ԵԱ. Արթուր Հովհաննիսյանն ու Բարեղամ Հարությունյանը լքեցին պայքարը (ֆոտո, վիդեո)

Երեւանում անցկացվող տղամարդկանց բռնցքամարտի Եվրոպայի առաջնության քառորդ եզրափակիչում Հայաստանի ներկայացուցիչներ Արթուր Հովհաննիսյանն ու Բարեղամ Հարությունյանը պարտվություն կրեցին եւ լքեցին պայքարը:

Եվրոպայի կրկնակի չեմպիոն Արթուր Հովհաննիսյանի 51 կգ քաշայինների պայքարում մրցեց Իսպանիայի ներկայացուցիչ Մարտին Սալվադոր Մոլինային եւ պարտվեց մրցավարների որոշմամբ: Արթուր Հովհաննիսյանն առաջին մենամարտն էր անցկացնում Եվրոպայի առաջնությունում:

Երեք ռաունդներում չնայած հայ բռնցքամարտիկն ակտիվ էր, դիպուկ հակագրոհներ էր կատարում, պրեսինգի ենթարկում մրցակցին, բայց նաեւ բաց էր թողնում իսպանացու հարվածները: Բոլոր երեք ռաունդներում մրցավարներն առավելությունը տվեցին իսպանացի բռնցքամարտիկին:

Բարեղամ Հարությունյանի 48 կգ քաշայինների քառորդ եզրափակիչում պարտվեց վրացի Սախիլ Ալախվերդովին:

Բարեղամ Հարությունյանը եւս առաջին մենամարտն էր անցկացնում:

Ցերեկային մրցահերթում ռինգ դուրս կգան նաեւ Հովհաննես Բաչկովը, Դավիթ Չալոյանը եւ Համբարձում Հակոբյանը: Տոկիոյի Օլիմպիական խաղերի բրոնզե մեդալակիր, աշխարհի եռակի բրոնզե մեդալակիր, Եվրոպայի կրկնակի չեմպիոն Հովհաննես Բաչկովը 63,5 կգ քաշայինների քառորդ եզրափակիչում կմրցի Չեխիայի ներկայացուցիչ Պյոտր Նովակի հետ:

Աշխարհի փոխչեմպիոն Դավիթ Չալոյանը (+92 կգ) կիսաեզրափակիչի ուղեգրի համար կպայքարի իսպանացի Այուբ Ղադֆա Դրիսիի հետ: 

Համբարձում Հակոբյանը (80 կգ) մրցակիցը կլինի խորվաթ Լուկա Պլանտիչը: Մենամարտը տեղի կունենա B ռինգում 16:00-ից: Երեկոյան մրցահերթում սպասվում է հայ-թուրքական դիմակայություն: 57 կգ քաշայինների քառորդ եզրափակիչում Արթուր Բազեյանը կմրցի Թուրքիայի ներկայացուցիչ Բաթուհան Չիտֆչիի հետ: Մենամարտը տեղի կունենա 19:00-ին B ռինգում: Գուրգեն Մադոյանը(67կգ) կմրցի վրացի Լաշա Գուրուլի հետ, իսկ Ռաֆայել Համբարձումյանի (86 կգ) մրցակիցը բելգիացի Վիկտոր Շչելստրայետն է: Երկու բռնցքամարտիկների մենամարտերը տեղի կունենան А ռինգում հաջորդաբար 19:00-ից հետո: 5-րդ մրցումային օրվա Հայաստանի ամենավերջին մասնակիցը կլինի 92 կգ քաշային Նարեկ Մանասյանը, որը B ռինգում կմենամարտի Հունաստանի ներկայացնող Վահան Նանիջանյանի հետ: