր բրոնզե մեդալ նվաճել: 3:0 հաղթում էր, ադրբեջանցուն բարձրացրեց, բայց այնտեղ, իմ կարծիքով, մրցակիցը ոտքով պաշտպանվեց: Վստահ չեմ կարող ասել: Չեմ ուզում նաեւ ասել, թե այնպես արեցին՝ պարտվի: Մենք տեսանք նրա կարողությունները, հնարքների բազան: Կաշխատենք սխալների վրա եւ հաջորդ տարի, կարծում եմ, ավելի վստահ հանդես կգա:

Մյուս մասնակիցների մասին ի՞նչ կասեք: Ինչպե՞ս կգնահատեք:

Սլավիկ Գալստյանը մեկ ամիս առաջ իր քաշային կարգում չեմպիոն դարձած սերբ ըմբիշին 8:0 հաշվով հաղթել էր Լեհաստանում: Այստեղ չհասկացա նրա հետ ինչ կատարավեց: Բողոքարկում ուզեց, գցեցինք, հետո խառնվեց, մի քանի անգամ էլ բողոքարկում ուզեց, ես չհամաձայնվեցի նրա հետ, հետո նորից ուզեց, գցեցինք: Կարողացավ լավ գոտեմարտ անցկացնել: 0:6 հաշվով պարտվելիս 7:6 հաշվով հաղթում էր, բայց էլի երկու միավոր տվեց: Ինձ թվում է՝ Սլավիկ Գալստյանը հաղթանակի հասնելու բանալին դեռ չի գտել: Դեռ պետք է զարգանա, որ կարողանա 7:7, 7:6 հաշիվների դեպքում դիմանա մինչեւ վերջ: Սա ավելի հոգեբանական հարց է, քան տեխնիկա-տակտիկական: Սլավիկը թույլ չի այս քաշային կարգում:

Կարապետ Չալյանը երկրորդ գոտեմարտում տակտիկական սխալի պատճառով պարտվեց: 1:1 հաղթում էր: Մրցավարն անընդհատ ասում էր՝ պասիվ, նրան թվաց թե գոտեմարտը կանգնեցրին, բայց սուլիչ չէր հնչել: Անկեղծ կլինեմ, նրա կարգի մարզիկն իրավունք չուներ նման սխալ թույլ տալ: Ես տեսա, որ նա նայում է մրցավարին: Հետեւից բղավեցի, որ չթուլանա: Այստեղ նա ավելի շատ միամիտ սխալ կատարեց: Եթե հաղթահարեր այս գոտեմարտը, կարող էր եզրափակիչի ուղեգրի համար պայքարել: Չեմ ասում՝ նրան կտեսնեինք եզրափակիչում, բայց կիսաեզրափակիչ կարող էր դուրս գալ: Նաեւ նշեմ, որ Չալյանը վնասվածքով մասնակցեց: Պետք է վերադառնանք եւ վիրահատվի:

Գեւորգ Ղարիբյանը կարող էր երկրորդ գոտեմարտում չպարտվել: Զիջեց: Չհասկացա՝ ինչ կատարվեց նրա հետ: Գոտեմարտից հետո զրուցել եմ նրա հետ: Այնպիսի բռնվածք էր, որ դժվար էր դուրս գալ: Խեղդող բռնված էր, չստացվեց: Ամեն պարտություն ունի իր վաղվա հաղթանակը: Պետք է աշխատենք, որ այսօրվա սխալները չկրկնենք:

Դավիթ Օվասապյանը երիտասարդների աշխարհի առաջնության եզրափակիչում հաղթել էր ամերիկացուն: Այստեղ էլ նույն հաշվով պարտվեց: Այստեղ նա երկու անգամ պարտերից աշխատելու հնարավորություն ստացավ եւ երկու անգամն էլ չօգտագործեց: Հաղթելու հնարավորություններ ունեցավ, բայց չօգտագործեց, չկարողացավ: 

Ռուդիկ Մկրտչյանը մեկ հաղթանակից հետո երկրորդում պարտվեց: Հնարքներ բաց թողեց: Թույլ էր, պարտվեց:

Ձեզ համար ինչպե՞ս անցավ առաջին պաշտոնական մրցաշարը որպես գլխավոր մարզիչ, ի՞նչ խնդիրներ ընդգծեցիք, որոնց վրա պետք է աշխատել:

Հավաքականում շատ աշխատանք ունենք անելու: Միշտ էլ աշխատելու տեղ կա: Անթերի մարզիկներ չկան: Պետք է աշխատենք սխալների վրա: Այս առաջնությունից ինձ համար մի քանի խնդիր առանձնացրեցի՝ տղաների հաղթողի հոգեբանությունը, տրամադրվածությունը պետք է բարձրացնել: Նրանք պետք է վստահ լինեն իրենց ուժերի վրա, որ կարողանան հաղթել: Սա անհատական սպորտ է եւ յուրաքանչյուրին անհատական մոտեցում է պահանջվում: Կան նաեւ տակտիկական, տեխնիկական խնդիրներ, որոնց վրա եւս պետք է աշխատել: Դրանք ավելի շատ մասնագիտական հարցեր են:

Ինձ համար որպես հավաքականի գլխավոր մարզիչ առաջին պաշտոնական մրցաշարն էր: Ինչպես արդեն նշել էի, նախորդ մրցաշարերից տարբերվում էր նրանով, որ այս անգամ պատասխանատվությունն ինձ վրա էր: Այս առումով ինձ համար մրցաշարը շատ լարված անցավ:

Լուսինե Շահբազյան