Բաչկովը բրիտանացի մարզիչի հետ կպատրաստվի պրոֆեսիոնալ ռինգում երրորդ մենամարտին

23:10   24 հունվարի, 2022

Տոկիոյի Օլիմպիական խաղերի բրոնզե մեդալակիր, աշխարհի եռակի բրոնզե մեդալակիր, Եվրոպայի կրկնակի չեմպիոն Հովհաննես Բաչկովը պրոֆեսիոնալ ռինգում երրորդ մենամարտը կանցկացնի մարտի 19-ին Դուբայում:

Այդ մասին գյումրեցի բռնցքամարտիկը հայտնել է սոցցանցերում: Ինստագրամի եւ Ֆեսյբուքի պաշտոնական էջերում Հովհաննես Բաչկովը ներկայացրել պրոֆեսիոնալ բռնցքամարտում իր նոր մարզիչին՝ բրիտանացի Դեննի Վոանին, որը MTK Global մենեջերական ընկերության գլխավոր մարզիչն է:

Օլիմպիական խաղերի բրոնզե մեդալակիրը առաջիկա մենամարտին կնախապատրաստվի Դեննի Վոանի գլխավորությամբ:

Բրիտանացի մարզիչն ինստագրամի էջում պաշտոնապես ներկայացրել է իր նոր սանին:

«Ծանոթացեք, հայ բռնցքամարտիկ Հովհաննես Բաչկով: Հպարտությամբ տեղեկացնում եմ, որ այս պահից ես եմ նրան պատրաստելու առաջիկա մենամարտին, որը տեղի է ունենալու մարտի 19-ին Դուբայում:

Հովհաննես Բաչկովը Հայաստանից է, Օլիմպիական խաղերի բրոնզե մեդալակիր է, սիրողական բռնցքամարտում աշխարհի եռակի բրոնզե մեդալակիր եւ Եվրոպայի կրկնակի չեմպիոն:

Պրոֆեսիոնալ ռինգում նա անցակցրել է երկու մենամարտ՝ երկու հաղթանակ: Հովհաննեսն ունի մենամարտելու հետաքրքիր ոճ, որը սիրում են բռնցքամարտի երկրպագուները: Ուրախ եմ լինել այս երիտասարդի պրոֆեսիոնալ բռնցքամարտի կարիերայի մի մասնիկը: Սկսեք հետեւել այս ուժեղ հային, նա շատ համեստ տղա է եւ ապագա աշխարհի չեմպիոն»,- գրել է բրիտանացի մարզիչը:

Դեննի Վոանի գրառումով կիսվել է նաեւ գյումրեցի բռնցքամարտիկը:

Բաչկովը նախորդ մենամարտն անցկացրել էր 2021 թվականի ապրիլի 9-ին Ղազախստանի Ալմաթի քաղաքում, որտեղ առաջին ռաունդում նոկաուտով հաղթել էր ազգությամբ թուրք, Ուկրաինան ներկայացնող Բինալի Շախմանդարովին։ Դա գյումրեցի բռնցքամարտիկի երկրորդ մենամարտն էր:

Առաջին մենամարտը պրոֆեսիոնալ ռինգում նա անցկացրել էր 2020 թվականի հոկտեմբերի 9-ին Դուբայում՝ մրցավարների միաձայն որոշմամբ հաղթելով 32-ամյա վենեսուելացի Սամուել Գոնսալեսին: Հիշեցնենք, որ 2020 թվականի հուլիսին Բաչկովը 3 տարվա պայմանագիր էր կնքել MTK Global մենեջերական ընկերության հետ: 2021թ․ հոկտեմբերի 13-ին Բաչկովը պայմանագիր կնքեց Probellum պրոմոութերական ընկերության հետ:

 

 



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։