Կարեն Աղամալյան․ 2021 թվականը կարելի է համարել հայկական բռնցքամարտի վերադարձի տարի (ֆոտո)

Մրցաշրջան-2021-ը պատմական եղավ հայկական բռնցքամարտի համար: Տոկիոյի Օլիմպիական խաղերում Հովհաննես Բաչկովը 13 տարվա դադարից հետո նվաճեց օլիմպիական մեդալ բռնցքամարտում Հայաստանի համար:

Այսքանով հայկական բռնցքամարտի հաջողությունները չավարտվեցին: Նոյեմբերի 5-ին Սերբիայի մայրաքաղաք Բելգրադում Հայաստանի հավաքականի անդամ, 22-ամյա գյումրեցի Դավիթ Չալոյանը նվաճեց բռնցքամարտի աշխարհի փոխչեմպիոնի կոչումն ամենահեղինակավոր քաշային կարգում։ Հովհաննես Բաչկովն էլ Բելգրադում նվաճեց իր երրորդ բրոնզե մեդալն աշխարհի առաջնությունում:

22-ամյա Դավիթ Չալոյանն իսկական բացահայտում եղավ հայկական մարզաշխարհի համար: Աշխարհի փոխչեմպիոնի հաղթանակով ցնծեց ամբող մարզաշխարհը եւ Հայաստանը:

Բռնցքամարտի Հայաստանի հավաքականի գլխավոր մարզիչ Կարեն Աղամալյանը NEWS.am Sport-ի համար ամփոփել է մրցաշրջան-2021-ը:

Պարոն Աղամալյան, ինչպիսի՞ն ստացվեց մրցաշրջան-2021-ը:

Տարին շատ լարված էր եւ հագեցած: Մրցաշրջան-2021-ում մի շարք հաջողություններ ունեցանք, որոնք շատ ուրախացրին բոլորիս: Տարեսկզբում երիտասարդների աշխարհի առաջնությունում հրաշալի արդյունք գրանցեց երիտասարդ Հովհաննես Փափազյանը՝ նվաճելով աշխարհի առաջնության արծաթե մեդալ: Փայլուն հաղթանակներ ունեցանք նաեւ 22 տարեկանների Եվրոպայի առաջնությունում, որտեղ Արթուր Բազեյանը նվաճեց չեմպիոնի տիտղոսը, Համբարձում Հակոբյանը արծաթե մեդալակիր դարձավ:

Հագեցած տարվա ամենալարված շրջանն Օլիմպիական խաղերն էին, որտեղ Հովհաննես Բաչկովը պատմական հաջողություն գրանցեց՝ Տոկիո-2020-ի բրոնզե մեդալ նվաճելով:

Հաջողությունների շարքը շարունակվեց նաեւ բռնցքամարտի աշխարհի առաջնությունում, որտեղ Դավիթ Չալոյանը փառահեղ հաղթանակով դարձավ աշխարհի փոխչեմպիոն, Հովհաննես Բաչկովը՝ բրոնզե մեդալակիր:

Տաբեր տարիքային խմբերում՝ պատանիների, երիտասարդների Եվրոպայի առաջնություններում եւս լավ արդյունքներ ենք ունեցել, մեդալներ նվաճել:

Սպասվա՞ծ էին Ձեզ համար այս հաջողությունները՝ Օլիմպիական մեդալը, աշխարհի մեդալները:

Շատ գոհ եմ այս նվաճումներից: Մեդալների առումով վերջին տարիներին նման արդյունքներ չէինք ունեցել: Հաջող տարի էր: Եթե հաշվի առնենք Եվրոպայի, աշխարհի առաջնության մեդալները եւ հաջողությունները, 2021 թվականը կարելի է համարել հայկական բռնցքամարտի վերադարձի տարի:

Ո՞ր հաղթանակով առավել ուրախացաք։

Դժվար է առանձնացնել: Յուրաքանչյուրն էլ կարեւոր եւ սպասված հաղթանակներ էին մեզ համար: Օլիմպիական խաղերն, իհարկե, սպորտային նվաճումների գագաթնակետն է, բայց այս օլիմպիական մեդալը, Հովհաննես Բաչկովի այս հաջողությունը, սպասելի էր: Արդեն հասունացել էր պահը, որ նա պետք է փայլի օլիմպիական ռինգում:

Թերեւս կընդգծեմ Դավիթ Չալոյանի հաղթանակն աշխարհի առաջնությունում: Անկեղծ ասեմ՝ երեւի մի փոքր առավելությամբ շատ ուրախացանք Չալոյանի հաջողությամբ:

