ԱԱ. Հովհաննես Բաչկովը պարտվեց օլիմպիական չեմպիոնին (ֆոտո, վիդեո)

22:38   4 նոյեմբերի, 2021

Հովհաննես Բաչկովը չկարողացավ հաղթահարել Տոկիոյի Օլիմպիական խաղերի չեմպիոնի արգելքը Սերբիայի մայրաքաղաք Բելգրադում ավարտին մոտեցող բռնցքամարտի աշխարհի առաջնության կիսաեզրափակիչում:

63,5 կգ քաշային կարգի եզրափակիչի ուղեգրի համար Տոկիոյի Օլիմպիական խաղերի բրոնզե մեդալակիրը մենամարտեց կրկնակի աշխարհի չեմպիոն, կուբացի Էնդի Գոմես Կրուսի հետ եւ ծանր մենամարտում պարտվեց 0։5 հաշվով՝ բավարարվելով բրոնզե մեդալով:

Բռնցքամարտիկները ռինգում հանդիպում էին երկրորդ անգամ: Նախորդ անգամ 2017 թվականին Գերմանիայի Համբուրգ քաղաքում անցկացված աշխարհի առաջնության կիսաեզրափակիչում 5:0 հաշվով հաղթել էր կուբացի բռնցքամարտիկը

Հովհաննես Բաչկովը պայքարը սկսել է 1/16 եզրափակիչից, որտեղ տպավորիչ հաղթանակ է տարել ադրբեջանցի Մալիկ Հասանովի նկատմամբ: 1/8-րդ եզրափակիչում էլ 3:2 հաշվով առավելության է հասել Իտալիայի ներկայացուցիչ Ջիանլուիջի Մալանգայի նկատմամբ: Քառորդ եզրափակիչում մրցավարների որոշմամբ գյումրեցի բռնցքամարտիկը 2:3 հաշվով պարտվել էր թաիլանդի Սոմչայ Վոնգսուվանին, բայց հայկական կողմի բողոքարկումից հետո հաղթանակը շնորհվել է նրան:

Սա Հովհաննես Բաչկովի երրորդ բրոնզե մեդալն է աշխարհի առաջնություններում:

Ավելի վաղ կիսաեզրափակիչում փառահեղ հաղթանակ էր տարել +92 կգ քաշային կարգում Հայաստանի ներկայացուցիչ Դավիթ Չալոյանը՝ ապահովելով առնվազն աշխարհի առաջնության փոխչեմպիոնի տիտղոսը:

 



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։