Կարեն Աղամալյան․ Կարեն Տոնականյանն իր բռնցքամարտը ցույց չտվեց

21:11   25 մայիսի, 2022

Բռնցքամարտի Հայաստանի հավաքականի գլխավոր մարզիչ Կարեն Աղամալյանն ամփոփել է Եվրոպայի առաջնության երրորդ մրցումային օրը:

13 բռնցքամարտիկով Եվրոպայի առաջնությանը մասնակցող Հայաստանի հավաքականը մայիսի 25-ին երեք մասնակից ուներ, որոնցից հաղթանակ տարավ միայն 86 կգ քաշային Ռաֆայել Հովհաննիսյանը: Կարեն Տոնականյանն(60 կգ) ու Վախթանգ Հարությունյանը (75 կգ) պարտվեցին եւ դուրս մնացին պայքարից:

«Կարեն Տոնականյանից հաղթանակ էինք սպասում, բայց չստացվեց: Նա իր մենամարտը չարեց: Չեմ կարող ասել՝ վնասվածքը խանգարեց, թե ոչ, բայց նա իր բռնցքամարտը ցույց չտվեց:

Այսօր մեզ ուրախացրեց Ռաֆայել Հովհաննիսյանը: Նա գերազանց մենամարտ անցկացրեց: Երկու ռաունդ մինչեւ վերջ աշխատեց, վերջին ռաունդում՝ մինչեւ 2 րոպե 50 վայրկյան փայլուն աշխատանք կատարեց: Միայն վերջին վայրկյաններին իր համար բարդություններ ստեղծեց: Ամեն դեպքում գեղեցիկ հաղթանակ տարավ: Ռաֆայել Հովհաննիսյանը երկար ժամանակ մեծ ռինգ դուրս չէր եկել: Հաջորդ մենամարտում ավելի ուշադիր կլինի եւ զերծ կմնա խնդիրներից:

Վախթանգ Հարությունյանի մենամարտի մասին լավ բան ասել չեմ կարող»,- ասաց Կարեն Աղամալյանը:

Մայիսի 26-ին Եվրոպայի առաջնության ռինգ են դուրս գալու Հովհաննես Բաչկովը, Դավիթ Չալոյանը, Գուրգեն Մադոյանը եւ Նարեկ Մանասյանը:

Լուսինե Շահբազյան

Ֆոտո՝ Էմմա Ասատրյան 



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։