Եվրոպայի մեդալակիր եմ, 4 ամիս է 10 դրամ չեմ ստանում: Վնասվածքներս իմ միջոցներով եմ բուժում, ֆեդերացիան, նախարարությունն ասում են՝ կտրոնները պահիր, հետո կտանք: Եվրոպայի առաջնության ենք գնում առանց մարզահագուստի: Այսպես սպորտ չեն պահում:
Հունահռոմեական ըմբշամարտի Հայաստանի հավաքականում առկա խնդիրների մասին ասուլիսում պատմեց 2020 թվականի Եվրոպայի չեմպիոն, Եվրոպայի բրոնզե մեդալակիր Գեւորգ Ղարիբյանը:
Ապրիլի 7-ին հունահռոմեական ըմբշամարտի Հայաստանի հավաքականի մարզիչները, Եվրոպայի նորընծա չեմպիոն եւ բրոնզե մեդալակիրները լրագրողների հետ հանդիպմանն առաջին անգամ բարձրաձայնեցին հավաքականում առկա խնդիրների մասին:
Մարզիկները խոսեցին աշխատավարձերի բացակայության, վիտամիններ չստանալու, վնասվածքները սեփական միջոցներով բուժելու եւ շատ այլ խնդիրների մասին: Եվրոպայի բրոնզե մեդալակիր Գեւորգ Ղարիբյանի խոսքով, արդեն տեւական ժամանակ մարզիկները, այդ թվում եւ ինքը աշխատավարձ չեն ստանում:
«Որեւէ մեկը լուծում չի տալիս մեր խնդիրներին: Թիմում տղաներ կան, այդ թվում նաեւ ես, որ մոտ 5-6 ամիս 10 դրամ գումար չենք ստացել: Այսօր առաքիչն ավելի լավ է ապրում, քան մեր թիմի անդամները, Հայաստանի չեմպիոնը, Եվրոպայի մեդալակիրը: Ես ինքս 4 ամիս չեմ վարձատրվում: Մեզ ոչ մի կառույց չի օգնում՝ ֆեդերացիա, նախարարություն, Օլիմպիական կոմիտե:
Չենք ասում՝ մեզ շատ տվեք, մյուսներին քիչ տվեք, բայց վերաբերմունք կա: Մեծ մարդիկ ենք 27-30 տարեկան: Տղաներ կան կին, երեխա ունեն, ընտանիք են պահում: Մարզիչները, երկրորդ մարզիչները, բժիշկը աշխատավարձ չեն ստանում: Չենք ուզում բողոքող լինել, բայց այսպես այլեւս հնարավոր չի շարունակել: Վնասվածք եմ ստացել Եվրոպայի առաջնությունից առաջ: Տեղյակ եմ պահել ֆեդերացիային, նախարարությանը: Ասում եմ՝ լուրջ գումարների մասին է խոսքը, ամեն օր տոկեր եմ ստանում, գոնե օգնեք: Ինձ պատասխանում են՝ գնա արա, կգաս չեկերը պահի կտանք: Սա պատասխան չի, այսպես սպորտ չեն պահում:
Գնում ենք Եվրոպայի առաջնության, 4 ամիս վիտամին չունենք, մարզահագուստ չունենք: Ամոթ է մեր մարզաձեւի համար: Գնում ենք տարբեր մարզահագուստներով, կողքից հավաքականի նման չենք։ Տարբեր մարզահագուստներով, ասես՝ փողոցից տղաների խումբ լինենք»,- մանրամասնեց Գեւորգ Ղարիբյանը:
Աշխարհի եւ Եվրոպայի բրոնզե մեդալակիր Սլավիկ Գալստյանի խոսքով, ոչ միայն ըմբիշների, մյուս մարզաձեւերի ներկայացուցիչների նկատմամբ Հայաստանում չկա արժանի վերաբերմունք:
«Օրինակ բերվեց մարմնամարզիկներին, որ նրանք ավելի վատ պայմաններում շատ լավ արդյունքներ են անում եւ քիչ են պահանջում, մենք շատ ենք պահանջում: Մենք չենք ուզում որեւէ մի մարձաձեւ քիչ ֆինանսավորվի, մենք շատ: Թող ամեն մեկն արժանի ֆինանսավորվի: Գումարների խնդիրը չի միայն, աշխատավարձեր չստանալու հարցը միայն: Խնդիրները շատ են: Այսքան ժամանակ սպասել ենք, որ մեր արժանի պատասխանը կստանանք: Մեր երկրում մարզիկի նկատմամբ չկա այն վերաբերմունք, որին նրանք արժանի են»,- նկատեց Սլավիկ Գալստյանը:
Եվրոպայի նորընծա չեմպիոն Մալխաս Ամոյանն էլ ավելացրեց. «Վերաբերմունքը միայն ֆինանսականը չէ: Մարզիկներին պետք է հետեւեն, հետաքրքրվեն, մարզումներով, ֆիզիկական վիճակով: Գումարը, աշխատավարձն էլի իր նշանակությունն ունի, ինչպես յուրաքանչյուր մարդու համար, բայց նաեւ պետք է այլ տեսանկյունից էլ ուշադրություն դարձնել մարզիկներին»,- նշեց Մալխաս Ամոյանը:
Հավաքականի գլխավոր մարզիչ Էդուարդ Սահակյանի խոսքով, եթե խնդիրներին լուծում չտրվի, հունահռոմեական ոճի ըմբշամարտը կվերանա:
«Մեր մարզաձեւում մանրուք չկա: Եթե մի տեղ չենք հասցնում, մյուս տեղում հետ ենք ընկնում: Նախորդ տարի Եվրոպայի առաջնությունում թիմային հաշվարկում 3-րդն էինք, այս տարի 5-րդն ենք: Եթե այսպես շարունակվի եւ մեր խնդիրների լուծումներ չտրվեն, հաջորդ Եվրոպայի առաջնությունում չգիտեմ, թե որերորդ տեղում կլինենք: Խնդիրների մասին միայն մրցումից մրցում չպետք է խոսել: Մենք ունենք վիտամինիզացիայի խնդիր: Այն խիստ անհրաժեշտ է յուրաքանչյուր մարզիկի: Գոտեմարտերի արանքում 20 րոպե ժամանակ է: Եվրոպայի առաջնությունում մեր շուրջն իսկական լաբորատորիաներ էին, ուրիշ երկրների մարզիկները գոտեմարտի ավարտից գալիս, վերականգնվում էին: Մեր կողքը մեր մարզիկի համար ջուր է, թեյ, լավագույն դեպքում միրգ:
Մեր տղաները չեն ստանում այն վիտամինները, որ հասցնեն այդ կարճ ժամանակում վերականգնվել: Ըմբիշները լացկան չեն, ոչ էլ բողոքական: Ուղղակի հիմա անհրաժեշտություն է այս խնդիրների մասին հիշեցնել, խոսել, բարձրաձայնել: Աշխատավարձ, վիտամիններ, մարզահագուստ, այս խնդիրները պետք է լուծել: Եթե չենք ուզում մարզաձեւը վերանա, պետք է լուծում տանք, հակառակ դեպքում փոսը կընկնի, չենք կարողանա հանել, որովհետեւ խնդիրները գնալով ավելի են խորանում»:
Հիշեցնենք, Բուդապեշտում անցկացված Եվրոպայի առաջնությունում Հայաստանի թիմը 7 մասնակցով նվաճեց 4 մեդալ։ 77 կգ քաշային կարգում չեմպիոնի տիրղոսը նվաճեց Մալխաս Ամոյանը։ Բրոնզե մեդալակիրներ դարձան Ռուդիկ Մկրտչյանը (55կգ), Գեւորգ Ղարիբյանը (60 կգ) եւ Սլավիկ Գալստյանը (67 կգ)։
Լուսինե Շահբազյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։