Վարդան Մինասյան. Հենրիխ Մխիթարյանի հեռանալով՝ հայկական ֆուտբոլի մի ամբողջ դարաշրջան գրեթե ավարտվեց

Հենրիխ Մխիթարյանը մոտիվացիայի պակաս երբեք չի ունեցել ազգային հավաքականի խաղերում: Երբ ես էի հավաքականի մարզիչը, երբեք չեմ տեսել, որ Մխիթարյանը դաշտում ինչ-որ բան անի կիսով չափ կամ չուզենալով: Նրա մոտիվացիան միշտ բարձր է եղել:

Այս մասին NEWS.am Sport-ի թղթակցի հետ զրույցում ասաց ֆուտբոլի Հայաստանի ազգային հավաքականի նախկին գլխավոր մարզիչ Վարդան Մինասյանը՝ մեկնաբանելով իտալական «Ռոմայի» 33-ամյա կիսապաշտպան Հենրիխ Մխիթարյանի հայտարարությունը ազգային թիմում կարիերան ավարտելու մասին։

«Ինձ համար անակնկալ էր Հենրիխ Մխիթարյանի այս որոշումը: Համենայն դեպս՝ սա այն որոշումն էր, որը, վստահ՝ նրան շատ դժվար է տրվել: Նա 15 տարի անցկացրել է հավաքականում, եղել է ավագ, առաջատար: Կարծում եմ՝ այս որոշման շուրջ Մխիթարյանը շատ երկար է մտածել: Ամեն դեպքում՝ պետք է հարգենք նրա որոշումը, շնորհակալություն հայտնենք այն ամենի համար, ինչ նա արել է խաղադաշտում եւ խաղադաշտից դուրս:

Նորանկախ Հայաստանում հայկական ֆուտբոլն ասոցացվել եւ ասոցացվում է  Մխիթարյանի հետ: Երբ ասում ենք հայ ֆուտբոլիստ, բոլորիս մոտ էլ առաջինը Հենրիխ Մխիթարյանի անունն է գալիս: Նա իր օրինակով, դաշտում, թե դաշտից դուրս շատ բան է տվել հայկական ֆուտբոլին եւ ոչ միայն: Շատ մարդիկ, երկար տարիներ լինելով սպորտում կամ քաղաքականության մեջ, այդքան օգուտ չեն տվել մեր երկրին, հայ ազգին:

Պատճառների մասին դժվար է խոսելը: Կարդացել եմ՝ ինչ է գրել: Եթե ինչ-որ խորքային հարցեր կան, կարծում եմ՝ միայն նա կարող է պատասխանել: Ինքս չեմ կարող մեկնաբանել, թե ինչու որոշեց հեռանալ հավաքականից: 

30-ից հետո բոլոր ֆուտբոլիստները, որոնք բարձրակարգ ակումբներում եւ առաջատար առաջնություններում են խաղում, շատ ուժ եւ հույզեր են վատնում, որովհետեւ այնտեղ ամեն ինչ շատ ինտենսիվ է, դինամիկ: Այս պարագայում երկու բեւեռով խաղալը հաճախ բարդ է լինում: Հենրիխ Մխիթարյանը 33 տարեկան է, բայց չեմ կարծում, որ տարիքային խնդիր կա, քանի որ նա այնպիսի գենետիկա ունի, որ դեռ երկար տարիներ կարող է լինել բարձրակարգ ֆուտբոլում:

Հավաքականի արդյունքների պահանջը հիմնականում գլխավոր մարզիչից է լինում: Երկրպագուները, հանրությունը նաեւ պահանջում է այն ֆուտբոլիստներից, որոնք լիդերներն են, թիմը տանողները: Բնական է, որ պարտությունների դեպքում քննադատությունների առաջին ալիքի տակ մարզիչն ու լիդերներն են ընկնում:

Երբ ես էի հավաքականի մարզիչը, երբեք չեմ տեսել, որ Մխիթարյանը դաշտում ինչ-որ բան անի կիսով չափ կամ չուզենալով: Նրա մոտիվացիան միշտ բարձր է եղել: Բնական է, որ կարող է մի խաղ չստացվել ֆուտբոլիստի մոտ, բայց մոտիվացիայի պակաս երբեք չի ունեցել ազգային հավաքականի խաղերում: Ուղղակի, մենք խնդիր ունենք մեր տղաներին գնահատելու հարցում: Պետք է կարողանանք անհահաջողություններից հետո չքննադատել, բարձր գնահատել: Մեր ազգի մոտ կա այդ խնդիրը: Պետք չի ընկնել ծայրահեղությունների մեջ, մեր տղաներին, նույն հաջողությամբ մյուս ոլորտների, ներկայացուցիչներին պետք է բարձրացնել, գնահատել:

Հենրիխ Մխիթարյանի որոշումով եւ հեռանալով՝ հայկական ֆուտբոլի մի ամբողջ դարաշրջան գրեթե ավարտվեց,  էջ փակվեց: Դա 2008 թվականից սկսած հավաքականն էր: Նա մեծ դերակատարում ուներ այդ հավաքականում, առաջիններից էր եւ առաջատարներից: Հիմա սերնդափոխություն է ազգային հավաքականում՝ նոր անուններ, նոր դեմքեր:

Շատ տաղանդավոր ֆուտբոլիստներ կան, բայց ես միշտ ասում եմ, որ ֆուտբոլում միայն տաղանդը քիչ է. ֆուտբոլիստը պետք է լինի նաեւ այնպիսին, ինչպիսին, շատ հեռու չգնամ՝ Հենրիխ Մխիթարյանն է: Հենրիխի ամենամեծ տաղանդը նրա մենթալիտետն է:

Կրկնվեմ՝ այն, ինչ ինքն է արել հայկական ֆուտբոլի, Հայաստանի համար, անգնահատելի է: Հաջողություն եմ մաղթում Մխիթարյանին հետագա ակումբային կարիերայում»,- ասաց Վարդան Մինասյանը:

Հենրիխ Մխիթարյանն ազգային թիմում հանդես էր գալիս 2007 թվականից՝ 95 խաղում խփելով 32 գոլ եւ դառնալով հավաքականի լավագույն ռմբարկուն։

Լուսինե Շահբազյան