Ռաֆայել Հովհաննիսյան․ Շատ ոգեւորված էի, որ տանն ենք մասնակցում Եվրոպայի առաջնությանը

17:42   25 մայիսի, 2022

Մենամարտի ընթացքում շատ ոգեւորված էի, որ տանն ենք մասնակցում Եվրոպայի առաջնությանը:

Այս մասին լրագրողների հետ զրույցում ասաց Ռաֆայել Հովհաննիսյանը՝ մեկնաբանելով առաջին հաղթանակը Եվրոպայի առաջնությունում:

Եվրոպայի առաջնության երրորդ մրցումային օրը Հայաստանի հավաքականից պայքարի մեջ մտած 86 կգ քաշային Ռաֆայել Հովհաննիսյանը մեկնարկային 1/16 եզրափակիչում բացարձակ առավելությամբ հաղթեց Բուլղարիան ներկայացնող Քրիստիան Դմիտրիովին:

«Մեծ ոգեւորություն ունեի ամբողջ մենամարտի ընթացքում, քանի որ տանն ենք մենամարտում, այսպիսի աջակցություն կա: Այդ ոգեւորությունից էր նաեւ, որ մենամարտի ընթացքում հանդիսատեսին ողջունեցի:

Փորձի պակաս ունեմ, հաջորդ անգամ ավելի կկենտրոնանամ մենամարտիս վրա, այնպես կանեմ, որ ամեն ինչ գծած լինի: Մրցակիցս տարիքով մեծ էր, երեւի դա էր պատճառը, որ լիարժեք չպայքարեց»,- ասաց Ռաֆայել Հովհաննիսյանը:

Հիշեցնենք, որ Հայաստանի մյուս ներկայացուցիչ Վախթանգ Հարությունյանը ցավալի պարտություն կրեց: 75 կգ քաշայինների 1/16 եզրափակիչում Հարությունյանը մենամարտեց Գերմանիան ներկայացնող Կեւին Շչումանին եւ պարտվեց միավորներով:

Երեկոյան մրցահերթում պայքարի մեջ կմտնի Եվրոպական խաղերի բրոնզե մեդալակիր, 60 կգ քաշային Կարեն Տոնականյանը: 1/16 եզրափակիչում Հայաստանի ներկայացուցիչի մրցակիցը կլինի հունգարացի Ռոլանդ Վերեսը:



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։