Նատալյա Ռոտենբերգ. Այո, ես հրավիրել եմ մարզիչներին իմ ամուսնու կուսակցություն

14:29   30 մարտի, 2022

Այո, սա նորմալ քաղաքական գորընթաց է, եւ ես հրավիրել եմ մարզիչներին իմ ամուսնու կուսակցությունը համալրելու համար: Մարդը ընտրության հնարավորություն ունի: Հիմա էլ եմ հրավիրում բոլորին: Ես շարունակելու եմ լինել քաղաքականությունում։

Մարտի 29-ին Հայաստանի մարմնամարզության ֆեդերացիան պաշտոնապես հայտարարեց Նատալյա Ռոտենբերգին ՀՄՖ փոխնախագահի պաշտոնից ազատելու եւ համագործակցությունը դադարեցնելու մասին: Ֆեդերացիան եւ նախագահ Գագիկ Վանոյանն ավելի ուշ մեկնաբանեցին, որ նման որոշում կայացնելու պատճառը սպորտը քաղաքականությունից հեռու պահելու նպատակն է:

ՀՄՖ նախագահը NEWS.am Sport-ին հայտնել էր, որ Նատալյա Ռոտենբերգին փոխնախագահի պաշտոնից հեռացնելու պատճառը մարզիչներին քաղաքական կուսակցության անդամ դարձնելուն միտված քայլերն են եղել նրա կողմից:

«Նախքան իրադարձություններին անդրադառնալը՝ ցանկանում եմ ամփոփել հայկական գեղարվեստական մարմնամարզությունում իմ 4-ամյսա գործունեությունը: 

Ես մարզաձեւի հետ սկսել եմ աշխատել դեկտեմբերից: Այս կարճ ժամանակահատվածում մեծ գործ ենք արել: Ես այցելել եմ գրեթե բոլոր մարզադպրոցներ, ծանոթացել մարզաձեւի խնդիրներին: Անցկացրել եմ հատուկ նպատակային մրցաշար, որը միտված էր հասկանալ ոչ միայն հայ մարզուհիների ներուժը, այլեւ մարզիչների աշխատանքը: Ես պայմանավորվածություն եմ ձեռք բերել «Գազպրոմ-Արմենիայի» հետ, որպեսզի այնտեղ նույնպես ունենանք լավ պայմաններով մարզումներ: Ձեռք եմ բերել գորգ մարզիկների համար: Իմ անձնական միջոցներով կազմակերպել եմ ուսումնամարզական հավաք Ծաղկաձորում, որն անցկացնելու համար Հայաստան եմ հրավիրել Ռուսաստանի օլիմպիական հավաքականից Եկատերինա Պիրաժկովային: Նա հրաշալին աշխատանք է կատարել երեխաների հետ: Իմ նախաձեռնությամբ գեղարվեստական մարմնամարզությունն արդեն ունի եւս երկու միջազգային կարգի մրցավար: Նաեւ դրսից հրավիրել եմ միջազգային կարգի մրցավարի, ռուս Աննա Սվիրինա: Նա երկրորդ կատեգորիայի մրցավար է, մարզիչ: Ռուսաստանից է, բայց արդեն ունի հայկական անձնագիր եւ ներկայացնում է Հայաստանը:

Ես կազմակերպել եմ սեմինարներ, որոնց շատերը չէին ցանկանում մասնակցել: Ուզում եմ ընդգծել Շահինյանի անվան մարզադպրոցը, որը բացահայտ բոյկոտեց իմ սեմինարները, նաեւ այնտեղի մարզիչները չցանկացան աշխատել ինձ հետ: 

Ես կարողացա այս մարզաձեւի նկատմամբ հետաքրքրություն առաջացնել: Նախարարությունն արդեն «թաղել» էր այս մարզաձեւը, բայց միայն իմ ներկայությունը, միայն ինձանով գեղարվեստական մարմնամարզության նկատմամբ ուշադրությունը մեծացավ:

Ես նաեւ ունեի տարվա աշխատանքային պլան եւ արդեն նախագծած մրցաշարեր, սեմինարներ, գործեր, որոնք միտված էին Հայաստանում մարզաձեւի զարգացմանը: Այժմ այդ ամենը հանձնում եմ ֆեդերացիային: Մենք ունենք մրցաշարեր, որոնց արդեն հայտեր ենք ներկայացրել, հուսամ ֆեդերացիայի նախագահն ամեն ինչ կանի, որպեսզի մեր մարզուհիները հնարավորություն ունենան մասնակցել մրցաշարերի, ճանապարհորդել, ունենալ ուսումնամարզական հավաքներ:

Այդպես օրինակ, արդեն մայիսին նախատեսված էր մեծ հավաք Ծաղկաձորում, որին մասնակցելու էին 100 մարզուհի: Պարոն Վանոյանը խոստացել է հոգալ այդ հավաքի ծախսերը, այնպես ինչպես ես հոգացի առաջին հավաքի ծախսերը: Մտադրված էի այդ հավաքին եւս մեկ անգամ հրավիրել Եկատերինա Պիրաժկովային, որպեսզի նա ամրապնդեր այն ամենն, ինչ սովորեցրել էր առաջին հավաքի ժամանակ: Բայց այլեւս Եկատերինա Պիրաժկովան անվճար չի գա Հայաստան, նա մեծ գումարներ արժի»,- ասաց Նատալյա Ռոտենբերգը:

Անդրադառնալով ֆեդերացիայի փոխնախագահի պաշտոնից իրեն հեռացնելու եւ ֆեդերացիայի հետ համագործակցությունը խզելու մասին, Ռոտենբերգը նշեց.

«Ես ոչինչ չեմ կորցրել, նրանք են կորցրել: Ինձ չեն հեռացրել: Հեռացնում են այն մարդուն, ում աշխատավարձ են տալիս: Ես աշխատավարձ չեմ ստացել, ինչը նշանակում է՝ ինձ չեն հեռացրել: Սա իմ անձնական նախաձեռնությունն է եղել մտնել գեղարվեստական մարմնամարզություն: Ես իմ հեռանալու եւ փոխնախագահի կարգավիճակից ազատվելու մասին իմացել եմ ուրիշ մարդկանցից: Ինձ որեւէ մեկը նույնիսկ չի հրավիրել հանդիպման, ֆեդերացիան, սպորտի նախարարությունը համարձակություն չեն ունեցել ինձ կանչել հանդիպման եւ ասել, որ ես ինչ–որ բանը սխալ եմ անում, ինչը նրանց դուրս չի գալիս: Ամեն ինչ արվել է շատ կտրուկ:

Ինչ վերաբերում է իմ քաղաքական գործունեությանը, գաղտնիք չէ, որ ես զբաղվում եմ քաղաքականությամբ: Ես մեկ տարի առաջ էլ եմ զբաղվել քաղաքականությամբ, մասնակցել եմ վարչապետի ընտրություններին: Ես եկել եմ Հայաստան քաղաքականության միջոցով հանուն ամուսնուս: Եթե ինչ-որ մեկին թվում էր, թե ես գեղարվեստական մարմնամարզություն մտնելով պետք է դադարեցնեմ իմ քաղաքական գործունեությունը, չարաչար սխալվել է: Ես պիտի լինեմ քաղաքականությունում: Ես ուսումնասիրել եմ եւ իմացել, որ Հայաստանում օրենքը չի արգելում քաղաքական գործիչին լինել նաեւ սպորտում, այդպես օրինակ՝ Գագիկ Ծառուկյանը քաղաքական գործիչ է եւ զուգահեռ Օլիմպիական կոմիտեի նախագահ, ձեր նախկին նախագահ Սերժ Սարգսյանը՝ երկրի նախագահ էր եւ համատեղ շախմատի ֆեդերացիայի նախագահ: Ամեն մարզիկ հանդիսանում է այս կամ այն կուսակցության անդամ: Այստեղ սպորտը եւ քաղաքականությունը համատեղելու խնդիրը չէր: Սա չի պատճառը, որ ինձ ազատել են փոխնախագահի պաշտոնից: Պատճառն այն է, որ ես հաջողում էի, ես սկսել էի դուր գալ մարդկանց, ես հեղինակություն էի ձեռք բերել, մարդիկ սկսել էին ինձ վստահել եւ կանգնել իմ կողքին: Այս ամենի պատճառը վախերն էին, որոնք ունեցավ ֆեդերացիան կամ երեւի կառավարությունը: Սա վախ է, որ գուցե ես կարողանամ բնակչության մեծ մասին գրավել իմ կողմը:

Երբ ինձ ասում են, որ ես օգտագործել եմ մարզաձեւը, մարզիչներին, ծնողներին իմ գաղափարներին, քաղաքական հայացքներին ներգրավելու նպատակով, հիմա էլ հայտարարում եմ՝ սիրելի ծնողներ, մարզիչներ, եկեք իմ կողմ, ընդունեք իմ քաղաքական հայացքները: Եթե դուք ցանկություն ունեք, որ ձեր երկրում ինչ-որ բան փոխվի դեպի լավը, կանգնեք իմ կողքին:

Հայտնի է, որ վերջին շրջանում պարոն Արզաքանցյանը բացում է կուսակցություն, որը գլխավորելու է: Ես էլ որպես նրա կին՝ լինելու եմ նրա կողքը, լինելու եմ կուսակցության անդամ: Ես նրա հետ գնալու եմ մինչեւ վերջ: Այս պատճառով այո, ես հրավիրել եմ մարզիչներին իմ ամուսնու կուսակցությունը համալրելու համար, մեր կուսակցության անդամ լինել: Սա նորմալ քաղաքական գործընթաց է, քաղաքական հայացքների քարոզչություն: Եվ ես շարունակելու եմ բոլորին խորհուրդ տալ անդամակցել մեր կուսակցությանը: Մարդ ընտրության հնարավորություն ունի»,- մանրամասնեց Նատալյա Ռոտենբերգը:

Լուսինե Շահբազյան



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։