Դեռ ամռանը Դուք տարակուսում էի՝ Չալոյանին ընգրկե՞լ աշխարհի առաջնության կազմ, թե՞ ոչ: Մեր հարցազրույցներից մեկում եւս նշեցիք, որ կփորձեք Չալոյանին բանակայինների աշխարհի առաջնությունում եւ մեկ հաղթանակի դեպքում էլ նրան հնարավորություն կտաք մեծահասակների աշխարհի առաջնությունում: Կանխազգո՞ւմ էիք:

Այո, ես տեսնում էի, որ նա ունի լավ հնարավորություններ, բայց չուներ միջազգային մրցաշարերի մասնակցության փորձ: Այդ պակասը զգացվում էր նրա մոտ: Հենց այդպես էլ որոշել էի, որ մեկ հաղթանակի դեպքում էլ նրան հնարավորություն կտամ աշխարհի առաջնությունում:

2015 թվականին Չալոյանին հնարավորություն տվեցի երիտասարդների Եվրոպայի առաջնությունում պայքարել: Առաջին մենամարտում պարտվեց: Անփորձ տղա էր: Դրանից հետո նա գնաց բանակ: Զինծառայությունից վերադարձավ եւ մասնակցեց  Հայաստանի առաջնությանը: Իր քաշային կարգում կես ռաունդ մենամարտ արեց եւ դարձավ Հայաստանի չեմպիոն: Նրա անձնական մարզիչներին ասացի, որ Չալոյանին պատրաստեն բանակայինների աշխարհի առաջնությանը. սա իր համար հնարավորություն է՝ նվաճել մեծահասակների աշխարհի առաջնության մասնակցության իրավունք: Այդպես էլ պայման դրեցի նրա առաջ՝ մեկ հաղթանակ տանելու դեպքում գնալու է աշխարհի առաջնության: Բանակայինների աշխարհի առաջնությունում երկու հաղթանակ տարավ եւ բրոնզե մեդալ նվաճեց: Աշխարհի առաջնությունում ուղղակի փայլեց: Մենամարտից մենամարտ Բելգրադի ռինգում Դավիթն աճեց բոլորիս աչքի առաջ:

+92 կգ քաշային կարգում Հայաստանի պատմության մեջ աշխարհի, Եվրոպայի մեդալակիր երբեք չէինք ունեցել: Դավիթ Չալոյանի հաղթանակն իսկապես պատմական էր:

Ո՞վ եղավ տարվա Ձեր բացահայտումը:

Միանշանակ Դավիթ Չալոյանը: Բայց նա դեռ թիմի լիդեր չի: Դեռ շատ աշխատանք կա անելու հավաքականի լիդեր դառնալու համար: Շատ աշխատասեր է եւ հրաշալի տղա: Ցանկություն ունի մեծ նվաճումների հասնել:

Որո՞նք են 2022 թվականի նպատակներն ու անելիքները:

2022 թվականը եւս շատ հագեցած է լինելու մեզ համար: Երեւանում տեղի է ունենալու մեծահասակների Եվրոպայի առաջնություն: Խնդիրը լավագույնս հանդես գալն է եւ մեդալներ նվաճելը, չեմպիոններ ունենալը:

Հունվարի 25-ից 29-ը կանցկացնենք Հայաստանի առաջնություն, որին պետք է մասնակցեն բոլորը: Գուցե Հովհաննես Բաչկովը չմասնակցի եւ Կարեն Տոնականյանը, որը վնասվածք ունի:

Մինչեւ Եվրոպայի առաջնություն 1-2 միջազգային մրցաշարի կմասնակցենք: Այդ ընթացքում պարբերաբար հավաքների մեջ կլինենք՝ արտագնա եւ ներքին:

Եվրոպայի առաջնության հավաքների վերջին փուլը կանենք Երեւանում: Շատ թիմեր են դիմել, որ իրենց հետ համատեղ հավաքով պատրաստվենք Եվրոպային, բայց ես մերժել եմ, քանի որ ցանկանում եմ՝ իմ թիմը Երեւանում պատրաստվի եւ միայնակ: Համատեղ հավաքներ կանենք մինչ այդ:

Ի՞նչ ակնկալիքներ ունեք Եվրոպայի առաջնությունից:

Պատասխանատվությունը շատ մեծ է: Եվրոպայի առաջնությունը Երեւանում է, իսկ աշխարհի առաջնության արդյունքներից հետո հաղթանակների պահանջն ավելի մեծ է:  Ամեն ինչ պետք է անենք, որ Հայաստանի հավաքականը փայլի Եվրոպայի առաջնությունում: Հովհաննես Բաչկովը նույնպես ցանկանում է մասնակցել. նրա մեծ նպատակն է՝ Երեւանում անցկացվող առաջնությունում հռչակվել Եվրոպայի եռակի չեմպիոն:

Լուսինե Շահբազյան