Մարզական վճռաբեկ դատարանն արդարացրեց 15-ամյա Կամիլա Վալիեւային
10:10 14 փետրվարի, 2022Մարզական վճռաբեկ դատարանը (CAS) մերժել է Միջազգային օլիմպիական կոմիտեի, Գեղասահքի միջազգային ֆեդերացիայի եւ Համաշխարհային հակադոպինգային գործակալության բողոքարկումը 15-ամյա ռուսաստանցի գեղասահորդուհի Կամիլա Վալիեւայի ժամանակավոր հեռացումը սպորտից վերականգնելու գործով։
Վալիեւան կմասնակցի մենասահքի մրցաշարին Պեկինի 24-րդ ձմեռային Օլիմպիական խաղերում։
Վալիեւան Ռուսաստանի հավաքականի հետ Պեկինում նվաճել է թիմային օլիմպիական չեմպիոնի տիտղոսը։
Վալիեւան Պեկինի 24-րդ ձմեռային Օլիմպիական խաղերից առաջ ունեցել է դոպինգի դրական պատասխան եւ հեռացված է եղել մրցումներից Ռուսաստանի հակադոպինգային գործակալության կողմից։ Ռուսաստանի հակադոպինգային գործակալությունը թեստն արել է Սանկտ Պետերբուրգում անցկացված Ռուսաստանի առաջնության ժամանակ՝ դեկտեմբերի 25-ին։ Մարզուհու արյան նմուշի մեջ արգելված տրիմետազիդինի մասին պատասխանը ռուսական կողմը ստացել է փետրվարի 8-ին Համաշխարհային հակադոպինգային գործակալության հավատարմագրում ունեցող ստոկհոլմյան լաբորատորիայից (Շվեդիա)։ Հաշվի առնելով մարզուհու տարիքը՝ դրական դոպինգ թեստի մասին հրապարակային հայտարարություն չի եղել։ Միջազգային դոպինգ թեստավորման գործակալությունը մարզուհուն հայտնել է, որ նա ժամանակավոր հեռացված է մրցումներից։
Ռուսաստանի ազգային օլիմպիական կոմիտեն փետրվարի 9-ին վիճարկել է որոշումը եւ Ռուսաստանի հակադոպինգային կոմիտեի Կարգապահական հանձնաժողովը թույլատրել է Վալիեւայի մասնակցությունը Օլիմպիական խաղերին։
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.