Եվրոպայի առաջնությունում մասնակցեցի իմ հնարավորությունների առավելագույնով եւ շատ գոհ եմ իմ մրցելույթից: Մեր մարզաձեւում լինում են մրցավարական գործոններ, որոնց արդյունքում չես վաստակում այն գնահատականը, որը պատկերացնում էիր:
Այս մասին NEWS.am Sport-ի հետ զրույցում ասաց Եվրոպայի փոխչեմպիոն, աշխարհի գավաթակիր Վահագն Դավթյանը:
Օգոստոսի 18-21-ը Գերմանիայի Մյունխեն քաղաքում անցվացված սպորտային մարմնամարզության Եվրոպայի առաջնությունում Հայաստանի հավաքականը նվաճեց 5 մեդալ՝ 2 ոսկե, 3 արծաթե: Մեծահասակների պայքարում առանց մեդալի մնաց 2022 թվականի աշխարհի գավաթի փուլերում օղակների վարժությունում լավագույն արդյունքը ցույց տված Վահագն Դավթյանը:
Օլիմպիական բրոնզե մեդալակիր Արթուր Դավթյանը NEWS.am Sport-ի թղթակցի հետ զրույցում Մյունխենից դժգոհել էր Վահագն Դավթյանի մրցավարությունից: Նրա խոսքով, ինչպես իր՝ հենացատկի վարժության պարագայում, այնպես էլ Վահագն Դավթյանի դեպքում, կողմնապահություն է եղել:
Վահագն Դավթյանը գոհ է իր մրցելույթից: Ըստ նրա, այն եղել է իր լավագույն կատարումը:
«Ելույթս լավ եմ գնահատում: Անկախ նրանից, թե որերորդ տեղը զբաղեցրի, իմ կատարած վարժությունից իրոք գոհ եմ: Մեր մարզիչները, Հակոբ Սերբոյանը եւս շատ գոհ են իմ մասնակցությունից: Սա սպորտ է, այսպես էլ կարող պատահել, որ առանց մեդալ մնաս: Հնարավոր է, որ դու լավ կատարես քո վարժությունը, բայց վերջնական արդյունքը քո պատկերացրածով չլինի, որովհետեւ սա մարմնամարզություն է:
Մյունխենում ես կատարեցի իմ լավագույն վարժությունը: Մեր մարզաձեւում լինում են նաեւ մրցավարական գործոններ, ցածր են գնահատում: Այդպես էլ եղավ ինձ հետ, բայց չեմ ցանկանում դժգոհել մրցավարությունից: Բոլորի հետ էլ պատահում է այդպես, չնայած որ դու քո լավագույն ձեւով ես հանդես եկել: Իմ հնարավորությունների առավելագույնով եմ մասնակցել եմ»,- ասաց Վահագն Դավթյանը:
Եվրոպայի առաջնությունում Վահագն Դավթյանը 14.766 միավորով զբաղեցրել էր չորրորդ տեղը, բրոնզե մեդալ նվաճած անգլիացի Քորթնի Տուլոչը մեկ տասնորդականով էր գերազանցել աշխարհի գավաթակրին՝ 14.866: Օղակների վարժությունում 6-րդ անգամ Եվրոպայի չեմպիոնի տիտղոսը նվաճեց Ռիոյի Օլիմպիական խաղերի չեմպիոն, աշխարհի եռակի, Եվրոպայի 5-ակի չեմպիոն, հույն Էլեֆտերիոս Պետրոունիասը:
Լուսինե Շահբազյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։