Քաթարի «Ալ Սադը» պաշտոնապես հայտնել է թիմի գլխավոր մարզիչի պաշտոնից Չավիի հեռանալու եւ «Բարսելոնա» տեղափոխվելու մասին։
«Ակումբի ղեկավարությունը համաձայնել է Չավիի տեղափոխությանը «Բարսելոնա» պայմանագրով նախատեսված հրաժարագնի վճարումից հետո։ «Բարսելոնայի» հետ պայմանավորվել ենք ապագայում համագործակցելու մասին։ Չավին «Ալ Սադի» պատմության կարեւոր մասն է, եւ մենք նրան մաղթում ենք հաջողություններ»,- նշվում է «Ալ Սադի» հայտարարությունում։
«Բարսելոնան» Քաթարի ակումբին կվճարի 1 միլիոն եվրո Չավիի պայմանագիրը «Ալ Սադի»հետ վաղաժամ խզելու համար։
«Բարսելոնան» գլխավոր մարզիչի պաշտոնում ակումբի եւ Իսպանիայի հավաքականի լեգենդար ֆուտբոլիստի նշանակման մասին կհայտարարի նոյեմբերի 5-ին։
Չավին Բարսելոնա կվերադառնա հանգստյան օրերին, իսկ նրա շնորհանդեսը «Բարսելոնայի» գլխավոր մարզիչի պաշտոնում կլինի երկուշաբթի կամ երեքշաբթի։ Չավիի նորամուտը տեղի կունենա նոյեմբերի 20-ին Բարսելոնայի «Էսպանյոլի» հետ Իսպանիայի առաջնության 14-րդ տուրի տնային խաղում։
«Բարսելոնան» հոկտեմբերի 28-ին գլխավոր մարզիչի պաշտոնից հեռացրել է հոլանդացի Ռոնալդ Կումանին։ Պաշտոնակատար է նշանակվել ակումբի երկրորդ թիմի գլխավոր մարզիչ Սերժի Բարժուանը։
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։