ԱԱ. Հրաչյա Պողոսյանը կպայքարի բրոնզե մեդալի համար, Գեւորգ Ղարիբյանի տպավորիչ հաղթանակը

Սերբիայի մայրաքաղաք Բելգրադում շարունակվող հունահռոմեական ըմբշամարտի աշխարհի առաջնության երրորդ մրցումային օրը պայքարի մեջ մտած Գեւորգ Ղարիբյանը մեկնարկեց տպավորիչ հաղթանակով: 1/16 եզրափակիչում 2020 թվականի Եվրոպայի չեմպիոնը տուշեով հաղթեց երիտասարդների Եվրոպայի կրկնակի չեմպիոն, մինչեւ 23 տարեկանների աշխարհի բրոնզե մեդալակիր, վրացի Պրիդոն Աբուլաձեին:

1/8-րդ եզրափակիչում Գեւորգ Ղարիբյանի մրցակիցը կլինի Ղազախստանի ներկայացուցիչ Աիդոս Սուլթանգալին:

Անհաջող մեկնարկ ունեցավ մինչեւ 23 տարեկանների աշխարհի եւ Եվրոպայի փոխչեմպիոն Դավիթ Օվասապյանը: Մեկնարկային գոտեմարտում  Օվասապյանը 1:1  հաշվով պարտվեց երիտասարդների աշխարհի փոխչեմպիոն, ԱՄՆ ներկայացուցիչ Քոլթոն Մայքլ Շուլցին՝ մրցակցի վերջին միավորի առավելությամբ:

Սեպտեմբերի 11-ին մրցագորգ դուրս եկած Հրաչյա Պողոսյանը բրոնզե մեդալի համար միակ սփոփիչ գոտեմարտում 9:1 հաշվով տպավորիչ հաղթանակ տարավ ռումինացի Ռազվան Արնաուտի նկատմամբ եւ երեկոյան մրցահերթում կպայքարի բրոնզե մեդալի համար: Պողոսյանը առաջին մրցափուլում միավոր չվաստակեց, երկրորդ մրցափուլում պարտերում աշխատելու հնարավորություն ստանալուց հետո երկու 4 միավորանոց գեղեցիկ գցումներով հաշիվը դարձրեց 9:1: Գոտեմարտն ավարտվեց ժամանակից շուտ: 

Աշխարհի Մ23 բրոնզե մեդալակիրը աշխարհի առաջնության բրոնզե մեդալը կվիճարկի Եվրոպայի կրկնակի փոխչեմպիոն, ադրբեջանցի Թալեհ Մամադովի հետ:

Երրորդ մրցումային օրը երեկոյան մրցահերթում ոսկե մեդալի համար գոտեմարտ կանցկացնի Օլիմպիական խաղերի ոսկե, արծաթե, բրոնզե մեդալակիր Արթուր Ալեքսանյանը, որը եզրափակիչում կպայքարի աշխարհի չեմպիոնի 4-րդ տիտղոսի համար: Մրցակիցը բուլղարացի 2018 թվականի աշխարհի փոխչեմպիոն, Եվրոպայի գործող չեմպիոն Կիրիլ Միլովն է:

Հայաստանի հավաքականի կազմում աշխարհի առաջնության բրոնզե մեդալակիր է դարձել 77 կգ քաշային Մալխաս Ամոյանը:

Հայաստանի մյուս ներկայացուցիչներ Սլավիկ Գալստյանը (67 կգ), Կարապետ Չալյանը (82 կգ) եւ Ռուդիկ Մկրտչյանը պարտություններ են կրել եւ լքել պայքարը: