ԵԱ. Ռաֆայել Հովհաննիսյանը մեկնարկեց վստահ հաղթանակով, Վախթանգ Հարությունյանը պարտվեց

16:31   25 մայիսի, 2022

Երեւանում բռնցքամարտի Եվրոպայի առաջնության մրցումային երրորդ օրը Հայաստանի հավաքականից պայքարի մեջ մտավ 86 կգ քաշային Ռաֆայել Հովհաննիսյանը: Մեկնարկային 1/16 եզրափակիչում Հայաստանի ներկայացուցիչը բացարձակ առավելությամբ հաղթեց Բուլղարիան ներկայացնող Քրիստիան Դմիտրիովին:

Առաջին ռաունդից Հայաստանի հավաքականի անդամը մեծ առավելություն ուներ: Մեկնարկային րոպեներին Հովհաննիսյանը նոկդաունի ենթարկեց մրցակցին, որից հետո ռինգի մրցավարը հաշիվ բացեց: Այս ռաունդում մրցավարները 5:0 հաշվով հաղթանակը տվեցին Ռաֆայել Հովհաննիսյանին:

Երկրորդ եւ երրորդ ռաունդներում էլ հայ բռնցքամարտիկը շատ ակտիվ էր, փորձում էր նոկաուտի ենթարկել բուլղարացուն, բայց մրցակիցը մինչեւ վերջ չհանձնվեց:

Մարզահամերգայինի տրիբունաները շատ ակտիվ աջակցում էին հայ բռնցքամարտիկին: Հայ երկրպագուներին միացել էին նաեւ մյուս երկրների երկրպագուները եւ հայերի հետ միասին «Armenia» էին վանկարկում: Ռաֆայել Հովհաննիսյանը մենամարտի ընթացքում հասցրեց նաեւ ողջունել երկրպագուներին, որ ուրախության ավելի մեծ ալիք բարձրացրեց տրիբունաներում:

Հայաստանի մյուս ներկայացուցիչ Վախթանգ Հարությունյանը ցավալի պարտություն կրեց:

75 կգ քաշայինների 1/16 եզրափակիչում Հարությունյանը մենամարտեց Գերմանիան ներկայացնող Կեւին Շչումանին եւ պարտվեց միավորներով:

Երեկոյան մրցահերթում պայքարի մեջ կմտնի Եվրոպական խաղերի բրոնզե մեդալակիր, 60 կգ քաշային Կարեն Տոնականյանը:

1/16 եզրափակիչում Հայաստանի ներկայացուցիչի մրցակիցը կլինի հունգարացի Ռոլանդ Վերեսը:



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։