Հայաստանի առաջատար եռացատկորդ Լեւոն Աղասյանը վնասվածքի պատճառով բաց կթողնի աթլետիկայի աշխարհի առաջնությունը: Այս մասին NEWS.am Sport-ի թղթակցի հետ զրույցում հայտնեց Լեւոն Աղասյանը, որն այս օրերին բուժում է անցնում Երեւանում:
Հուլիսի 15-24-ը ԱՄՆ-ի Օրեգոն նահանգի Յուջին քաղաքում տեղի կունենա աթլետիկայի աշխարհի առաջնությունը, որին Հայաստանից կմասնակցի վազորդ Երվանդ Մկրտչյանը:
Լեւոն Աղասյանը նախորդ մրցաշարում ստացած վնասվածքից հետո դեռ չի վերականգնվել:
«Նախորդ մրցաշարում ոտքի վնասվածք ստացա կրնկի հատվածում: Որոշակի բուժում անցա եւ սկսեցի պատրաստվել աշխարհի առաջնությանը: Վերջին մարզումային օրերին կրնկիս ցավը նորից գլուխ բարձրացրեց եւ որոշեցինք ռիսկի չգնալ, որպեսզի վնասվածքն ավելի չխորանա:
Պատրաստվել էի աշխարհի առաջնությանը, այժմ էլ լավ մարզավիճակում եմ, բայց այս առաջնությունը բաց կթողնեմ, որպեսզի լիարժեք ապաքինվեմ: Այս շրջանում Երեւանում բուժում եմ անցնում»,- ասաց Լեւոն Աղասյանը:
Աշխարհի առաջնությում Հայաստանի միակ մասնակից Երվանդ Մկրտչյանը հանդես կգա 1500 մետր վազքում: Վազորդը Հայաստանի աթլետիկայի ֆեդերացիայի նախագահ Ռոբերտ Էմմիյանի հետ արդեն մրցավայրում է:
Աշխարհի առաջնությանը հայտավորված են 192 երկրների 1900 ներկայացուցիչներ։
Լուսինե Շահբազյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։